Search
我自己都忘記咗今日出街，我都冇睇到添！多謝send圖想來提醒我的各方好友，尤其係揀呢張do咀相的Jonathan，而家成個人瘦晒，自信返晒嚟！
是次其實是友好支持原創故事app: TBC story
一個極有誠意的小說故事平台，有時間的可以click入去睇下佢搞乜：
https://pr7d8.app.goo.gl/HWzQ
#李浩林真係一個好好嘅主持
#咁短嘅時間可以串均晒我嘅身份
#仲要自然流暢
#我記得當日一錄完我第一句就係話
#你真係好犀利
#行家一出手便知有沒有
#學嘢
#今晚返去睇重播
blazer: Fabriman
小米旗下品牌 POCO 早前發佈嘅 POCO X3 NFC 主打實用性同打機功能，以高性價比號稱嘅佢，究竟拎上手用落係點樣呢，我用咗一排，我哋一齊黎睇下！
POCO X3 NFC機背使用聚碳酸酯物料，雖然無玻璃設計睇落咁高貴，但拎上手一啲都唔膠。機身上，右側有內置指紋辨識器嘅開關鍵同音量鍵，底部有喇叭、充電位、3.5mm耳機插頭，而左側就有雙卡槽位，用家可以選擇雙卡雙待，或一張Nano Sim卡配最高256GB嘅microSD卡。
POCOX3 NFC 配置咗高通 Snapdragon 732G 處理器，使用6.67吋 FHD+ DotDisplay 開孔式屏幕，最高可以支援 120Hz 嘅屏幕刷新率，同240Hz 嘅屏幕觸控更新率。等我哋睇片試下先！畫面色彩自然，夠sharp之餘，喺120Hz刷新率下亦都十分流暢。我哋再開埋個新聞資訊節目睇下！喺有多行走馬燈嘅情況之下，都保持到順暢，真喺唔錯！
考慮到唔少人會用呢部電話嚟打機，咁上網速度固然重要啦！咁等我試一試個Wifi速度先！OK唔錯！再試埋Sim卡上網，喺室內嘅情況下都有呢個速度梗係收貨。
鏡頭方面，POCO X3 NFC採用4鏡頭設計，包括 6400 萬像素主鏡頭、1300 萬像素 119 度超廣角鏡頭、200 萬像素嘅景深同微距鏡頭，而前置就有 2000 萬像素鏡頭。喺日光環境下，相片質素大致唔錯，放大睇亦都唔會太曚。喺夜景拍攝嘅情況下，畫面顏色會比較鮮艷，雖然細節位會比日間曚，但以呢個價位嚟講，合格收貨有餘。
呢部機有 5160mAh 嘅電量，支援 33w 有線快速充電，只要唔係長期睇片同打機，電量都可以使用兩日。佢亦都支援NFC，可以配合 Google Pay 使用，方便晒大家出街俾錢。
另外，呢部機都支援 Wifi 分享功能，手機 connect 住一個 Wifi，之後仲可以用呢部手機開埋 Wifi Hotspot，好方便㗎！
POCO X3 NFC香港已經有售，6GB RAM加128GB內置儲存空間版本，賣HKD$1699，有灰色同藍色選擇。對於日常經常睇片同打機嘅人，呢個價位絕對值得入手。
近月唔少5G電話推出市場，其中一部引人注目嘅，就喺小米以三千尾賣街嘅新旗艦機款Mi 10T Pro 5G。作為小米旗艦機款，究竟喺各方面嘅表現如何？今日就同大家做個開箱啦！
Mi 10T Pro機身前後都使用玻璃面設計，採用咗Gorilla Glass 5強化玻璃物料，就咁望落去都有旗艦機嘅貴氣感。可以用作指紋識別器嘅開關鍵同音量鍵喺機身嘅右側，機底有SIM卡槽，USB-C插槽同內置喇叭，而機頂就有紅外線傳輸埠。呢部機採用咗6.67吋 開孔式 FHD+ LCD屏幕，而屏幕本身就支援30Hz到144Hz嘅屏幕更新率，亦都支援AdaptiveSync功能。
試埋部機本身先，Mi 10T Pro使用高通Snapdragon 865處理器，有8GB RAM記憶體，效能上已經係旗艦級水平，應付日常生活完全冇問題。等我開多個App試下先！睇有多行走馬燈嘅新聞資訊節目，表現都相當流暢！
Mi 10T Pro其中一個賣點，除咗2000萬像素前置鏡頭之外，就喺佢嘅三主鏡頭，包括1億800萬像素主鏡頭、1300萬像素超廣角鏡頭、同埋500萬像素微距鏡頭。等我哋試下影相先！影出嚟嘅相片顏色自然，清晰度亦高，放大睇都唔會變到好濛。俾埋夜景大家睇睇！喺比較暗嘅地方都可以捕捉到咁多色彩，保留到清晰度之餘又唔會太暗，真係唔錯！
喺軟件方面，之前我哋已經試過「魔法分身」呢個功能！只要用腳架固定手機，再開啟相應功能，之後企喺四個唔同嘅位置擺好姿勢，輕鬆搞掂！拍片都得架！等我哋搵個model試下先！一樣搞掂無問題！試完「魔法分身」，等我哋試埋個長曝光模式先！雖然唔係黑曬但係寫出嚟嘅字都好清晰！
再試一試呢部機上網表現，用Speedtest測試一下5G嘅表現！喺室內嘅情況下都有唔錯嘅表現。再試埋接收WiFi 6嘅表現！唔差嫁。呢部機另外仲有 Wifi Sharing 功能，可以用自己機做熱點，分享你已經連接咗嘅WiFi網絡。第時喺酒店，或者會限制連線數目嘅WiFi情況之下，都可以分享WiFi俾自己其他裝置用。
手機電量方面，Mi 10T Pro 有 5000mAh 電量，支援33W有線快充，唔駛一個鐘就可以差滿電，日常生活絕對夠用。呢部機亦都支援 NFC 功能，加你嘅信用咭落 GooglePay，出街俾錢就更方便！
Mi 10T Pro 香港官方賣緊 HKD$3,699，配置8GB RAM同256GB內置儲存空間，顏色方面，有宇宙黑、月光銀、同極光藍三款顏色選擇，如果想以中階機價錢去感受一下旗艦級嘅水準，Mi 10T Pro絕對係一個好選擇！
隨住 5G 網絡嘅推出，三星就喺 2020 年發佈咗 Galaxy S20 系列，當中又以 Galaxy S20 Ultra 5G 最令人期待。今日就同大家做個開箱！
打開啱啱收到嘅 Galaxy S20 Ultra 5G，盒蓋有個細盒仔，好，我放埋一邊先，除咗 S20 Ultra 5G 之外，Samsung 亦都包咗一個支援快充嘅 Type-C 充電器、耳機同埋充電線。
拆開盒蓋嘅盒仔，入面就裝着原裝嘅軟膠機殼，亦都包括一支 SIM 卡針。充電線係 Type-C 去 Type-C 嘅，而 AKG 耳機亦都係 USB Type-C 頭，再包埋唔同大細嘅入耳膠。
睇睇部機先，無論拍落上一代嘅 S10+，定係今年同系列嘅 S20+，擁有 6.9 寸大 Mon 嘅 Galaxy S20 Ultra 5G 都明顯比較大部，機身右邊係音量掣同埋預設 Bixby 掣，左面就完全無任何按鈕。SIM卡位繼續放喺機頂，耳機底呢就係 Type-C 頭，上一代仲有嘅 3.5mm 耳機插頭，終於喺呢代淘汰咗喇。SIM 卡槽係用 3 選 2 嘅混合設計，不過比較失望嘅，係我早前喺東南亞試機嘅候，S20 係支援 ESIM，但係香港版呢，就無咗呢個功能。究竟係香港三星刻意收埋呢個功能，定係因為處理器版本唔同，導致冇咗呢個功能呢？暫時就不得而知喇！
如果你有睇清楚嘅話，新機嘅機面已經預先貼咗原裝嘅保護貼，官方亦都建議保護貼要用返裝，屏下指紋辨識先至可以正常操作。
今次機面用咗類似 Note10 嘅 Infinity-O 中間開孔屏幕，自拍嘅時候更自然，機背嘅鏡頭就由 S10 系列嘅中上位，搬到左上角，亦都以今年流行嘅方型排列。不過呢個鏡頭位就比較重手，加上部機大部，所以拎上手係有啲墜手，同 S10+ 完全係兩種唔同感覺。
爆咗機之後好快就收到官方嘅更新提示，由於手機喺出廠嘅時候，香港嘅 5G 頻譜未正式使用，所以機入邊嘅 5G 功能都要透過呢個更新先可以用到。更新完，如果你係處於 5G 覆蓋嘅地區，你會見到 5G 嘅圖示喇！實心嘅 5G 圖示係表示你正在使用 5G 數據， 而空心嘅圖示就係表示有 5G 覆蓋。等我隨手做過 5G 嘅測試先，發現速度同埋時延都比 4.5G 有好大嘅改進，下載喺大部份時間都以百 mbps 計！關於更多 5G 嘅測試，大家可以參考我哋先前嘅節目！
屏幕預設嘅解像度達到 3200 x 1400 像素，你亦都可以將更新率由 60Hz 提升到 120Hz，雖然喺解像度方面有所犧牲，但係喺樓暢度就有明顯嘅提升，就算快速滾動選單都一樣冇殘影，相信用嚟打機，效果就會更加明顯喇。
Galaxy S20 Ultra 5G 用 S865 處理器配合 12GB Ram，預載 Android 10 配合 Samsung OneUI 2.1 介面。我都好欣賞 Samsung 喺 OneUI 所落嘅功夫，改良咗嘅分屏 split-Screen 功能，配合呢部機就相當流暢同實用！有時我哋打住短訊或者覆緊 Email，又想留意住最新嘅新聞直播，同一時間又要上網摷資料 Paste 番落去個 Email，S20 Ultra 5G 就可以一個畫面做晒，唔使好似傳統電話咁㩒嚟㩒去，而且仲非常流暢，真係要俾個 like 佢喇！
今次 Galaxy S20 Ultra 5G 仍然係配備咗超聲波屏下指紋辨識技術。經過咗舊年嘅保安事故之後，相信 Samsung 三星已經解決咗相關嘅保安問題，而辨識時間就更加比上一代稍快。
Galaxy S20 Ultra 5G 主打 1 億 800 萬像素嘅鏡頭，仲有 100 倍 Space Zoom，同埋特大光圈嘅夜拍技術，究竟效果有幾好？ 我哋下集再同大家測試！
《Z世代達人》
麥卓華
#GalaxyS20Ultra #5G #開箱
