《真係驚收水?》
今日市跌,大部份人都歸咎內地出咗個好數據,消費者價格指數(CPI)重返正數,即係通脹重臨;出廠價格指數(PPI)創兩年黎嘅最大升幅,反咉經濟重返升軌。市場因為咁而驚銀行收水,諗真其實好反智。經濟好,企業盈利好,股市就自然好。身體好喇,仲洗乜驚冇白粉食?!
我相信大家都明我講咩,但唔通個市就唔明?其實唔係。人人都話驚人行收水,唔通個個都覺得人行會收水咩!其實大陸嘅出廠價升,潛台詞係:佢而家都仲係好多產品嘅出口國,產品加價,即係意味住美國要捱貴貨。到時輪到美國嘅通脹升溫,咪又好似三月咁,驚聯儲局收水。
下面幅圖我唔解釋喇,大致就係講緊上面嘅嘢:大陸牽一髮,動世界嘅全身。至於你問我大陸嘅通脹係咪會持續?我會話出廠嘅價格高,係源於來料嘅價格升,近月有份炒銅、炒鐵嘅人自然會明。但你都唔洗替美國佬擔心,因為美元嘅反彈又有助入口嘅成本減輕,總之就好複雜。
總括而言,其實無論係人行抑或係聯儲局都唔會有條件/願意响短期內收水。就算人行想𢲡緊啲銀根,都可以選擇食麻辣粉(MLF)酸辣粉(SLF)又或者定向降準,總之就唔會一刀切。簡單講,今日跌市嘅原因根本唔成理由。跌浪嘅反彈未完,大家開開心心過週末,下週再戰!
👋🏽
#國內通脹重臨 #出廠價格大增 #人行可能收水
Search