外圍的核心內圍《最終回》
【賭仔永遠都係輸家】
山哥一聲令下，全部人出發去夜總會，我哋被安排喺VIP大房，大到點呢，大到根本係另一個酒吧咁，有桌球玩、有卡拉OK、有5個廁所、有舞池，仲有換完一批又一批嘅小姐。
不過劇情並唔係好似電視劇咁，啲小姐唔會坐埋你身邊，而係喺呢間咁大嘅房四處游走，目測個玩法係十分荒淫，如果有人睇中個小姐，就會拉佢入廁所交易。呢個時間亦多咗好多唔知乜哥物哥出現，係我之前未見過嘅，亦唔知喺邊度捐出嚟，總之一個二個都會行埋嚟同山哥打招呼吹兩咀，而我唔知點解山哥係全程Mark實我坐，一路9up好多無謂嘢，例如夫妻相處之道呀、鷹哥前列腺有事呀、施政報告呀、八達通呀......想賣甩佢睇下啲小姐咩樣都唔得，因為嗰度其實都幾黑。
之前咪話有個古惑仔打算keep起山哥啲零用錢，返香港換港紙自己用嘅，呢晚佢又嚟料，行埋嚟問山哥啲小姐使唔使畀錢。
山哥：「DLLM，你會唔會為興趣去做鴨吖？梗係要另外畀錢啦！咪畀咗零用錢你囉，睇啱你就帶佢入廁所，賭少啲啦你！」
原來佢咁慳家，係因為之前輸波輸得好甘，甘到冇咗層樓，冇咗個老婆，我好奇怪咁問：「我哋咁多料收都會輸？」
山哥：「貪心囉，輸錢皆因贏錢起，平時冇假波料嗰陣佢都照賭，世界盃又賭，英超又賭，德乙又賭，中超又賭，澳洲波又賭。」
「咁佢輸咁多還晒未？應該要Cut佢個外圍戶口啦，一陣佢又輸多啲。」
山哥：「Cut咗啦，佢咪一樣去合法嗰啲賭，阿聶，我真係同你講呀，唔好賭波，成日話咩外圍咩合法，其實多餘啦，喺邊度賭都好，咪又係嗰啲波，咪又係會做假，所謂合法，只係攞咗牌嘅外圍，無論喺邊都好，你一賭就注定要輸。」
又啱喎，正如大耳窿同埋財務公司一樣，啲息都係還死你，分別只係有牌定冇牌，睇清楚啲息口，分別根本唔大。
山哥：「你有冇諗過點解有啲地方嘅聯賽咁冷門都有得播？」
「推動足球吖嘛，等球迷多啲選擇。」
山哥：「屌，多L餘啦！第一，根本係莊家幫電視台出錢買直播權，睇下開咩時間先，下晝係畀班廚房佬落場賭架！搭通晒天地線先搞直播畀你班友玩啦！」
如果呢啲說話由一個輸波輸錢嘅人講，我一定唔信，但係由一個靠搞賭波起家嘅人講，仲需要質疑啲咩？
「不過有好多人都鍾意話自己贏錢，又贏幾多幾多，應該都有人贏啩。」
山哥：「個個都鍾意吹自己贏錢，輸錢就收埋唔講，搞到有種錯覺啲錢好易贏，不過都好既，冇呢啲人，我哋又點搵到食，個個都當自己係足球專家架啦，阿叻都話佢買乜贏乜架，係就唔使出嚟襯啦，呢啲人唔使點醒佢，啱架喇，要認叻咪由佢哋認囉。」
呢個時候嘅山哥已經飲到愈嚟愈醉，好似當咗我係小姐咁，一隻手長期搭住我膊頭，都有少少擔心自己個菊花，不過最擔心嘅反而係佢一句說話。
山哥：「阿聶，總之我同你講，如果有一日畀差佬拉，唔好同差佬爆其他兄弟，安家費我哋會界足，你唔使擔心，出番嚟會畀嘢你做，大佬都有得你做呀！」
喂，我外賣仔嚟咋，呀，唔係，我資料輸入員嚟咋，點解差佬會搵我呀？安家費有幾多呀？但係我犯咩事要入去坐先？
當晚嘅對話令我好不安，我已經決定返香港之後求其搵個藉口辭職，點知返到香港之後，山哥話公司要暫時解散，原因係另一個股東瘦骨仙穿櫃桶底，香港盤數唔清唔楚，所以各手足出埋啲糧先，等山哥籌組新office再上路。
事隔一個月之後，山哥果然一諾千金，好多同事都返咗去，只係公司地址變咗，不過我就順勢轉咗工喇。呢份工令我眼界大開，而且從另一個角度睇足球，可惜道不同不相為謀，我始終唔係山哥世界嘅人，但無可否認佢係一個好人，如果你唔賭波的話.......因為佢今時今日咁有錢，獨立屋同埋名錶名車，一切都係靠班賭仔供養。
而家見到啲人賭波，好想同佢哋講一句：「唔好賭啦，真係害死人架，何況人哋一早有晒劇情，你根本唔係賭緊波，你係賭緊故事橋段，十賭九輸，今日贏，聽日都一定輸返，莊家係必勝架，佢唔怕你贏，最怕你唔賭。」只係萍水相逢，唔通我落投注站傳道咩。
世界盃就到，賭開波嘅人一定繼續賭，咁大嘅盛事隨時連唔賭波嘅人都湊熱鬧，與其倒錢落海，不如用呢啲錢食餐好，甚至買份禮物畀身邊嘅人。
我明白好多人賭錢只係想搵快錢，甚至賺啲基本開支生活使費，例如卡數差一萬，你手上得五千蚊唔湯唔水，想搏一鋪賺埋另一半卡數，不過你信我，如果你賭波，只會連手上呢五千蚊都冇埋，寧願找咗先，然後再諗辦法，希望唔一定在明天，但賭波就一定冇明天。
如果你係真球迷，唔好理有冇假波，純欣賞就得喇，就同做人一樣，有啲嘢知得太清楚反而無癮，自得其樂，唔好畀吸血莊家賺你錢！若然呢個世界冇人賭波，所有球賽一定更加精彩。
#教育文少like都要做
#唔好有人跳樓先嚟做
#世界盃又嚟喇
#唔好賭唔好賭唔好賭
#幫襯外圍同有牌都係賭
#噚晚歐聯卡列奧斯唔係假波
#卡列奧斯只係屎波所以要原諒
#人誰無過
#但歐聯決賽先至連番犯錯
平和基金戒賭熱線
http://www.donotgamble.org.hk/tc/index.php
香港戒賭中心
http://www.hkgamblers-recovery.org/
香港明愛家庭服務
https://family.caritas.org.hk/zh-hk/services/view/13…
社聯 - 戒賭熱線總覽
http://webcontent.hkcss.org.hk/hotlines/service.asp…
《第一回》
https://www.facebook.com/officedaily/posts/522113084902184
《第二回》
https://www.facebook.com/officedaily/posts/523911894722303
《第三回》
https://www.facebook.com/officedaily/posts/524287718018054
《第四回》
https://www.facebook.com/officedaily/posts/524860727960753
《第五回》
https://www.facebook.com/officedaily/posts/525366114576881
但歐聯決賽先至連番犯錯 在 辦公室日報- 外圍的核心內圍《最終回》 【賭仔永遠都係輸家 ... 的推薦與評價
如果呢啲說話由一個輸波輸錢嘅人講，我一定唔信，但係由一個靠搞賭波起家嘅人講，仲需要 ... 噚晚歐聯卡列奧斯唔係假波 ... 但歐聯決賽先至連番犯錯 ... <看更多>