《賣菜篇，你問我答》
不得了不得了，尋日宣佈左我既全職炒散計劃之後，本來我係諗住星期六繼續做Food Panda繼續分享外賣仔既心路歷程，點知收到好多PM，我既讀者真係各行各業人才都有，佢地都不約而同咁叫我不如做我個行啦！
有一個行業即時吸引到我，就係有位讀者佢話自己開菜檔賣菜！！！！！
呢位讀者佢同我講佢18歲就開始賣菜，唔係比屋企人迫，而係佢膽粗粗咁拎住五百蚊同批發買左蔥同荽茜，跟住凌晨五點係街市門口做無牌小販開始，九點就要走鬼，到今日已經有自己既菜檔，一賣就賣左十幾年喇！
佢同我講，只要你唔怕走鬼既，一個朝早幾個鐘比做Food Panda搵得更多，我一聽就即時心動，而心動不如行動，同佢講左兩句，發現大家係同年，一傾如故，所以我決定星期三就插隊體驗一下賣菜既生活
菜，我買得多，賣，我真係未試過！
一諗起賣菜，我好似十萬個為什麼咁諗左好多疑問，例如：
咩時候食咩菜最當造呢？
到底菜芯公價係幾錢？
超甜粟到底係一個綽頭定係真係特別甜呢？
豆苗點解貴到咁呢？
幾點前買菜先會靚呢？
買幾多錢先會有蔥送呢？
有機同無機，味道上係咪真係有分別？
買菜要點揀先靚呢？
賣菜既會食咩菜呢？
無數問題，作為一個買餸只會叫靚姐幫我揀既住家男人，今次我直入菜檔，親身體驗蔬菜既奧妙！
菜幾乎日日都會食，但我諗真少少先發現自己對於菜係一無所知……
如果你都會買餸，都會食菜，對於菜有咩問題想問，希望大家係留言度講低你既問題，聽日我會一點一點咁幫你地問老闆！
老闆佢已經搵夠喇，都唔介意比大家知道更多行情！
留言吧！！！所有留言既朋友，我都會到時直接回覆返你地既問題，另外再做一個整合係聽晚發放！
呢個系列，比我想像中有趣得多，希望大家可以睇文時，都拎到野走！
全職炒散，賣菜篇，正式啟動！
