【 ⭐️⭐️2018香港電視大獎／專訪時間⭐️⭐️ 】
35個獎項投票表格傳送門（陸續更新）：http://bit.ly/2SD0BqA
「2018香港電視大獎」35個獎項的候選名單，至今已公布了一半，當中八個演技獎項 ─ 民選視帝、視后；劇集組男、女配角；迷你劇、單元劇、特別劇及網絡劇組的男、女主角和男、女配角，所有提名均已公開，換言之，今屆獲得最多提名的男演員和女演員亦告出現，哪位女藝人如此犀飛利，先在此賣個關子，而男藝人則是合共獲得4個提名的 KaKi Sham 岑珈其 。
生於1990年，現時28歲的岑珈其，跟林耀聲是屯門新會商會中學的同學。2006年他倆試鏡成功，參演麥曦茵處女執導長片《烈日當空》，電影2008年上映，去年剛好是他入行10周年，然而演員路不好走，他曾經有段長時間沒工開，一度轉行打地盤工，又做過地產經紀，但最終還是矢志回歸演員行列。經過無數次客串，2017終於在港台劇集《忘憂理髮店》擔正，而去年更是非常多產，除了合共有6套電影上畫外，亦參加ViuTV劇集《VR 驅魔人》飾演搞笑角色多春魚、於Netflix上架的港劇《陽關道》飾演余亦琛，面對密密麻麻的行程，依舊能夠抽空演出港台電視的單元劇《那些年 那些歌II ─ 何韻詩篇》和「鮮浪潮」作品《艷陽天》，堪稱逆市奇葩，成為其助手口中的一條「多產魚」（非粗口，是讚賞！）；而上述四套作品，令他成功入圍男配角獎（劇集）、男主角獎（迷你劇、單元劇、特別劇和網絡劇），以及男配角獎（迷你劇、單元劇、特別劇和網絡劇）。
一直以來，岑珈其都不是劇組當中最起眼的那一位，然而其淳樸真摯，又帶點草根味道的演繹，是現今行內少見的，你會覺得，他就是你的某位朋友，或者在街上踫見的某位陌生人，加上他相當努力，彈性大，任何角色都願意嘗試（除了學生），所以如果你是喜歡看香港電影和非無綫製作的本地劇集，必定會記得他的樣子，希望經過這次民選電視獎後，他的演藝事業能更進一步，讓更多觀眾認識他，對我而言，尤為期待他在ViuTV劇集《教束》的演出，在此分享2018年4月12日出版的第262期《100毛》「你有冇電視呀？」欄目內，由小弟撰寫岑珈其足本專訪內容。
【 岑珈其實真係好鍾意做演員 】
Q：游大東
K：岑珈其
Q：你幾時開始想做演員？
K：好細個已經極度想！嗰陣時成日都睇劉德華、周星馳、成龍嘅戲，感受好深，覺得做佢哋做嘅角色勁吸引。記得寫《我的志願》，我已經寫話要做演員，其實我係一個三分鐘熱度嘅人，咩都覺得新鮮，但玩幾下就收手，後來知道有種職業叫演員，可以嘗試扮演好多唔同嘅人，感受唔同嘅事，覺得呢樣嘢好神奇，但細個嘅時候，完全唔知點樣接觸呢行，冇玩Drama，亦唔會話18歲要報讀藝員訓練班。
Q：你15歲嘅時候，同林耀聲一齊畀麥曦茵發掘入行，件事其實係點？
K：初初接觸阿曦係2006年，當年我15歲，林耀聲就16歲，阿曦透過社工朋友聯絡到我哋呢班街邊「廢青」，社工話，有位新導演想搵啲人傾，然後拍戲，我就話：梗係好啦，因為細細個已經好想演戲，咁就見啦傾啦。當晚，阿曦不斷問問題，我就不斷講好多嘢，阿聲就好靜，幾乎完全冇講過嘢，好大對比，當時周邊仲有三四個朋友一齊，之後我哋就問阿曦可唔可以去Casting，佢話好呀，你哋嚟啦，終於我哋成班去咗Cast，當時我哋只係當玩玩吓。過咗個幾兩個月，再收到阿曦電話，話想再跟我同阿聲 Casting，第二次Casting後好快，唔記得係第二日定係當晚就已經收到電話，話有興趣搵我哋一齊演。上到公司，見到「老爺」（曾志偉），先知道件事真係堅嘅，由呢刻開始，就一路去到而家。
Q：以往你都有好多客串電影嘅機會，電視方面就演過好多單元劇，而去到今次《VR驅魔人》就真係一套連續劇，多春魚亦係一個相對重要嘅角色，你自己有冇覺得，準備工夫同以前唔同？而你嘅演藝事業，係唔係終於去到另一個階段？
K： 今次貽興、劉翁畀咗個真係好重要嘅角色我去演，我冇覺得飄飄然，反而覺得要做得更加好，至於你問演藝事業嘅階段，我覺得係自己喺呢個行業再行入得多咗，因為佢哋搵我再唔係客串，或者演啲好細好細的角色，而係做啲重要啲嘅角色，代表自己再近咗喇，所以自己下嘅功夫，或者準備嘅嘢都要多啲。
佢地兩個有話呢個角色，主要係用嚟搞笑嘅，緩衝吓個氣氛，亦可能要做下把位嘅，會有啲好慘嘅遭遇同經歷要我去受嘅，我完全唔介意，因為我成日都覺得，總會有一啲適合你嘅角色，或者係你先可以做 到嘅角色。我當時反而諗，我係好樂意去做。之後同佢哋再傾，佢哋話有啲Reference畀我，佢哋叫我去試下睇《金枝玉葉》（1994），留意入面嘅魚佬一角（陳小春），佢哋話我個外形、談吐有啲似陳小春。其實由細到大都好多人咁講，特別入咗呢行之後，我哋就好想拎返以前陳小春剛剛出道嘅例子，嗰 種感覺係，佢都係做啲周邊角色但好有自己性格，大約係呢個方向，然後再諗一啲搞笑位，或者畀啲元素令呢個角色豐富啲，因為多春魚個性係好鍾意搶風頭，你會睇到故事發展，其實皮蛋王（王貽興飾）、Sunny（劉翁飾）佢哋兩個唔係想出位，多春魚就話：「我要上報紙，你要預埋我玩！」咁就會令到呢個角色對比豐富。
Q：拍呢套劇，同以往拍其他作品，有咩唔同嘅得着？
K：我之前主要演正劇，《VR》主打喜劇，又有少少靈異，我係未試過。今次玩味性重啲，最唔同嘅地方係，要好識得臨場執生，因為好多搞笑劇情，就算事前度好咗，覺得好好笑都好，如果度得太實就變得唔好睇，或者拍好多個Take嘅話會滑牙，即係好多嘢真係要好精準，只能夠兩至三次內就要Good Take咗佢，所以我學到拍喜戲要點樣精準啲。
【 岑珈其入圍作品 】
男主角獎（迷你劇、單元劇、特別劇）
（11）余亦琛／ 《陽關道》／Netflix
（21）家其／《鮮浪潮．語2018 － 艷陽天》／ViuTV
（28）謙／《那些年 那些歌 II － 何韻詩篇：覺醒》／港台電視31
投票表格：https://goo.gl/forms/XOwz1RxA3nav9OrX2
男配角獎（迷你劇、單元劇、特別劇、網絡劇）：
（37）多春魚／ 《VR驅魔人》／ViuTV
投票表格：
https://goo.gl/forms/VjOWLsY7SOd8BBQ23
（01032019）
＃游大東 ＃游大東影視筆記 ＃tvawards2018 ＃100毛 ＃專訪時間 ＃舊文重推 Dumb Youth 岑珈其 王貽興 Whatasunnyday ＃陽關道 ＃vr驅魔人 ＃港劇 快樂的 Lam yiu sing 林耀聲 Heiward Mak 麥曦茵 Wong Yat Ho 黃溢濠
余亦琛 在 無題 的推薦與評價
尋日有單新聞唔知點解令我內心深處覺得好奇怪好唔自然，我嘗試講出嚟純粹令自己覺得舒服啲。 From the video description. New. Including results for: 余亦琛 Search ... ... <看更多>