Search
今日要主持元朗區議會交通及運輸委員會，唔知會唔會又係最後一個主持嘅會議。今日邀請左屯門交委會主席 潘智鍵 Gary Poon同其他委員 張錦雄Kenneth Cheung 曾振興 Tsang Chun Hing 曾錦榮議員出席會議，討論屯門到元朗之間嘅區內交通。另外，委員會通過支持喺各個行人天橋同隧道加裝升降機，以至討論大棠路、大樹下東、西路交通意外、屯馬線通車同元朗、天水圍車位安排等議題。
身處咩崗位，都要努力撐住。記得10年前，人生第一篇報紙投稿就喺蘋果日報刊登，自此喺港蘋同台蘋寫嘅文章應該有幾十篇。希望蘋果各位朋友都可以撐住。
作為元朗區議會交通及運輸委員會主席，我嘅責任就係要協調好區內唔同嘅交通運輸相關事宜，其中一樣重要嘅工作就係道路工程方面嘅協調。元朗市嘅交通流量繁重，封每一條路進行工程都牽涉到唔同政府部門同單位嘅意見，因此協調嘅角色非常重要。
今日，我就聯同麥業成議員一齊同路政署、運輸署及元朗警區交通部開會，到建樂街落場實地視察未來工程嘅方向。由於工程牽涉到重舖路面同擴闊路口，就需要封路兩三個月進行工程，會影響到鄰近小巴站、油站、商場，亦可能會令車流堆積左喺某啲路口，令元朗市交通更為擠塞。相約唔同部門去傾，更加可以了解唔同部門嘅工作重點同難處，等工程可以回應到唔同部門嘅關注點，協助工程盡快上馬，盡早完工。我地就小巴路線改道、站位改動、工程封路規模、範圍，到臨時交通安排都有討論過，我地都希望以上意見能夠幫助部門盡快了解社區狀況，喺盡量減低影響之下安排工程開工。
民主派區議會順利過半，我地需要有新思維令社區嘅各項工程可以摒棄「山頭主義」、「成功爭取」呢啲過時老舊嘅框架，反而應該從社區整體利益出發，同政府部門合作制定方案，喺工程期間就監察工程進度同質量，再向居民匯報。
我之前亦同路政署就元龍街路面重舖工程進行交流，佢地表示由於工程牽涉到Yoho Town出入口，所以施工難度就更高。喺嚟緊嘅交通及運輸委員會會議，我會入議程要求路政署向議會提交元朗區路面工程嘅清單，運用主席嘅身份協調唔同部門、當區議員之間嘅溝通，理順工程難處同制訂進度，由社區層面出發落實唔同有利民生嘅工程。
呢張圖係出自東方日報，證明呢啲民生事只要係合理嘅，不論邊間媒體，大家都會一齊爭取。我相信各大媒體嘅報導，再加上街坊聯署、議員力爭，對成件事最後結果逆轉，由批一半路線到批出絕大部份路線，都係有重要作用。
運輸署已知會元朗區議會交通及運輸委員會，除左B1外，九巴喺元朗區之前提出會分段收費嘅路線全批，包括63X、68A、68X、69M、69X、268X、269B、269C、269D、276、276A、276P，另外再加268B、268C，連埋屯門區58M、58X、260X，一共十七條線。
終於元朗-天水圍-洪水橋-屯門都有齊巴士雙向分段收費，唔使等輕鐵出入大西北啦。
未來我地全區同事一定會繼續爭取區內巴士線，徹底打破港鐵壟斷新界大西北地區交通嘅局面。
感謝每位參與行動、聯署的街坊同區議會同事，尤其係交委會副主席、巴士服務工作小組 洪福陳樹暉 Chan Shu Fai議員！
#元朗民主派共同合作成功爭取
#民主派共同政綱成功落實
#繼續努力打破港鐵壟斷
東網報導：
https://hk.on.cc/hk/bkn/cnt/news/20200704/bkn-20200704000100535-0704_00822_001.html
