//支持本page請Click入內文比Clap，Medium會員請直接Click入去睇內文，謝謝！//
10月31日係有雙重特殊意義：除咗831兩週月嘅悼念日，亦係萬聖節──雖然一邊係悼念一邊係慶祝好似好矛盾，但呢個亦正正係香港嘅特色：從來無人強制你去悼念，每個人都可以有自由去過自己喜愛嘅生活。甚至乎即我對萬聖節係毫無興趣、亦從來唔會去蘭桂坊慶祝，但萬聖節扮鬼湊熱鬧依娃鬼叫，但我仍然認為呢個節日經已成為同香港密不可分嘅一部份。
然而往日呢個華洋共慶嘅節日卻變成政府眼中釘：唔單止今時今日任何有機會聚集大量群眾嘅地方，響殺紅了眼嘅警方心目中都變成非法集結，而萬聖節大肆變裝、扮鬼扮馬嘅傳統，就更加係變相挑戰《反蒙面法》嘅權威。
於是響兩個過往萬聖節人群聚集嘅地區，彌敦道同中上環，防暴一早就已駐守重兵，然後就假借少少衝突作為藉口，進行全面鎮壓──即係有班廢老KOL事前仲苦口婆心警告千祈唔好響蘭桂芳搞抗爭，如果唔係就會發生人踩人慘劇云云；失智老人KOL我而家就同你講，而家班差佬根本係唔會令有無抗爭者聚集，而係只有人多聚集佢地就會定性為非法集結，仲講乜9「千祈唔好激嬲警方」你係咪傻X咗？
意料之內，蘭桂坊最終就係比防暴全面進駐，再響中環施放催淚彈，然後再用胡椒噴霧對仲響狹窄街道，擠擁而難以散水嘅一般市民同記者以行刑式噴射，最後再順便用警棍亂打一通兼夾拉幾個人祭旗，即係如果仲有人覺得林鄭打算出賣同整肅警隊，就只能夠話佢地天真到無可救藥──而家警察最多都只係會因應公關考慮，減少一啲太肉酸嘅場面而已，警察對香港嘅軍管權力，仍然係毫不動搖。
雖然旺角、油麻地彌敦道一帶同樣係遭受警方類似嘅對待（除咗一貫嘅催淚彈放題，尤其係胡椒噴霧，今晚真係好似無唔駛錢咁，係又射唔係又射），但蘭桂坊從來被認為係一個同警民衝突無關：你警察而家為咗要立威，就係要響萬聖節呢個有大量外國人參與嘅日子取消呢個Demilitarized zone，先唔好講好多蘭桂坊酒吧經已比你實行地鐵宵禁、之餘仲要提早拉閘生意暴跌５成，就算有李嘉誠果6皮嘢都補唔番；
今日你禁得萬聖節，下一步係咪禁埋聖誕節？往後又係咪所有有機會聚集人群嘅節日慶祝你都要禁埋？即係一個唔能夠慶祝節日嘅香港，你仲住得落去嗎？
另外，太子站作為831嘅悼念地點，響1031當然唔會少得警察嘅關照。除咗一早已將太子站用水泥鐵板圍封到成個切爾諾貝爾石棺材咁、當晚又長期駐守「石棺」外圍，禁止市民前往悼念之餘，仲派人將上面嘅鮮花全部撕毀！當然你係可以堅信831果晚無死人，正如亦有人堅信耶穌無出世一樣，但將人地悼念物品整爛係咩心態？你有無尊重過人？因為你揸住警棍所以你就有權踐踏其他人那怕係最卑微嘅悼念？
最後仲有一項極其離譜嘅新聞響同日發生，但無乜人提，就係法庭頒佈臨時禁制令，禁止Telegram Group同連登發放鼓吹暴力訊息。即係起初有建制派話要禁網禁連登，全世界都只係當笑話看待，即係你點會估倒政府係癲到堅係會做？然後你甚至可以進一步猜想，究竟目前特區政府係由一班癲到咩地步嘅人話事？
要禁連登本身經已係一個大笑話：好笑在從來連登最多嘅都係散水Post，每次遊行集會前總有鬼帶風向話「勇武今次要退場讓路比和理非」、「今次遊行大家唔好上Gear比藉口防暴」，唔係燒山都唔會成日引連登留言黎叫人同勇武割席啦！
而家都先唔好講連登個Server經已搬咗去外國，你個禁制令可以點執行？咩叫「鼓吹暴力」？你有咩定義去話一個留言係「鼓吹暴力」言論？我為一單私了新聞讚好算唔算「鼓吹暴力？而家係想玩白色恐怖定係破壞法治精神？但最重要嘅卻係，網上9噏從來都係香港最重要嘅核心價值，而家你連呢樣嘢都要限制埋？
即係去到今日，真係唔好同我講咩「因為無反對通知書，所以我唔敢上街」、「我有家室又有一家大細，所以我只能喊住睇電視直播」；就算比你保住條命、保得住你啲身家性命財產，結果換黎一個再無蘭桂芳扮鬼、網上無得9噏嘅香港，又有乜嘢意義？
而家唔係下下要你上街擲汽油彈，但係再一次反思自己響呢場抗爭入面有無盡力，有無因為自己嘅懦弱同偽善走去拖勇武派後腿，卻係呢場抗爭嘅最低消費。
切爾諾貝爾石棺 在 新石棺- Explore 的推薦與評價
【#切爾諾貝爾 #新石棺】巨大的圓拱形外殼，被稱為「新石棺」的新遮蔽結構體（New Safe Confinement, NSC），覆蓋著正是三十多年前一場核事故的發生點，切爾諾貝爾 ... ... <看更多>