一，「真係新官撞肺炎呀！」好，講完爛 Gag，講正經嘢。
二，政府換人，又點喎？我聽最多人講：「梗係有人做錯嘢大懲罰喇！你睇，佢哋個個都好唔情願咁樣。」
三，各位同學，今日想同大家講一個道理：「任何華人機構，由私人企業到政府，default option 係唔會炒人；人情味呀，明唔明？今次做得唔好，畀多次機會囉。」
四，咁，點解會有呢次人事調動嘅？首先，大家要搞清楚一個概念：「特區政府是甚麼？」
五，「係傀儡，你講嘅！」Bingo，證明大家有聽書。咁，傀儡政府又有咩特點？
六，「聽話囉。」咁就梗㗎啦，有邊個司局長唔聽話？介紹係識下？唔會有。所以，今次被免職嘅幾位，唔會係唔聽話。
七，「講錯嘢？得罪人？」無錯，人治社會，呢啲都係表面嘅死因；但，如果極高層 like 你保你，真係你做乜都冇事，加官晉爵冇難道。
八，又唔係忠誠有問題，又唔關能力事，咁係咩原因呀？點解有啲人會被極高層睇中，又有啲人會不自覺地被貶官嘅？
九，先講返傀儡政權。大家記唔記得當年好奇異地將環境局拆出來？又記唔記得思歪出盡九牛二虎之力都要搞創科局？政府好重視環保？定係好關心創科？唔，好，傻，啦。話說 2006 年「十一．五」開始，香港被規劃；當年胡溫要搞環保，咁咪整個環保局去同上頭交代：「我哋有做嘢㗎！」
十，與此同時，政制事務局亦係呢轉變成「政制及內地事務局」。其實一早就有「9＋2 一小時生活圈」呢啲講法，亦係呢期撥款起港珠澳大橋同高鐵。中港融合嘅計劃，咪就係呢期囉。
十一，創科局，亦如是。當年「十三．五」話要科技興國，咁你思歪跟得咁貼，唔係唔做嘢下化。
十二，今年係「十四．五」，傀儡點都要有啲部署。被免職嘅有（1）民政事務局劉江華（2）創新及科技局楊偉雄（3）公務員事務局羅智光（4）財經事務及庫務局劉怡翔；（5）剛剛瀨晒嘢嘅政制及內地事務局聶德權就平調去公務員事務局，政制及內地事務局就搵個入境處處長去做。
十三，假如話有鑊氣，即落鑊，聶德權又點會留低？再講，要炒，大把人名要交，交得幾多個？「睇佢同林鄭關係囉？」如果你咁諗，即係 imply 林鄭坐得好穩，做埋下一屆都冇問題。（都唔出奇）
十四，我就好正路咁，從一個大機構嘅正常規律去諗，其實接手嘅呢班人，個個都一早收到 briefing，知道自己要做乜。至於畀人郁嘅，可能知啲唔知啲。打過大機構工嘅朋友，應該會明。
十五，接手政制及內地事務局嘅曾衛國淨係話會：「加強推廣憲法同基本法既宣傳教育。」有少少流。不過，佢之前坐入境處，除咗大陸各級政府嘅關係，亦一定有高級別嘅 security clearance ，做政制及內地事務，啱㗎喇。
十六，接手民政嘅徐英偉，就話「在體育等方面有很多工作要做，涉及很多機遇⋯⋯」有趣。係嘅，大國嘅軟實力，都真係要搞呢啲所謂體育盛事，好似08京奧。咁香港當然冇得搞得好大，但我估來緊大陸會有唔少國際咩咩賽之類，咁香港點都要支持下。至於運動員，可以去到世界級嘅，一定會啲光環，都係國家任務之一。
十七，接手財經事務及庫務局嘅許正宇話：「鞏固香港國際金融中心的地位出力⋯⋯在香港作為集資中心的基礎上，強化資產管理業務，以至用好聯繫內地及國際的特點，做好創新科技的金融科技同綠色金融的方向。」重點關鍵詞係後面個部分：創科、綠色。佢咪坐過金發局嘅，呢啲叫鋪排，明唔明？
十八，接手創新及科技局嘅薛永恒就話：「未來會多與業界溝通，同時加強協作及人才培訓，期望做好本港創科研發、商品化及推出巿場的工作。」佢似乎好強調人才，嗯，邊度嘅人才呢，呵？佢亦都有講：「透過本港金融巿場體制去商品化，到世界巿場包括大灣區以至歐美⋯⋯」大概都睇到佢條路。但正如我今日專欄寫，機電工程署係香港兩個用 trading funds 去經營嘅部門，我諗政府眼中，科學園、數碼港同應科院之類，都好似 trading funds 咁管，好似係，除非唔係。我估佢同許正宇，係一個組合。
十九，最後，就係聶德權。陰公豬，佢見記者都仲被人追返上星期啲嘢，又畀人影到手震；好似未驚完。公務員事務局，係官僚之首，公務員嘅組織部部長喎。2019年嘅管治危機，有公務員都表態，無論羅智光係咪因此 Motorola 並唔係重點，而係接手嘅點樣去做到「好好睇睇」。公務員，理論上佢冇犯法冇嚴重失職，一切都有規有矩，但係你知啦，要玩一個人，有好多方法。組織工作部部長，真係好緊要㗎。之前傳要公務員宣誓效忠基本法，你可以話「形式嗟」，但係移風易俗都有個起點，好多時都有個儀式，就好似入啲咩會要燒黃紙斬雞頭一樣。
二十，仲有，大家可以留意下退落嚟嘅，之後會唔會有其他安排。正如之前所講，華人文化大機構嘅 default 只要係自己人，仲有利用價值，一定留啲嘢畀你。
