[過往文章分享]如何制定合適的家用預算？
原文：https://www.patreon.com/posts/jia-yong-dui-ni-41735315?utm_medium=clipboard_copy&utm_source=copy_to_clipboard&utm_campaign=postshare
我琴日睇左個有關俾家用既post，入面講到有關俾家用既邏輯同計算方法。其實呢個題目我都唔係第一次講，點解我都想再講呢？原因係佢看似係d旁枝末節，但其實對年輕人影響可大可少，唔止係錢，仲係價值觀同家庭教育問題。對一個人大學畢業後25-35歲之前所寫的生涯規劃第一個十年影響深遠，有幾誇張？我地黎睇睇。
家用文化華人獨有
講起俾家用，其實真係華人社會特色，呢個源自於「孝」，呢個字，英語世界係冇，因為係外國人眼中，關愛係冇上下之分，所以就算你見到聖經有孝字，都係譯者嘅問題，外國人會尊敬長者，但不知孝為何物，孝當中有順從，有尊卑。放諸今天，難免引起好多紛爭。
另一個家用既用的比較實際，畢竟家用就係講緊小朋友長大成人，得到收入先會俾，其實就係作為一個年年人，要盡返自食其力既責任，有能力賺錢，就應該負責返自己日常生活既開支，咁先算係長大成人。係家用議題之中，有幾多少關愛，有幾多責任，從來就係有理說不清，因為關愛不能量化，總係多多益善。但俾得多，係咪就代表好，也不一定。
俾家用學自立
因為根據jobsDB最新《2019年大專生就業狀況調查報告》，大學畢業生首份月薪的實際平均金額為港幣16,692元，我認為同我認知既都差不多。中國人一向不求甚解，好多時只係拋一句，要俾30％做家用，40％做家用。年輕一代大多接受高等教育，我地會問：點解？
我係支持俾家用的，因為呢個舉動有利子女去了解到底一個家係點運作，點維持。一個月到底用幾多電？伙食費有幾貴？因為要制定家用預算，所以佢需要知道呢一切，為將來佢成家作好準備，唔好煮個飯又唔知買幾多斤菜，又唔知原來搞個上網要幾多錢，大個仔大個女都要知道一下你生活模式需要既成本。而唔係一句冇理由的30％、40％，而家唔係交稅，就算交稅都有累進稅率，我地都唔應該對低收入既年輕人不問情由地削除佢日後既可能性同能力。所以，係制定家用預算之前，請用時間了解家庭嘅月支出，就住家用總開支為基礎定立預算，而非好似傳統出糧繳稅的方式，呢個方法只會減少子女努力工作的熱情，亦冇助親子關係，好似我俾左錢就可以咩都唔理，將責任外判。
俾家用係幫下一代儲錢？
其實，如果下一代係正常冇太花費，儲蓄呢個責任應該由年輕人自己負責，幫佢儲錢，不如教佢儲錢。因為多數精明理財既父母，由細就應該知道教子女理財既重要，唔會等到年輕人都出黎做野，仲要父母幫佢儲。講得出幫佢儲既父母，更多係理財不善者，先會下意識覺得子女唔識呢d野。就算真係唔識，好似窮生呢類理財博客／導師都會有開班去教年輕人一開始點做理財計劃（唔多講，費事賣廣告），同時坊間亦好多工具可以幫助新手入門，例如月供股票、零存整付等等。
住屋成本盡量避免計算
香港樓貴就係人都知，年輕人係咪咁易好似外國咁18歲自立可以自己搬出去？唔係咁易。所以父母切勿以此威脅，因為當年你層樓都冇而家咁貴，你唔為子女著想，子女亦唔需要睇你面色，大家講求互相尊重體諒。如果你係業主，又已經供滿層樓，即現實上你已經沒有居住成本（不計管理費及差餉）。如此一來，最好唔好再要求子女俾太多家用，只需要俾一個基本伙食費就足夠。不過前題就係，大家可以一齊制定一個理財計劃，每月定額的儲蓄，用作投資／升學及置業之用。如果作為年輕一代，也可以反過來主動解釋俾父母聽，自己嘅人生計劃。你未來數年，會點樣行，用錢係咩地方，相信父母行有餘力，又見仔女咁有計劃，都會樂於減少你家用開支，成就你嘅理想。
父母可以點幫子女？
上文講到我係支持俾家用，因為要盡責任。問題就係唔係個個有能力，如果一個人月入10000，一個月自己開支3000唔算多，有1000雜費，如果俾3000家用，剩下只有3000元作儲蓄，咁幾乎已經係佢可以負擔的上限，萬一父母再要求佢俾到4000－5000，無疑係削掉子女儲蓄既能力，對佢第一個十年建立財商概念造成重大打擊！因為由如果佢呢十年，冇機會自己透過儲蓄、投資、甚至在興趣上消費。累積財富、人際關係同機會，30歲之後分別就會好明顯，視野，眼光都落後於人。
所以，父母如果行有餘力，應該對住佢既真正生活開支，就住年輕人既可負擔能力作出扣減。如果佢既家用水平，升到110％ of佢真實係屋企用左既開支就應該停止增加，反而鼓勵佢對自身放膽投資，把握機會，會比較對下一代有益。
等你開飯又點算？
我係《戒窮》入面都提過，貧窮分三種，第三種係家貧型，即係成家等你開飯，你一出糧已經要分返俾屋企開支，做成窮忙。呢個情況我已經分享過，你一定要同家人一齊定下共識，必要時你仲要把持左屋企的財政。因為家貧係長期的，一定係屋企嘅理財方針出左問題導致。所以過程除左你要計好你自己盤數，仲要結構性地幫屋企盤數進行改革，俾錢養家唔係問題，但既然錢由我地提供，我地亦有權利同義務為家中開支進行把關，做到全家一齊上流，真正戒窮。
實戰：
以一個4人家庭計，樓供完，母親同弟弟沒有工作。爸爸同你有收入。爸爸最少應該為家中另外兩名成員負責。以一家人開支2萬元計，你嘅家用預算可能就係2萬元的4分之1，即5000元。當然，如果自己能力做到，又希望幫輕屋企，俾多啲並無不可。但係點都好，你要好清楚2萬元開支的生成部份，如果你認為力有不遞，不妨同家人商量，順便檢討一下屋企開支有冇可能減少嘅空間。俾家用，唔係外判責任，俾左錢，同樣要關心屋企情況，呢個先係健康嘅家庭文化。
其他內容：
[升級會員]個案分析－綜援出身90後護士小妹5年100萬理財plan
https://www.patreon.com/posts/sheng-ji-hui-ge-42142236?utm_medium=clipboard_copy&utm_source=copy_to_clipboard&utm_campaign=postshare
成日話儲蓄保險係伏，到底佢伏係邊呢？(上)
https://www.patreon.com/posts/ji-ben-hui-yuan-42508584?utm_medium=clipboard_copy&utm_source=copy_to_clipboard&utm_campaign=postshare
