「溝」電影節策劃人馮慶強講解是次選擇了《東方三俠》作為Cult片香港代表原因。
因為「溝」片個題，呢排好多人問我點解選片有《東方三俠》。而通常都會帶住另外一句，點解無《伊波拉病毒》、《妖獸都市》、《力王》等？諸如此類問題。
原因就係，一個咁細嘅小電影節活動，只能夠放一部香港電影嘅時候，我決定放棄早被定性片單（實際上再重申一次亦無意思），而以本地電影發展為基礎，選擇可以挖掘到源頭，與歷史脈絡明顯接到軌，相對比較少人以「溝」角度提及嘅電影。
《東方三俠》係一部混種類型片，結合武俠、科幻、奇幻，並注入對抗變態帝王、鏟除極權等怪奇元素。可以咁講，成個格局、樣式，只有當時香港電影先做到。加上三大女星合作，機會已成絕響，而且呢部戲，亦係杜琪峰作品裡面異數之一（另一部係《城市特警》），能夠於大銀幕重現，重新被認識、談論，我認為相當值得。
《東方三俠》源頭，來自粵語片時期，以城市為背景嘅女俠系列。2007年，電影資料館曾經以《奉旨打男人的女人──珍姐邦電影》做主題回顧，確立呢個受占士邦片、間諜片影響嘅片種，於香港電影發展史中重要性。當中，《黑玫瑰》系列（楚原導演）、《女黑俠木蘭花》系列（羅熾導演、倪匡原著），絕對係經典之作。
延伸落去，可以補充一點。粵語片時期，「仙鶴港聯」公司電影，除咗《女黑俠》系列，仲有都市愛情片、老夫子系列、武俠片等等，差不多每一部都創意十足。戲唔單止好睇、過癮，用今日標準，「仙鶴港聯」直頭係一間溝片大廠。
