【空有熱情而缺乏才能還是會一事無成：米澤穗信《愚者的片尾》】
#推理
大家有無聽過《冰菓》？唔睇毒nan2野？咁〈古籍研究社〉系列呢？係咪即刻有返推理小說嘅感覺（好似係）？
不知不覺《冰菓》動畫已經結束左6年，但佢嘅原著小說〈古籍研究社〉系列雖然寫得好慢，其實一直有持續出版——當然啦，佢本身係推理小說嚟架嘛。佢嘅新作《遲來的羽翼》嘅繁體中文版亦已經係今年2月出版左嚕。
如果你以為米澤穗信寫嘅，只係一系列普通嘅校園推理故仔，咁你就錯了。《古籍研究社》系列唔單止推理做得出色，每一本書都有明確而有深度嘅主題，最值得講嘅就係第2本書《愚者的片尾》。無論係喜歡動畫的觀眾，抑或純粹鍾意推理嘅讀者，都好值得睇睇原著小說架！
▍係推理小說入面，推理一部推理電影的結局
米澤穗信嘅〈古籍研究社〉，最特別之處就係入面無人死。一般推理作品，死人甚至死一大班人都係基本功，但〈古籍研究社〉嘅作品係唔會死人嘅。喂，阿哥，其實咁先真實啊，日常生活中又邊有咁多詭計同殺人事件呢，你估個個都係柯南同金田一咩？
《愚者的片尾》嘅故事，就係講述主角一行人，受邀協助推理一部未完成嘅推理電影嘅結局：寫故事嘅編劇，因為病左而無辦法繼續將結局寫落去，但推理電影又拍到一半，無人知結局點收尾；而照道理解迷所需嘅元素已經拍晒出嚟架啦，但邊個可以由電影開頭提供嘅線索，推理得返個結局出嚟呢？
《愚者的片尾》嘅主題，係對「推理懸疑」呢一種類型文學本身嘅探討。作者透過3個角色口中嘅推理，講述左佢地對推理嘅想像：既可以係美式嘅硬派偵探劇，亦可以係詭計唔夠出色嘅本格推理，甚至係《猛鬼街》類型嘅怪人大量殺人故事——係唔同人眼中，推理呢樣野可以好多元，同一個開頭可以有好多唔同版本嘅結局。
主角們逐一推翻錯誤嘅推理，同時間反思唔同嘅推理類型，最終得出自己嘅結論——但呢個又係咪正確答案呢？又，正確答案本身係咪存在？想知實情嘅話，不如睇睇《愚者的片尾》本書啦。
▍空有熱情而缺乏才能還是會一事無成
你可能會話，邊有可能劇本都仲未完成，就成班人走去拍戲？當然好少人會咁做。作為故事核心嘅果套推理電影之所以會拍得咁狼狽，正因為製作團隊全部都係外行人。但咁樣，就正正帶出左《愚者的片尾》真正嘅「裡」主題：探討「才能」本身。
正因為電影係由一班空有熱情，但缺乏必要技術嘅人嚟拍攝，結果自然好難成功；故事入面3個配角由自己角度出發，推理出電影「結局」，並且認為自己嘅觀點就係正確答案，亦因為佢地缺乏推理才能但滿懷信心，只識得一直向前衝；正當主角「千辛萬苦」咁破解左迷題，先發現自己比人玩弄於股掌之中，更開始反思自己係咪真係有才能……
故事想帶出嘅道理，就係「空有熱情而缺乏才能，都係會一事無成」。呢個命題某程度上都係〈古籍研究社〉系列嘅一貫主題之一，雖然聽落好灰暗，但有時要認清呢個事實，人先至會得以成長，否則只會空有無限自信，但一直困係自己嘅想像之中，結果落得一事無成。
▍又係講包裝？成功全賴京都動畫助攻
就算到咗2016年，《冰菓》仍然可以係投票中成為「京都動畫」歷年來最受喜歡的TV動畫第一名，可見佢嘅受歡迎程度。而且，2017年仲推出左真人版電影添（係日本），分別由廣瀨愛麗絲（東海堂果d日文錯晒嘅蛋糕廣告上面會見到佢）同山崎賢人（拍嚟拍去都係動漫改篇電影果位）主演，好似好 #出色 咁？
不過，係京都動畫改篇呢部作品之前，又有邊個估到〈古籍研究社〉會咁成功呢。要講明嘅係，〈古籍研究社〉系列係米澤穗信2001年開始寫嘅系列作推理小說，改編做動畫果陣，就攞左最多人識嘅第一集嚟做系列名，所以先會變成左《冰菓》系列。
同類情況其實經常發生，唔通你以為《權力遊戲》（Game of Thrones）個系列叫「權力遊戲」嗎？梗係唔係啦，人地本書叫《冰與火之歌》（A Song of Ice and Fire），系列作嘅第一本書先叫《權力遊戲》之嘛～
雖然〈古籍研究社〉系列第一本作品《冰菓》攞左唔少獎，但去到第二本《愚者的片尾》，銷量已經大跌，搞到隔左好耐先出到第三本書。本身台灣出版界甚至無引入呢個系列添，假如無動畫化嘅話，大家連書都無得睇。
2012年，《冰菓》動畫化非常成功，當中最大功臣，其實就係動畫師、人物設計師西屋太志。佢負責左《冰菓》動畫化計劃嘅角色設計工作。結果，《冰菓》就爆紅左，由本身無乜人識嘅推理小說搖身一變紅遍中港台嘅動畫作品。
講到底，人類都係膚淺嘅。故事寫得再好，女主角醜就無人睇；女主角畫得靚啲，整埋做動畫之後，就可以瞬間爆紅，連帶小說都紅埋。動畫救小說，就係咁簡單。
（講係咁講姐，當然個故事都係非常重要架啦。）
買書呢邊，博客來傳送門
愚者的片尾 (動畫書衣版)：
http://www.books.com.tw/products/0010546676
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
