第六回－－鐵達尼號的準備
任務尚未完成，呢個消息對於劉俊文講有少少驚訝，但其實佢都有懷疑過會唔會咁簡單就通過，始終係地獄級難度。
「系統，通過唔係單單睇完全集就可以吧？」
【對的，通過與全數睇完無直接關係。】
「即係，睇一集都可能會通過，睇十次都可能通過唔到？」
【對的，宿主請努力找出通過方式。】
「因為對方無完全認同我對呢種興趣嘅融入？」
「係。」呢一聲打破左劉俊文嘅提問，李倩盈步入廚房倒水，若無其事咁回答佢呢條問題。
係劉俊文入廚房時，佢係廳完經同系統確認左，任務尚未通過，如佢所想，因為系統都無李倩盈清楚自己到底有冇認同劉俊文進入自己興趣。
「你做嘅，只係陪伴，甚至連陪伴都未算，更何況係進入呢？上次滿唔滿足嘅教訓，睇黎我同你都刻意無視左，有好多野，係無得呃嫁。」李倩盈飲完水順便換水煲水，順手賺下積分。
「……咁你……到底要我點做你先會滿意？呢個問題我係真心問你嘅，我睇下點去配合你啦……」
「唔駛喇，你根本就唔喜歡睇韓劇，如果係美劇你喜歡嘅，我都仲有少少信心你可以達到一齊睇呢個目標，但來自星星的你……算啦，你執著嘅位係，點解男主角係外星人，點解佢有咁嘅超能力，點解男女主角要咁收埋自己，唯獨係無好好欣賞佢哋嘅愛情故事……我降低左自己嘅要求，我唔要求你得到同我一樣嘅感覺，只係要求你靜靜咁陪我睇，你做到嘅，但原來我心底，個要求無降低到，所以你都係未做到我想要嘅野，所以話呢個系統，真係唔易呃。」
【宿主請緊記本系統為最高智慧造物，以兩位宿主程度要欺騙本系統機會近乎零，本系統亦忠告宿主，就算你可以欺騙本系統，同時亦係欺騙緊自己，無乜比欺騙自己更難受，因為心底中你好清楚問題仍然存在。】
「係喇係喇，系統你最勁，不過都好嘅，我放棄左，劉俊文，既然你進入唔到我嘅興趣，我認命喇，迫你都無用，但估唔到唔迫你竟然得到系統獎勵3000積分，我嘅頭等艙分數已經達標，跟住落黎家務就靠你喇！」
「你……哈哈，實不相暪，我都得到3000積分喇，睇黎你同我一樣，唔迫大家融入自己興趣，其實我都無諗住你可以融入到我嘅遊戲世界，要你玩英雄聯盟，真係諗下都覺得恐怖，我寧願呢段時間靜靜哋自己打下機，享受下最後嘅遊戲時光算……」
「喂，你以後都無得打機，咁真係好咩？打機幾乎係你食煙以外嘅興趣，你無得打機，會唔會痴線啊？」
「有乜大不了，唔打機姐，咪睇下書囉，養下魚囉，再唔係睇下人打機都可以。」
【宿主請留意，有關興趣抹殺，宿主將對該興趣完全遺忘，就算你睇人打機都會覺得無聊，唔存在任何替代形式，到時放部機係你面前，有人係你面前玩都好，你都唔會感興趣。】
「真係夠晒徹底，系統你夠晒勁，咁……依家我哋夠晒分，你想先解決任務，無論係成功定失敗都好，定係去左鐵達尼之旅先？」
最後夫妻決定，先去鐵達尼，話唔定係鐵達尼之旅會有新嘅睇法可以幫忙任務，順便可以輕鬆一下。
【成功換取鐵達尼號之旅頭等艙，宿主可以隨時決定出發，提醒，抽獎世界的時間流動與現實不同，宿主進出只係一瞬間，宿主進入時間為船於英國皇后鎮開出時，系統安排之身份為瑪格麗特．布朗的養女以及其丈夫。
成功通過條件：見證鐵達尼號船體完全沉沒。
支線任務：？？？？？？？？
完成度獎勵：S級獎勵－？？？？？？？；A級獎勵－海洋之心；B級獎勵－1898年傳奇年份法國紅酒一箱；C級獎勵－鐵達尼號餐廳高級餐具一套。
失敗懲罰：無
由於宿主是第一次進入抽獎世界，特別提供新手提示：
一，宿主不能提出任何關於系統之訊息予劇情人物，違反者積分清零
二，宿主可於任何劇情時段提出回歸，結算將以回歸時段完成度計算
三，宿主面對死亡之際，系統將強制宿主回歸，即時進行結算
四，宿主完成任務後一小時內將被強制傳送回現實世界並進行結算
五，宿主每人可攜帶手提行李箱，箱中的物品會同時傳送，注意，超越時代的科技產品嚴重影響劇情可能會被禁止使用，所有攜帶品於任何完結後離開身邊三米範圍內不會被傳送回現實世界
六，宿主不能攜帶任何劇情內的物品離開劇情世界
七，宿主自行改寫劇情有機會嚴重影響完成度
八，宿主於劇情內擁有現實世界所有感覺，包括死亡及受傷之傷感，請宿主小心
九，宿主於劇情內擁有系統提供之全面翻譯，不需考慮語言問題
十，宿主於劇情內將不能與系統對話，系統只會單方面發佈訊息
抽獎世界的任務和獎勵條件，宿主並未有權限查閱，請宿主努力升級，系統貼心先行回答宿主準備發問的問題，感激的話可以給系統打賞積分。
最後，希望兩位宿主可以享受抽獎世界，感受鐵達尼世界的愛情。】
實在太多訊息量，兩人無諗過抽獎世界都會有條件同任務，雖然無任何懲罰，但完成度獎勵上面嘅海洋之心……亦即係鐵達尼號整套電影入面嘅主線寶物，竟然都只係A級獎勵，唔講太多，就算係C級獎勵嘅餐具，如果放係現實世界都係無價之寶。
問題係，到底完成度任務係咩？點先可以得到完成度？而充滿問號嘅支線劇情又係咩？
【宿主請享受旅程，完成度計算方式雖然宿主並無權限查詢，但系統再次強調，好好享受旅程，有助增加完成度。】
當晚，劉俊文同李倩盈重睇左一次時長三小時十四分鐘嘅鐵達尼號，作為經典中嘅經典，無論之前睇過幾多次，重睇都會令人為之感動，李倩盈更差唔多用左半盒紙巾。
「你話，如果我哋係鐵達尼號撞上冰山之前通知船員，可唔可以改寫到佢沉沒嘅結局呢？」
「你諗都唔好諗啊……你唔記得成功通過條件係見證佢沉沒咩？如果我哋改變劇情令佢沉沒唔到，即係任務失敗，更唔好講咩完成度啦……」
「但……1514人罹難……」
「呢個係佢哋應有嘅命運……更何況，呢個係電影入面嘅世界，我哋插手令劇情改變，係現實都唔會救到咩人。」
「咁如果我哋救返傑克，等佢同露絲可以有情人終成眷屬呢？」
「唔……如果都係沉，但救佢嘅話的確唔會令任務失敗，問題係，故事之所以動人，係因為傑克佢犧牲自己救到露絲，假如我哋救左佢，露絲會唔會被家族迫佢嫁俾人渣比利，又或者其他富豪呢？而係災難之後，佢哋兩個真係要面對現實，又會唔會可以走到落去？我覺得，我哋可以就呢個問題再考慮下，到時，真係忍唔住想救，我都同意嘅，見步行步啦。
如果我哋打算聽日出發嘅話，今晚我哋就要好好研究成套戲嘅劇情，人物關係，船嘅結構，同埋計劃好係呢段旅程入面我哋想經歷嘅事……仲有啊，物資都要買定，同埋要執好行李，我查過由皇后鎮出發係四月十一日，撞到冰山係四月十四日嘅夜晚十一點四十分，到十五日嘅兩點二十分正式沉沒，我哋當中只有完整三日多少少時間，到最後撞到冰山時，就有太多控制唔到嘅事。」
「唉……你份人真係……明明一段浪漫嘅劇情，比你講完我覺得好似仲辛苦過返工……其實順其自然唔得咩？」
「其實有計劃我哋先可以做到自己想做嘅事，難聽講句，你要救傑克都要準備，你兩手空空去到，到時你想救都救唔到，咁又係好事咩？你份人就係太隨意！仲有獎勵呢？連A級獎勵已經係海洋之心，隱藏嘅S級獎勵係咩我真係唔敢想像，到底有咩比起海洋之心仲有價值？你唔想知咩？你唔想要咩？要就要準備啦李小姐，我一個人真係做唔到咁多準備，麻煩你都俾心機幫手好唔好？」
「得喇得喇，我知你講嘅都係無錯，我準備得未？」
經過一日嘅準備，兩人深呼吸一口氣之後，終於同系統確認：「系統，我哋準備好進入鐵達尼號世界喇。」
【正為宿主開啟鐵達尼號世界，倒數五，四，三，二，一……】
－－－－－－－－－－－－－－－－－－－－－－－－
下回預告
正式進入鐵達尼篇，一個電影故事對於夫妻有咩啟發，點解系統要安排呢個獎勵比主角？
救唔救？支線劇情又係咩？完成度又可以點去完成？
主角們整理好既計劃又係點？
歡迎大家進入最經典既愛情世界，鐵達尼號
－－－－－－－－－－－－－－－－－－－－－－－－－－－－－
作者的話：
第六回終於有個大轉變，正式進入電影世界，比起前作《老婆》，今次架空既故事有更多空間發揮，我唔想不斷用錯誤同醒覺去編寫故事，因為我知你地開始有個感覺係，估到我個套路係點
讀書個陣有個老師教過我，錯誤可以令人成長，但睇別人既錯誤都可以，睇別人成功都可以，今次我將會用一種經典愛情同大家探討兩性關係
希望大家喜歡
－－－－－－－－－－－－－－－－－－－－－－－－－－－－
我既文字係免費，但免費既通常都係最貴，一個無實際經濟支持既作者並唔會長久，所以希望喜歡我既文字同故事既朋友可以支持我，購買我既書本：
訂購我過往的作品，連結如下
https://bit.ly/3fL9QUH
由於最近比較忙，需要周末先可以處理訂書，希望大家見諒
來自星星的你分集劇情 在 小宅戲劇週記- 來自星星的你結局... - Facebook 的推薦與評價
自星星的你分集劇情,來自星星的你結局,來自星星的你劇情,講述外星男子度敏俊從外太空來到400年前的朝鮮並一直生活到現代,在和身為國民頂級女演員的千頌伊陷入愛情的 ... ... <看更多>