【龔成問答信箱】(Q21041-Q21060)
Q21041:
老師,比亞迪電子
由幾個月38.8買入到而家冇放到
近期回到接近我買既價
我想知我應吾應該繼續持有
由60見到佢跌到而家
個心好累
係咪我太貪心以為佢會繼續升
定係e個就係價值投資要經歷既過程?
龔成老師:
其實買股票,是好正常的,我隻1211,10年前,都由$10上到$88,跌翻去$12,之後先慢慢上,睇住自己身家幾百萬上落(當時我仍打緊工,$1萬人工)
成功投資者,就要有好強的心理質素!
我是睇「長遠企業價值」,而你就睇「短期股價」,所以你要學懂唔睇短期股價。
285有潛力,你可長線,但如果你心理壓力太大,不如轉其他股價無咁波動的股。你預左買潛力股,一定會這樣的。
------------------------------------------------
Q21042:
龔sir,另外想問下你對2380的睇法,這股票有8厘息,但上年除淨後股價跌到1.4,應該繼續持有收息還是先賺錢呢?
龔成老師︰
中國電力(2380)有質素的,可以長線投資。但要留意,中國的電力市場與香港的不同,香港的,有利潤「保障」協議,助電力公司賺穩定的利潤,但中國的,電力價格由國家主導,電力公司處被動位。
受燃料成本,以及國家主導的因素影響,中國電力過往的收入略有波動,而盈利亦有不穩影響。國家會給電力公司「合理」的利潤,但不會過多。
你用佢收息係可以,但要留意佢股息率雖然高,但都會有一定波動性,故不宜持有過多。
------------------------------------------------
Q21043:
龔sir你好,留意左你專頁一段時間,亦開始讀你的著作,十分同意你的投資理念,作為投資新手唔想行咁多冤枉路,所以果斷報了你堂。
我現在28歲目標係若干年後,靠收息+工作每月有十萬蚊收入,唔知會唔會太大想頭呢?
另外我想請教你點睇用桿槓買REITs呢?我見坊間有導師會教學生襯現在低息環境,借槓桿買REITs買債等相對穩定和低風險的投資產品,回報可達10厘以上,唔知你又點睇呢?
謝謝你的回覆,期待上堂親眼目睹龔sir的廬山真面目
龔成老師︰
借錢槓杆這個方法,賺錢時候你會加倍,但損失架時候同樣會被放大。風險唔細,唔建議你用。
除非出現「明顯的投資機會」,才考慮利用借貸投資,否則,有機會出現賺息蝕價的情況,小心。
我地投資一般期望合理回報係每年10-15%,如果想做到收息+工作收入加起每月有10萬現金流(我先假設你每月收入有5萬來自工作 + 5萬來自股息)。以股息率5%計,你需要本金1200萬。
你可以用上面架計法,大約推算要達至這個目標,所需要架總資金和時間。
上堂見!!!
------------------------------------------------
Q21044:
Hi 龔Sir,有事想請你比意見
現在同另一半租屋12500,住東九龍
男友是公務員,可申請綠表資格
想買返東九龍嘅居屋自住
二人每月收入共$60000
之前有睇過私樓,但因為我從事美容行業,近年疫情影響,銀行對美容行業按揭比較嚴謹,
所以我哋都偏向買二手居屋有政府擔保
近日睇咗鑽石山
以下都系13,14年樓齡,同一條街,
步行3分鐘到,港鐵站需要搭多一程小巴,或步行15分鐘
1,嘉峰臺 私人參建居屋屋苑
422尺實用,兩房 叫538萬
需月供 $23000左右
間隔不能大改動,感覺不太實用
2,瓊軒苑 單幢居屋
398尺實用,一房 叫438萬
間隔實用四正
需月供$18500左右
基本開支每月二人合共$28000
包括保儉,水電煤雜費,卡數,交通,食飯,電話費,寬頻
我地手持大約流動資金有$65萬
股票有$30萬
所以會做95%按揭,25年供款
想睇下老師比d意見
會揀選屋苑定單幢
龔成老師︰
以你地的情況,買居屋的確是較好選擇。
2間物業位置好近,交通、生活配套、地區發展、落成年份、尺寸等條件都好相近。
屋苑的價值,雖然比單幢樓高,但見兩者呎價都有更段差距,因此要思考值唔值得。
嘉峰臺相對貴成100萬,除非有其他原因(例如預將來會有小朋友,要留定多間房),否則應該瓊軒苑較好。
因為大家質素相若,但瓊軒苑可令你節省近100萬,用作投資增值,長線會對你較有利。
------------------------------------------------
Q21045:
你好, 有問題想請教。
有一層自住樓,幾十年前買斷了。
我地一家三口 為照顧老人家搬咗返去同住。
我係一個從來無買過股票的年輕師奶,要照顧自己的小朋友 和照顧自己個妹的小朋友
也辭去護士的工作 做緊全職媽媽。
靠老公一份人工 生活普普通通。
可惜,自住樓日益老化,維修事項漸多,已投放幾十萬裝修,小朋友也漸漸大個,兩房樓也漸漸唔夠住
在這裡認識了你的專頁,想問問:
1. 想賣左層樓套現,利用套現的錢來增值財富。是否太進取?
2. 我為人穩陣,十分不喜歡炒炒賣賣,如何在這範疇中能平平穩穩地賺取回報,讓老人晚年生活得更舒適?
3.我喜歡文字,不怕閱讀大量資料,想認真地認識自己在進行什麼投資,不是人云亦云地買一兩個什麼號碼,有付出才有收穫 嘛!
4. 前路有點模糊, 請指點下。
註: 自住樓大約值 600萬
手拎零股票
有買 金粒的習慣 大約10萬值
買了兩份儲蓄保險單 給女兒 和年老的家父
龔成老師︰
1)唔建議賣樓。自住樓不應賣出。你換樓可以,但賣出自住樓就不建議。
其實,以你現時奬況,但長線計,你都要增值一筆錢,為換樓作準備。你可以用月供優質股,去做增值。
2) 投資股票,其實係希望買入一些優質企業,透過佢自然增長,達至財富增值目的。絕對唔係"短炒",只你要選對股票,並長線持有,就會有唔錯架財富增值效果。
你要做架事,就係先睇下每個月扣除開支後,有無多餘錢可儲。無就要睇翻有無支出可以删減,重點係每月要空出一筆資金用來增值。
你可以投資"平穏增長股" 和 "潛力股"。你先用每月5成儲蓄做月供,其餘先儲起,用一邊月供一邊儲蓄的策略。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
增長力較強的,可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)。但佢地波動性和風險會較高,你要自己平衡。
餘下的另一半現金,我地就等機會,當大市出現較大回調,就加大力度掃貨,然後作長線投資。
但由於你家庭靠老公一份收入,開始投資前,必需儲起一半約為半年開支的應急錢,咁會較穏當。
3) 你這想法正確,我地唔好對企業毫無認知之下,做投資決定。你可以先睇我寫架"80後百萬富翁"、"財務自由行"和"股票勝經",會適合你這類的初學者。
4)你現時每增加知識,並利用股票去進行財富增值,最簡單的方法是月供盈富。另外,如有需要就考慮換樓,但要視乎你地的資金、需要等。
至於金粒,都可以儲。但黃金主要係用來對沖突如其來架風險,所以唔洗多,佔總資產3%左右好了。
而"保險"只係理財中防守部份,只要買足夠保障就可以,增值可以留比優質資產(如優質股、物業等)去做,咁會較有效率。
------------------------------------------------
Q21046:
老師,我看到你的相“你是宇宙最大的奇蹟”
我都有留意 “吸引力”
入左一間公司做半年多, 同team兩個一開始共事既好同事都都走
一個辭職,另一個比人調組(調左一陣都辭職)
之後新來兩個同事 合作得暫時都一般,加野比我做
前日我又沖口而出話自己未必handle到咗多野,跟住佢地對的工作開始質疑,背後對我有微言
係咪我吸引左d負面野比自己
好擔心連份工都無埋
另外,前排可以左投資
買一手藍月亮,一手中國生物製藥
龔成老師:
吸引力法則是一個大方向,而在現實中,有好多變數的。
我地最重要就是自己有正面思維,往往會有好的事情發生,不過,現時仍是有野不是我地控制,你都要明白這點。
由於與你較友好的同事走左,所以你產生左一些負面想法,強加在新同事裡,不如你試下改變對新本同事的睇法,改善大家關係,否則會出現惡性循環。
至於你持有的兩股,有質素的,不用太擔心短期股價波動,持有一手無問題的。
------------------------------------------------
Q21047:
龔sir,你好,我都有啲概念野唔太明,股票係買賣,買/賣要有人接貨先叫成交,照計買賣既金額應該係一樣,咁點解D沽空既金額唔係成交既一半既?
龔成老師:
因為沽空不是正常的「賣出」,是一些無貨的人通過證券行借貨,先賣後買,因此要特別申報的。
------------------------------------------------
Q21048:
老師 我真係好迷茫 唔知應該點行 希望你能夠以過來人身份指點一下我
我27歲 無大學學位 只係普通DSE畢業
依家有份工作 admin 19k 返10:30 放6:30 無晉升機會 但好安穩 基本上都一定唔會踢我走 但19K已經係頂盡唔會再加
最近收到一個HSBC既teller offer , 人工少左, 15-16K左右, 我應唔應該轉去做teller? teller既晉升機會大唔大呢..唔係好清楚佢career path係點
希望你能夠解答一下我既難題
龔成老師:
其實好簡單,你從長遠角度去想就得。
你比較一下,5年後,10年後,這兩份工對你有那些分別。
從長遠角度去想,到時的收入、事業、生活、發展等因素,那個較好,那個較近你的長期目標。
你原有職業,突破唔高,除非你懂得善用餘下時間及利用資金投資有理想回報,否則發展唔高。至於銀行,teller的發展唔算高,不過,算是好過你原有職業,因為有機會再轉其他職位,以及有機會令你將來更有動力轉工,慢慢上。從突破角度,轉工會好少少。
你最重要問翻自己,長遠想點?有這個答案,就知選那份工。
------------------------------------------------
Q21049:
成哥,請問我買1177一手
1)甘我比一手價錢,啲錢係比1177間公司定比左邊個?
2)當我用1000投資,買左這股,升到1300蚊我放左,甘賺果300蚊係1177間公司比我定邊個比我?
我想了解運作,謝謝你
龔成老師:
1)交易所是一個二手市場,你是幫「另一個股東」買的。
你平時見到的股價上落及成交,就是每天不斷在買買賣賣,即是貨由投資者A轉給投資者B,不斷轉來轉去。
2)你可以當現時,你比$1000,在二手市場買了一部手機,然後過了一段時間,以$1300賣這手機賣給了另一位買家。
------------------------------------------------
Q21050:
老師,我知道你不建議借父母錢買樓。
不過我男朋友屋企人預備左1百萬(現時做緊定期)俾佢,係預備俾佢大約3-5年左右買樓付首期。
男朋友既父母話唔係好識投資,所以放左係定期。
雖然我覺得自己唔係太應該俾建議佢父母,但我都想問老師
1. 100萬應該拎出部分作投資嗎?
2. 應該拎多少作投資?
3. 應該投資係咩方面?係應該以佢哋既年齡而投資收息股嗎?謝謝。
龔成老師:
如果這筆錢會在中短期,例如1、2年內買樓,咁就最好持有現金,不要投資,因為投資始終有上落,無人知你買樓時的投資市況,萬一股市下跌,就會到時唔知賣唔賣股票去買樓好。
如果在3年後先買樓,就可以動用這筆資金,最好是投資「收息股」+「平穩增長股」,唔建議面對太多風險,同時,投資金額最好在$20萬-$50萬,不要太多。
------------------------------------------------
Q21051:
Sir,我Q19941見你早前的問答,我好想分享,我前後睇樓差唔多一年了,由6百幾萬睇到7百幾萬,又因為已經橫跨成年,可負擔的樓價已經就快可以去到8百萬
我由尖旺單幢20年左右的舊樓2房,睇到半新樓1房,再睇到黃埔細兩房,再愈睇愈貴睇到黃埔靚景中型兩房,已經去到8百幾萬
如果買去買800萬的樓,我就要用盡晒我啲錢同埋要賣晒啲股票,要賣晒股票,我會好唔捨得
後來我有一日本身已經睇左大半日樓,見仲未算好晏,就walk in去睇一個九龍上車屋苑,佢無我之前睇既樓咁近地鐵,但其實都叫walking distance
搭小巴去亦都好快,平均成交價講緊3百幾呎細兩房係6百尾至7百頭,頓時覺得好平,而且比起我之前睇既黃埔新好多好多
同埋一直以為呢個屋苑唔係咁好,但睇完實物又似乎都係一個唔錯的選擇
所以我會建議Q19941的讀者在考慮800萬dream house時,都去睇下啲細價樓,睇下自己感覺如何
就好似我咁,我睇完呢個上車屋苑後,感覺好ok,樓價低啲,唔需要套現晒我啲股票,供得輕鬆啲,可以繼續月供咁上下的股票,成個資產分配又唔會側重晒在住宅物業上面
最後我都想講下我近月的感受,我發現有啲同樣想買樓的朋友,與一年前的自己好似,就係好中意網上睇樓,而好少落場睇實物
親身睇樓真係好重要,而且唔係要買樓前至去睇,而係日後都會想買樓時,已經要早啲去睇下樓,到真係急住要買樓住時,至可以好快決定到。
龔成老師:
多謝你的意見,我都會同佢講聲。
這是一個好好的分享。
而你所講的「睇實物」,這點好認同,我相信網上只是輔助,並不能變成主力,我地一定要親手睇樓先得。
都恭喜你,你找到了你的目標物業!
------------------------------------------------
Q21052:
sir,1337雷蛇點解你睇好佢潛力?
龔成老師:
雷蛇(1337)有潛力的原因,主要係佢發展緊的業務,都是潛力類,加上見佢財務數據等資料,應該過了最差時機,因此可能有轉機。
當然,佢本質好波動,盈利不足,所有的市值,都只是基於「將來預期」去產生,這個預期可以變得好快,因為大家都只是「估」。
同時,電競行業的真正營運模式,賺錢能力如何,充滿了未知數,一個遊戲可以好受歡迎,亦可以好快無人玩。
另外,佢近年都有發展一些新興業務,潛力度有的,但仍左有不確定性。
因此,這股有前景,但有風險,無人知真正的價值。而佢另一些業務較是較新興,同樣有危有機類,所以,佢有可能有潛力,但風險方面就要注意。
------------------------------------------------
Q21053:
龔sir 你好
本人35歲
現時持有以下股票,請問組合ok 嗎?
0005 - 2手 平均買入價$42
0017 - 1 手 買入價$41
1177 - 2手平均買入價$7.9
0175 - 2手平均買入價$30
0017 買入後一直下跌,但個人認為企業有質素,但增長確實太慢,甚至不停下跌,很有衝動賣出,應如何是好?希望收到你的回覆,謝謝
龔成老師︰
就算再優質企業,中短期股價都會有機會波動。原因不一定是本質出問題,可以係一些與其本質無關的因素。只要長線質素無變,中短期波動我地唔需要理會,長線持有就可以。
中生(1177)和吉利(0175)都係適合你,可持有。
新世界發展(0017)不錯的,本身有一定的規模,業務廣泛,從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。
但這類綜合企業,一般的增長力都不會太強,佢近年的生意亦只是平穩,你可以持有這股,但不要預佢有好大的增長力。因此不建議持有太過多。你暫時可持有,但不要心急加注。
匯控(0005)增長力一般,主要係收息,以你年紀,不宜持有太多。
------------------------------------------------
Q21054:
成sir 1883和3988各有一手,係當年招股時買一直到而家。你見議應該點看待依兩隻股?
可長持嗎還是平手時放左佢好嗎?
龔成老師:
中信國際電訊(1883)業務穩定,整體質素算是不差,過往股價的波動亦不大。佢近年的生意都保持穩定,盈利亦是一樣,相信市場結構令佢處於一個穩定賺錢的狀態,不過,增長力就不強。
盈利就穩定並平穩增長,但始終生意無上升,點都會有扣分的地方。
相信佢能平穩發展,收息可以,但就不要對股價有太大期望。
中行(3988)由於內地經濟無過往年代咁強,股價無過往咁好,由中美貿易戰開始,中國的經濟動力已有所減少,加上最近的疫情,都是影響經濟的因素。不過,初步已好轉,但不是高增長型。
現價合理區中間,這股收息可以,但就唔好對股價有太大期望。
所以,持有與否,要睇你本身投資目標,如果你想收息,就持有。想增值,就賣出。
------------------------------------------------
Q21055:
你好龔sir, 想問下,近期地產/物業企業既物業重估都系向下,是否可以代表香港物業其實系處於跌價方向,但似乎住宅物業冇乜跌價跡象。其實當中有冇關係呢?
龔成老師:
第一,這些物業重估只是一個「估」的數字,更只是一個會計上的因素,對企業無實際現金流的影響。
第二,我地分析時,會著重長期分析,唔需要太理會中短期情況。
所以當我地分析時,重業重估會影響盈利,但只是會計上,因此唔會太過著重的。
而佢地係重估時,不單考慮這刻的住宅樓價,仲要考慮租金,不同類的物業,以及將來發展情況等。
------------------------------------------------
Q21056:
你好老師,我係澳門人,早兩日去珠海金灣睇樓, 嗰度係 珠海新區 發展勢頭好勁但係依家 就係地盤多, 好多嘢都話會起好 將來點點點!
但係 現時比較荒蕪 但係都賣到兩萬五一方 不過有好多大品牌嘅地產商喺度都 喺度開盤 依家 15 16 唔知 買唔買好
因為我覺得個價錢都幾貴, 我覺得佢有啲潛力, 因為見佢之前啲新城區都 搞得幾好!
老師!中鐵建有投資價值嗎?
現價如何
龔成老師:
你最重要睇翻長遠的配置,該地區的交通及價值,以及,本身是否近商業地區。
如果有潛力,就時貴少少都是值得(當然不能過份地貴),建議你進一步分析該區的長遠城市規劃,以及發展等。
中國鐵建(1186)質素算是中等,不算好強,但都不差。
如果有分析佢多年的業績,會見到佢生意其實都幾穩定,但就無增長力,至於股本回報率處合理水平。但這股最大的問題,就是負債太多,雖然佢現金流好穩定,但太多負債始終會扣分。
而這一點,亦令佢企業價值不會太高的原因。而現價處於合理水平,但發展力不算強。
------------------------------------------------
Q21057:
想問下龔Sir對於
686 北京能源國際
668 東銀國際控股
1628 禹洲集團
3883 中國奧園
哩幾間公司嘅潛力,未來趨勢,現時股價值得持有嗎?
留意到近兩月內地房地產成交量急升,80,90後成家置業,可以從呢個方向同埋業績搵現價較平潛力股嗎?
龔成老師:
北京能源國際(0686)風險高。東銀國際控股(0668)賺錢能力唔強。
禹洲集團(1628)主要於中國廈門、上海、福州及合肥從事物業開發、物業投資、物業管理以及酒店業務。
佢係新加坡、香港、上海、合肥、福州、廈門等地均設有分支機搆。
整體質素都有,但未算好強,佢在行業中,未算有好大的規模與優勢,另外,負債較高都對這股造成風險。加上業務有點波動,這股唔建議投資太多。
現價合理,如果控制注碼都可考慮這股,長線投資價值都有,但未去到最高質類別。
中國奧園(3883)主要於中國從事物業發展及物業投資業務,近年增長快速,這是受中國樓市保持向好的情況帶動,加上佢利用大量負債運作,當好景時,佢就會好好賺。
但佢的負債有點多,有危有機,好景時好好賺,但逆景時,就幾大件事。
所以,這類股不是無前景,但風險較高,唔算好建議大注。
至於你從地房地產成交量急升,80,90後成家置業這方向,只能參考下,因為短期成交不一定反映真正的市況情況,而內地往往受政策等因素影響。年輕人成家這是需求,其實一直都有,你要確定是近期短期多左,還是長期核心需求的反映,我暫時未能確定一定是長期需求湧現。
------------------------------------------------
Q21058:
龔老師,我大陸有層樓
值439萬hkd
純粹問下
如果你攞左依439萬hkd
你會做d咩投資
如果做果個投資風險大唔大
龔成老師:
要睇翻你的年齡與風險程度,你可以考慮股票、基金、債券、銀行產品、車位等。
這是一個財富配置的過程,因此無話風險一定大,要視乎你怎樣配置。
就算股票,都有收息股、平穩增長股、潛力股等。
要睇你現時的配置,及將來的配置。
------------------------------------------------
Q21059:
老師,若我希望收息,哪些股票較合適?331豐盛服務可以嗎?659 新創建可以嗎?
龔成老師:
豐盛服務集團(0331)主要係於香港、中國內地及澳門,從事機電工程服務、建築材料買賣、環保產品貿易及提供相關工程諮詢,亦於香港從事清潔及廢物處置管理服務、回收及環保處置服務以及洗衣服務。
過往生意都有穩定的增長,而盈利都是,但企業的規模較細,因此風險較大,同時規模效益不高。但以佢現時的估值計算,價格是在合理區。
你可以投資這股,分注買入就得,長線持有,但就不建議投資得太多,始終這企業有點風險。
新創建集團(0659)都有質素的,佢係是新世界發展(0017)的基建及服務旗艦,業務遍及中國內地、香港、澳門。
新創建係一間綜合企業,可分為7大業務:道路、環境、物流、航空、設施管理、建築及交通、策略性投資。當中可分為兩大類,即是基建及服務
整體的質素,算是不差,但又未到最高級別,業務分散於多個範疇,部分與公共事業有關,過往的生意雖然穩定上升,但盈利卻停滯不前。
企業本身不是沒有優勢,長遠仍有增長能力,但由於賺錢能力略有下降,加上企業本身已很龐大,增長期望不會太多,過往過價大致穩定,投資宜集中在股息多於股價回報。
另外,近期的肺炎對佢有一定的影響,相信中短期仍弱,不過長期來說。仍是有投資價值。
現價合理,分注投資可以,但這股不建議太大注。同時要耐心等好轉,明白佢增長力不強。
------------------------------------------------
Q21060:
龔生你好,本人37歲,月入5萬左右,有一份穩定既收入,同先生財政獨立。現時自住樓先生名下,沒有很大固定開支,現家有大約80萬現金,十萬左右蟹貨股票。
平時無做其他投資,扣除生活開支後,每月大約可以儲2萬蚊。如果想投資,有咩選擇?
另外,如果想買樓投資,應該買咩價位既單位,同埋有無話咩地區比較好。
主要想10年內可以買2層細單位,想留比小朋友
謝謝你給予意見
龔成老師:
我地在財富配置上,最好是建立一個「平衡的組合」,如果太集中買樓,其實會出現集中風險。
當然,你不是不能這樣做,但就明白當中在風險,同時不是最好的配置模式。較好的做法是「股樓平衡」。
你可以先利用現時的$80萬,其中$40萬投資股票,再加上每月用$15000月供或分注買入股票。利用股票去進行財富增值,之後到適當時機先買入(這一步不用急)。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
平穩增長股:潛力股
8:2(如果你投資實力較強,可增加潛力股比例)
平穩增長股:考慮盈富(2800)。
另外再加:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
潛力股:安碩恆生科技ETF(3067)
另外再加:阿里(9988)、騰訊(0700)、港交所(0388)、舜宇光學(2382)、小米(1810)、GX中國電車基金(2845)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
現時大市波動,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
利 奧 坊 車位 在 龔成 Facebook 的精選貼文
【龔成問答信箱】(Q18681-Q18700)
Q18681:
老師,請問如何評估股價嘅合理位?就算睇市盈率又點知佢算高定低?
仲有如何估算一企業嘅市值合唔合理?
龔成老師:
要計企業的價值,過程比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。
簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。
如果要深入計算,基本上要好仔細的研究企業,要分析好多財務數據用比率,先至有較完整的答案。
------------------------------------------------
Q18682:
龔Sir,我個仔現在讀大四,想佢返工後開始月供股票,請問長期供2800得唔得(希望佢一直供到退休,可以自製一份长糧)
我同佢爸爸準備近期幫佢買第一注,以後月供就靠佢自己,2800要幾錢入算係合理區,幾錢算係便宜區?
家長呢種做法可唔可取?
麻煩晒,多謝!
龔成老師:
我覺得這是一個不錯的方法,你地先啟動第一注,其實現價合理,可以進行。你預去到$23以下開始平。
之後就等佢自己長期月供盈富(2800),我相信是一個好的策略。
最好當然佢自己自動自覺去供,但如果佢本身無人意識,你啟動第一注可以的。總之,你要比佢知「最後都是要靠自己」。
------------------------------------------------
Q18683:
你好,我想講去年終於已經轉左工,但都只得1萬元月薪。。。咁我仲可以點?
我想搵兼職
但發現呢份工佔我好多時間
星期一至星期五夜晚去7點幾。。。星期六又去到4點
好難搵兼職
龔成老師:
在中短期,你可以利用高時薪兼職,去提高收入,例如私人補習等。
但長遠,你就要提高自己的價值,這點好重要,你要令自己「值錢」,你提高你的能力,之後可以再轉工,但要在正職上,慢慢走向上,這才是長期的解決方法。
如果現時的工,上流的可能性低,而人工又不算高,加上用了你好多時間,你長遠就要轉工。
------------------------------------------------
Q18684:
老師請問可以教下我如果想一年收兩萬股息可以點部處嗎?
老師如果如果我唔供但每兩個月買一手盈富基金想問要長期持有姐係持幾耐。同埋我都有買埋陽光房產黎收息
但我唔明白點賺錢
老師想問匯控同恆生分別係邊同埋如果想買恒生作長期投資可以嗎?
龔成老師:
如果想一年收$2萬息,如果投資6%收息股,你就要有本金$33萬,你唔好只集中一隻,而是要建立「收息股組合」,同時持有多隻收息股。
如果你每月買一手盈富(2800),現時大約是$12000本金,你就要買28個月,就大約累積到$33萬等值股票,到時可轉到收息股。或者再供長少少時間去累積盈富收息,(因為盈富股息率無6%咁高)。
你要記住,我地不是「賺差價」,而是財富的「配置」,令財富有「增值」及得到「現金流」。
至於隻間銀行,恆生(0011)會較穩健,你可投資作收息。
------------------------------------------------
Q18685:
龔 Sir你好,我之前買咗2202,而家見到恆大嘅財務近期有問題,再看2202的中期財務報告,佢持有資金達到1942億,高過佢一年內要還嘅負債968億,我想再係佢21至$22在加注買入,想請教你覺得如何呢?
之前你同我講要着佢嘅負債,咁呢隻股票係咪唔屬於優質股長期持有呢? 請你多多指教祝你身體健康。
見到你的書響奧運站新開嘅誠品繼續佔頭10位,真是戥你高興。之前睇完你本80後百萬富翁,我再買咗本《股票勝經》睇緊!
龔成老師:
萬科企業(2202)又是另一間極高負債的企業,內房好中意有個玩法,就是高槓杆,這當然有危有機,只要市道順利,這樣可以放大回報,但同樣會放大風險。
只要能順利賣樓套現,佢就有足夠的資金去還錢,如果賣樓唔成功,就會出現流動性問題。
因為樓點都有價值,所以佢地好有信心,但風險,就是好多時大家都分析唔到的野,我始終覺得佢地太進取。
你小注持有可以,只要控制注碼,長線都得,但就唔建議你加注。
多謝支持!要保持閱讀及增加知識!
------------------------------------------------
Q18686:
老師,想問6049已由高位回左40%左右,其實到合理區未,你覺得呢隻股票前景如何,如果以物管股黎講,頭3名最好有冇佢份?
老師,想問你會唔會有即時串流報價既網站?
龔成老師:
保利物業(6049)都有質素的。
佢係中國的物業管理服務綜合商,主要提供以下三項服務:(1)物業管理服務(2)社區增值服務(3)非業主增值服務:主要向物業開發商提供案場協助服務。
生意與盈利都有理想增長,現金流不差,本身有質素。但市場之前對這類股有少少熱,股價較波動,加上規模不算好大,因此都有風險。
優質度有的,如本身有貨可持有,但如想入就最好小注
我唔用「即時串流報價」,因為我唔著重短期股價,我只睇企業,如果價值適合,$100同$101都差不多。
------------------------------------------------
Q18687:
龔sir 你好
我想問下1038 點解幾個月前會暴跌?
現在價位合理嗎?
長揸有無問題
謝謝
龔成老師:
長建(1038)較多資產在歐洲,當地本身經濟差,鴐上近期疫情持續,對佢有不利,相信中短期仍會較弱,但長遠仍是有投資價值。
其實長和系都有類似情況(你見李嘉誠都有增持),中短期弱,長遠無問題,不過,就不是高增長類股。是收息及平穩增長型。
長建現價合理,可分注投資,長線持有。
------------------------------------------------
Q18688:
老師請問你有無研究投資越南既野? 點睇2804 和 3087? 因為好多新聞都話越南會成為下一個世界工廠。
謝謝你,我都好想聽下你意見
龔成老師:
越南的確有一定的增長潛力,之前中美貿戰,已有唔少廠搬左去越南,相信唔少廠都會想方法分散風險而去果度,當地都有投資價值的。
不過,我無特別研究相關的基金,睇翻過往價格就有少少波動。
越南始終是新興市場,有危有機,你投資可以,但就唔建議你太大注。
------------------------------------------------
Q18689:
公司回購股份是好事嗎?
對股價有什麼影響?
龔成老師:
一般來說,都是利好因素。第一,反映公司認為現時股價唔貴,第二,這動作能夠令中短期股價向上,第三,回購進行註銷,總股數減少,每一股的價值得以提高。
因此,這是另一種回饋股東的行動。
不過,我地最重要是分析企業的業務本質,這才是核心,回購因素只是一些加分住。
------------------------------------------------
Q18690:
老師,好久沒找你談話,最近一直被價值投資和投機強勢股兩者所產生矛盾而煩惱。
等待價值股跌落便宜合理價真的很困難,而且當股價跌落某些重要止蝕位時,公司又本質沒變。
但相反投機強勢股再在下方定止蝕,強者恆強的優勢更明顯,老師除了基本面,還會看資金面,技術面嗎
龔成老師:
我20年前,都是短炒者,技術分析者,用左幾年,輸足幾年,之後長線投資,就開始不斷賺錢。
我好後悔當時浪費左幾年去學這些分析技術,我當時不斷睇書、上堂學短炒,但最後都是輸,好後悔,只怪我當時無知。
之後做銀行同證券行,見大部分輸錢的客,就是短炒的一群!這是我10年見到的情況,這是行內的秘密,根本大家都知短炒者一定輸,但業界一定唔會講!
另外,如果你分析全球真正賺錢的投資者、經金經理,佢地都無人短炒,都是長線投資的,巴菲特更講明反對短炒,反對技術分析。
只要我地細心少少去想,都會明短短炒根本賺唔到錢。長線先至係王道。
------------------------------------------------
Q18691:
老師,我想請問一下 00883 03988 00880 01972 02007 01448.
這些股票是我現在持有的
但都比買入價下跌了,老師認為可以繼續持有?
我明白要看企業的長遠發展,但每天看見不斷下跌,就好不安。
麻煩老師比d意見
龔成老師:
我地最重要是睇企業質素,不是股價,不要太在意中短期股價。
太古地產(1972)、澳博(0880)、福壽園(1448)質素較好,而另外3隻質素都有,但未到好強之列,你要睇下自己持貨是否過多。
我地持股,質素較好的可以佔比較多,質素一般的佔比會較少。
你要著重睇企業的長遠發展,而不是當刻的股價。
------------------------------------------------
Q18692:
老師我的個案如下:最近 揸咗十年嘅樓 成功賣出, 當日205萬買入而家 590萬 賣出, 扣除各項我有四百五十萬現金喺手, 我會用 一半 出一部市區的士, 餘下現金 應該如何分配?
我自己本身月入 四萬五, 老公 月入大概 三萬多, 手頭上 有 一開三車位自用
另外手上有三個車位出租, 現擁有四個市區的士牌, 但全部都係供緊, 老公仲有 一間 公司 物業, 一樣係供緊
除咗 賣樓得嚟嘅現金 想 徵詢老師意見如何 投資之外
第二樣就係我希望提早退休, 我現在已經四十七歲 如何用以上擁有嘅資產現金 可以 53歲前 就能夠退休呢?
另外 去年 開始供緊 月供股票, 包括領展, 盈富, 港燈, 最近加咗隻 阿里巴巴, 手頭有少量股票都係你曾經提過嘅優質股, 當然會長揸喇
龔成老師:
其實你太集中在車位與的士牌,在財富配置上,這樣會出現集中風險,你要注意翻,因為我地建立一個「平衡的財富組合」都是好重要的。
你可以保持上述的月供,但到退休時,就應該轉為較收息類的股票。
你可以將有上現金,分成5部分。
第一部分投資收息股,你可以建立一個收息股組合,你可考慮港燈(2638)、香港電訊(6823)、恆生(0011)、工行(1398)、置富(0778)、陽光(0435)、深高速(0548)等,大多有5%股息
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
(你可睇下《50穩健收息股》當中仲有好多)。
你平衡的投資這些股,除了可以得到穩健的收息收,同時可有效的分散風險。
第二,投資債券,你可以選擇A評級的債券,年期較長都可以,但利息卻不高。你可以到銀行問問。
第三,投資年金,你可以睇睇,這是適合你們的產品,零風險,可以有穩定回報。
第四,你亦可投資銀行低風險類的產品,你可自行到銀行了解下,總之是「低風險,持續現金流」的。
第五,持有現金,除了可做定期外,現金亦可以為你的後盾,以備不時之選。同時,若投資市場大跌,你可以在這時買到更多的收息股,股息率會進一步上升。
你可以手上資金,平衡地分配在上述的項目上,對你來說是最好平衡風險,同時有穩定的現金流。
------------------------------------------------
Q18693:
老師,我已經在進行閱讀 八十後百萬富翁
已完成一半
之前都有略讀過股票勝經
打算睇完八十後就再睇一次
股票班都好想上
但因為要輪班 同埋從來都無咩恆心(從來都無成功睇完一本書)
所以想先專心睇左你既書 更有決心再報班
現時和先生月供$13000股票 由今年3月開始(有些是3月時小注買入)另外每月約有$6000儲現金,請問需要調整嗎?現金約有16萬備用
$4000 2800 盈富 24.41 1,444股
$3000 2388 中銀香港 22.31 1,767股
$2000 1211 比亞迪 42.36 793股
下月打算暫時停供 改為供 2382 舜宇光學
$2000 1177 中生 7.89 2,187股
$2000 0823 領展 68.39 635股
$1000 0012 恆基 32.2 1,366股
好想學老師早日財務自由
暫時無咩目標 想有樓住囉
打算呢筆錢 最少3-5年或以上
而且最少啲錢可以自己每個月generate到一筆錢供股票先考慮會用 老師教想用錢最好可以用本錢賺到下一個double先動用呢筆錢
我有努力學習同實踐架
希望可以早日脫離做金錢既奴隸
呀仲有
雖然認識老師你時間較短
但好開心我都見證到第一隻倍升股比亞迪
口水有啲多但好多謝龔成老師
龔成老師:
好呀,你這刻先保持閱讀,之後再報股票班。總之保持進步就得。
月供的都是有質素的股票,方向正確,你照你計劃進行就得,比亞迪(1211)轉其他,可以的。另外,你可以考慮減少中銀香港(2388)的金額,加少少去恆基(0012)。
現金$16萬就持有,等機會。你現時的方向無問題,保持進行就得。
你努力,一定可以財務自由的!
我都用左好多年努力去進行,正如比亞迪(1211),我由2008年開始儲貨,大部分只入不出,都是多年努力的成果!
------------------------------------------------
Q18694:
老師你好 本人25歲 未買過股票 睇你好多時都推薦新手買2800
我睇返2800由07年開始到依家升幅唔係特別高 月供真的可以穩定賺錢嗎 希望老師有機會可以黎澳門開班
龔成老師:
月供的作用,在於「長期儲資產」,原理就是儲錢,但不是儲現金,而是儲資產。
如果你有選股的能力,十幾年前開始,每月月供騰訊(0700)、港交所(0388),我相信你現時身家過千萬。
不過,並不是每個人都有選股能力,因此,對大部分散戶來說,盈富(2800)就是較好的選擇,因為這是一個「組合」,不是最高回報,但卻是較平衡風險。
因此,我會建議你月供盈富,再加上自己選一些股,長期進行。
疫情過後,我會過來澳門的!
------------------------------------------------
Q18695:
老師,舊經濟股冇得賺了
比人帶入股票谷,賺少少
之後比人騙入買了妖股蝕左$10萬
所以要重新學習買股票
但係最近入咗3680美團$260,$255
高位入市😔😫⋯⋯繼續持有
3680後市會掂?
今期$230-250橫行
近期$230-250橫行
只想快啲賺番那$10萬
龔成老師:
你有幾個問題。
第一,唔好太著重這刻的情況,舊經濟由於受疫情影響,雖然增長力弱左,但不代表無質素,你唔好只著重表面因素去分析。
第二,群組及坊間所講的野,所用的方法,不要再信,你要學,就跟全球最賺錢投資者的方法,即是巴菲特的方法。
同時立刻刪去所謂的財經群組。
你有多少知識,同你長遠財富,一定成正比。
第三,你唔好只著重短期股價走勢,這方法好錯。
第四,財不入急門,投資好需要你的理性。
你要明白,我地投資,是建立一個長期的財富組合,買入後長線,著重分配,新舊經濟股都要有。長線持有。
------------------------------------------------
Q18696:
龔SIR,我在早前疫情開始時買了金沙, 雖然在股票班中你從澳門發展前景, 金沙的市佔率表達左你對金沙的信心
我初時都認為是中短期問題...但是我有些擔心, 疫情始終不知道幾時會完...而金沙的現金,面對虧損大約只可捱到2年左右...疫情一唔走..就完全不能營運...財政是不是有機會有重大問題??
龔成老師:
疫情始終只是中短期,你唔好因為「中短期」而影響了企業的核心分析,這會變成坊間的短視分析一樣。
至於現金,佢仍有好大的發債能力,雖然燒銀紙會對企業價值扣分,但就未去到核心性的不利影響。
------------------------------------------------
Q18697:
龔老師你好, 本人投資經驗為零,從事醫護,33歲。丈夫為公務員 31歲,每月收入約10萬。可每年跳point。
育有一兒 約兩歲 之後打算入讀國際學校 每月學費 (暫只計算小學) 約一萬至萬五。
現每月家庭支出為四萬 每月儲蓄5至6萬 沒任何股票 大部份存款放銀行定期 利息少得可憐
現手上存款已儲有7個月家庭儲備金及現金70萬。
全家人已購買醫療及人壽保險
現屋住在政府宿舍 可選擇年半或三年半後遷出 遷出宿舍後可以領取租金津貼 約每月萬八 津貼十年。
問題一 住屋問題
投資經驗為零 丈夫可選擇於年半或三年半後遷出宿舍 視乎升不升級 不升級可住3年半
想問應否早遷出宿舍 自己置業? 還是住到三年半後?讓這幾年盡量儲蓄更多錢? 之前大部份儲蓄都打算作首期 不敢拿來投資, 因怕失利之後沒有地方住。看不清樓市走向 不知道租樓還是買房子哪一樣比較好 ? 因為完全不懂投資亦不敢投資
這個情況 應該有甚麼投資方向 可以保本為上?可以詳細些指點 投資策略嗎?月供股票可行嗎? 資產分配可以怎樣?
問題二
請問要設定兩人之退休金額應是多少?再加上子女之教育費用 應該如何才能達到財務自由?投資目標回酬應設在多少%才算合理?
龔成老師:
1)以你地現時的現金及居住情況,可以在2、3年後置業,你可以以這個為初步目標,唔需要太心急置業,因為你地這刻資金唔需好多,不過就有儲蓄能力,儲2、3年錢相信會更穩健。
你可以在這段時間,大部分儲現金,小部分就投資股票,如果你無投資經驗,最簡單就是月供盈富(2800),每月$10000。
同時,當你見到股市明顯下跌時,都可以以一手手模式去投資。
另外就是香港樓市,我相信樓市中短期會跌,始終香港經濟轉弱,但這只是中短期,這將會在2年內出現,但跌多少,無人知,不過唔會太多。長期來說,香港樓市仍是向上的,因為香港樓的長期供應仍是不足。
因此,你這刻保持儲蓄投資,如果你見到香港樓市有大少少的回落,就可以提早把握機會入市。
2)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你可以預算下,自己退休每月于要花多少錢,然後計出一年花的數目,如果到時收資金投資收息類資產,假設有6%回報,就可以計出到時所需的財富金額。
------------------------------------------------
Q18698:
龔成老師,你好!最近開始睇你fb後,才留意股市。本人打算月供追蹤恒生科技指數嘅ETF,希望老師能俾啲意見。
請問你認為市場上各類型嘅恒生科技指數ETF 嘅前景如何?在挑選供哪一隻恒生科技指數ETF 時,有冇什麼條件以及要注意嘅地方?
另外,想問下點睇小米前景?
謝謝
龔成老師:
我會建議你建立一個平衡的組合,恒生科技指數嘅ETF,當然有投資價值,但如果你組合只有這ETF,你就會太集中在潛力類別,這會有風險的。
因此,我會建議你月供盈富(2800),同時月供恒生科技指數嘅ETF,這樣會較為平衡,你可以考慮安碩恒生科技(3067)。
至於小米(1810),$18以下較合理,這股都有長線投資價值的。
------------------------------------------------
Q18699:
老師,請問2168佳兆業美好質素優質嗎?現價 (pe 30倍),相比其他物管股為低,我估算為合理區中上部,請問正確嗎? 想小注買入中長線持有。謝謝老師
龔成老師:
佳兆業美好(2168)有質素的,過往的增長力不差,有長線投資價值。每隻物管股都有不同的質素、背景、規模、增長力,因此比較時要明白這點。
整體來說,現價合理,大約中上部至合理區頂,分注投資都可以,但要留意規模唔算好大,所以要留意注碼。
------------------------------------------------
Q18700:
老師,我29歲,每月扣除支出只可儲到$16,000,月供$8,000,包括$5000 2800(盈富基金),$2000(港鐵公司) 66, $2000 823(領展房產基金),繼續進行中,現時持股如下:
00066 港鐵公司 98
00388 香港交易所 112
00823 領展房產基金 122
01211 比亞迪股份 23
02800 盈富基金 1,042
1. 呢個組合OK嗎?
2. 而家用緊中銀月供,會唔會用證券行手續費會平D?有無推介?
3. 現時有約20萬現金,應唔應該一手買入定月供?
4. 388同1211現價都較貴,應該停月供定可以繼續?
5. 想月供或買入9988, 700. 1810,1177,3690,邊隻值博率較高?
感謝!
龔成老師:
1)可以,這都是有質素的股票,值得長期持有,可以長期月供。
2)有可能,但我具體唔清楚。
3)如果你投實力不算高,月供一定是最穩健的。另外,如果你見到有較大的跌市,就可以以一手手模式買平貨。
4)現時有點兩難,因為你股數太少,股價上少少貴,應該停一停,但如果你見佢落翻少少,都可以開始翻。
5)騰訊(0700)就較穩健。另外,小米(1810)、中生(1177)都可考慮。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
利 奧 坊 車位 在 龔成 Facebook 的最讚貼文
【龔成問答信箱】(Q18161-Q18180)
Q18161:
龔Sir 你好,小弟今年29歲
近來才開始有心研究一下投資,以前都有買股票的經驗,不過普遍都是很快就放 見帳面賺一萬幾千就放,完全做不到你一直以來教人 「投資是買一間企業」,而不是短炒的方法。
因此近日買了你2本書籍
不過想請教一下
如果想預參考你的書籍,會有一個順序的排列嗎?
因為我看了 財務自由行,但當中好像有一些比較深奧的層面,不太適合我這種初學者。
因此想請教一下老師,我應該從那一本書籍開始,適合我這一種,連巿盈率還未搞清楚是什麼東西的新手嗎?
萬分感謝你無私的分享
龔成老師:
你可首先順次序睇:
《80後百萬富翁》
《股票勝經》
《80後2百萬富翁》
《80後3百萬富翁》
《50優質潛力股》
《大富翁致富藍圖》
之後再睇其他。
書本在三聯、商務、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
以下是我的12本書:
《80後百萬富翁》(第8版)
《80後2百萬富翁》(第4版)
《80後3百萬富翁》(第2版)
《財務自由行》(第6版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(第1版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第1版)
------------------------------------------------
Q18162:
你好啊,龔成老師。
我係一個投資新手,好想請教你
我27歲,月入35k, 現有70萬saving. 想用一年滾大一倍。
早前小試牛刀,賺過8000,後來炒作一傳媒同中芯,倒虧18000。
而家想希望可以儘快賺翻輸既錢。
你覺得我應該怎麼部署?
龔成老師:
一般來說,我會建議長線投資,因為短炒反而無高回報,所以持有3年以上,都是基本的。
好多散戶都會認為,中短線不斷投資,會否快賺到錢,我過往做了10年銀行、證券行,見有大量客都係咁樣想,但結果是,佢地絕大部分(係絕大部分),都係輸錢,唔好講咩回報。
你想1年賺一倍,但就算全球投資賺最多錢的人,巴菲特,一年都只是20%。
即是說,如果你強行要有極高回報,背後就一定要承受風險。
你要從基本知識開始,建議你睇《股票知識》,同時明白「買股票就是買入企業,長線持有」,要小心分析才可入市。
------------------------------------------------
Q18163:
龔成老師你好啊,我係啱啱先開始認識你 同埋開始對投資有概念嘅人,今年21歲,讀緊大學,仲有兩年先畢業。
琴日去書局 有睇到你兩本80後百萬富翁嘅書,可能因為我只係啱啱先認識投資(以前中學經濟最差),所以好多野都唔係好清楚。最近就係因為睇左你嘅FB,身邊嘅同學又開始研究,所以我先對投資有少少研究,想好似你本書咁,係越年輕嘅時間 越快投資。
我本身自己有大概7萬資產,想攞一半用黎做投資,有同屋企人討論過,想參考你建議,月供盈富基金,希望係大學畢業出黎之後,都會有少少錢(雖然月供好似係要擺得越耐 先會越多錢)
屋企人唔識股票投資,爺爺之前有買股票,但佢成日係高價買,以前買匯控,但蝕左好多,自己都唔敢買股票。
媽媽就攞埋我啲錢,一齊去內地買樓,但因為依家社會狀況,黎近呢幾年去內地買磚頭 我都信唔過 同埋想自己啲錢,比自己話翻事。
因為我仲係啱啱先開始對投資有少少了解,本金唔多,有冇啲比較好嘅建議?或者老師有冇啲班或者書 適合新手參考?
唔好意思。問嘅內容比較長,因為我想係越年輕就越快做投資。
知道自己將來做果份工作嘅人工不多,都係得二萬五左右。
自己一早已經有寫帳簿,紀錄低每日嘅支出,
自己平時都好少買嘢,每個月都有三千兼職錢左右,將來做果份工,已經預左 每個月都要草一萬。
因為知道自己嘅背景唔太好,所以好想靠努力,賺錢養老一輩
希望老師可以解答一下
龔成老師:
你要做三樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。你可以睇《股票勝經》《財務自由行》,打好基礎。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平。你可以先了解下不同的收費。
第三,將每月的部分資金,去做月供股票,供盈富(2800)。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過半年,有知識及少少經驗後,就可以利用你手上的資金,其中一部分,去投資股票。
你現時已行在正確的方向,保持記賬,每月要自己儲$1萬以上,同時開始月供股票,保持知識增長。
------------------------------------------------
Q18164:
老師你好,小弟自上年年底開始留意你既專欄,本人40歲已婚,月薪約10萬,現有三層物業,其中兩層自住,一層收租
貸款總額餘下$500萬左右,月供$2萬,租金收入每月$2萬已可抵銷供樓開支,因早年追求高風險投資失利,現流動資金只餘$50萬
另有一筆非流動現金$80萬三年後才可取回。
扣除每月開支(包括車貸月供$1.4萬餘32期)每月大約可儲蓄$4萬,最近開始買股票現有股票如下:
9988 500股 買入價$250
1177 4000股 買入價 $9.12
823 100股 買入價 $59
788 2000股 買入價 1.44
本人現在有點迷惘,應該朝着那方向出發,到底應該部署股票投資還是物業投資,因家中還有一個首置名額可單稅購買物業,但又擔心現時風險太高
如考慮股票投資應該購買那些股票才合適,請老師指點迷津,謝謝。
龔成老師:
你現時的財富比例較集中在物業,因此之後應加強股票方面的投資,令組合更加平衡。
因此,你暫時的方向,都應該著重「股票」,物業可持有但不要再加。
你現時持有的股票,都是有質素的,你可長線。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18165:
Hello ! sorry it's a long message!
今年開始睇你書 睇左80後百萬同50優質潛力股,由0知識到開始試買,而家廿九歲 月入 35K
一畢業唔識就比人說左買月供3000 人壽連儲蓄計劃,要供25年。有D後悔因為好唔flexible
但我而家每個月都at least 望一次做成點,又真係好似賺緊錢,所以我當儲一個真係好長年期一定唔郁的錢,其實你覺得呢D計劃點?
另外,因為初試所以 budget 用十萬 (唔計月供股)
睇完你D嘢就買左
金沙 (1928) @30.6 (3手)
太古地產 (1972) @18 (5手)
中國鐵塔 (2手)@1.47
月供緊 2000 盈富 3000 中電
想問下以上的做法方向正確嗎?
但因為未用晒個十萬 想買多隻潛力股
睇中左必瘦站 但而家 係咪仲係貴左D定係買住一手先其實都可以?
定係有其他更抵買的潛力股?
另外股票勝經同選股勝經應該睇邊本先?
(而家睇緊《巴菲特的投資原則》 (Warren Buffett's Ground Rules: Words of Wisdom from the Partnership Letters of the World's Greatest Investor).)覺得選股心態 心理質素可以唔只用在投資上,對做人目標的實踐好有幫助。我個人鍾意聽podcast/ documentary 有無你睇過嘅好嘢推介
look forward to your reply
Thanks a million!
龔成老師:
你持有的都是有質素的股票,可長線。
至於月供,盈富(2800)無問題,但中電(0002)只是收息股,未必適合你。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。做月供股票,每月$5000
你可以考慮盈富(2800)$2000。
另外再加1、2隻(每隻$1500):銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
必瘦站(1830)之前派左大額股息,所以合理價都要減翻這數,現時只是合理區中上部。
你可以睇《雪球》、《巴菲特寫給股東的信》。
------------------------------------------------
Q18166:
老師,早幾日見到你出有關「困在死胡同的中產」的post與我家經濟相似,都是工作穩定,收入高但支出多,雖有物業,但是負債率高。想請教你,我們現時的理財方向正確嗎?
本人33歲,月入8萬,太太29歲,月入5萬。現時居住公司宿舍,但4年後要交還,而4年後,可領10年居住津貼,每月4萬x12x10=480萬。
本人8年前買入物業,現升值至850萬,未償還貸款餘350萬,每月租金收入$1.6萬 。太太剛買入物業,市值700萬,貸款600萬,仍未出租,收樓後會放租,現時同區相約條件的單位租值約$1.6萬。
另有現金$20萬
黃金現值$25萬
因一直以來買股票都賺少輸多,就算收息股,都係賺息蝕價,所以不敢再買。
除了物業外,現時以銀行保費融資形式買了兩份大保額的短期儲蓄保險,有槓桿成分。
一份是5年期,首筆投放42萬+每月還息約$5.5k(浮息), 5年後保單到期,領取的保證金額扣除銀行貸款後,可取回105萬。
一份是3年期,首筆投放40萬+每月還息$5.5(浮息), 3年後保單到期,可領取的保證金額扣除還給銀行貸款後,可取回73萬。而兩份保單都會在交還宿舍前到期,到時會有178萬現金。
每月開支:
家用 $1.3萬
稅 $14萬/12=$1.2萬
供樓 $3.7萬
保費融資利息 $1.1萬
其他生活開支$4.5萬
共:$11.8萬
-短期目標:希望5-10年後自住一間大一點的屋連車位(視乎樓價走勢,估計需要1500-2000萬)
-長期目標:財務自由,希望50歲能提早退休
問題:
1)<住屋> 4年後不能再住宿舍,而持有的兩個單位都不夠大:
(a) 到時我們應該賣出兩個物業換目標的大單位嗎?但賣出兩個投資單位變一個自住單位後,就會少了一個投資工具去賺錢完成長期目標;
(b)還是繼續出租兩個小單位,自己租別人的大單位,等待合適時機才換樓,但這樣增加交稅負擔;
(c)還是只賣掉其中一個已升值(850-350=500萬)+儲蓄保險取回的178萬=678萬+呢4年另外儲的錢做首期,換一個目標大單位(1500萬),則可保留太太的單位繼續出租及等候樓價升值。但這樣會進一步增加我們的負債比率。
2)現時的收入支出財產分配恰當嗎?會否太進取?餘下的錢,你有何建議,我們該怎樣分配才能達到短期及長期目標?
感謝你實貴的建議
龔成老師:
A)持有較多物業始終有著數,建議你其中一個物業作永遠的投資,另一個就得換大屋之用。
B)這樣長遠無乜著數,因此,你可以這刻好好累積財富,以其中一個單位換大屋作方向。
C)這是最好的方法。
如果你擔心負債太高,建議你延遲少少計劃,等你地可以有較多的儲蓄作首期,減少風險。
同時,你應該善用這段時間的財富增值,就算你之前投資虧損,也不要怕投資。你要從知識著手。
第一,你要增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。
第二,將每月的部分資金,去做月供股票,供ETF是好適合你的,盈富(2800)、VOO都得。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
2)如果可以的話,這幾年減少支出,每月儲多少少錢,對你之後換大屋好有用。
------------------------------------------------
Q18167:
龔sir, 我目前手上有3手建行 (6.9入) 同 6手農行 (3.7入), 係好耐以前買, 一直到而家都上唔返原價賣左去.
我平時好少留意股市, 最近想認真整理下portfolio, 唔知你有無建議應該放唔放好?
我另外1000 股小米 (16.74入) 同 HSBC (48入)
謝謝指教
龔成老師:
你的組合太多銀行股。
第一,銀行業的賺錢能力比過往弱左。第二,銀行業本身是較高風險的行業。第三,任何行業都不能過度集中。
因此,你最好調整翻自己的持股,建立一個更平衡的組合,慢慢減持銀行股。
至於小米(1810),有發展,可長線持有。
------------------------------------------------
Q18168:
你好,龔老師,請教一下收息股
1長和現價51.x
同941中國移動58.x
呢2個現價入,長揸收息合理嗎?
麻煩你
龔成老師:
可以,都是有質素的股票。
不過,你預佢地增長力唔算強,只是收息,現價合理,分注可以,只要同時留現金就得。
------------------------------------------------
Q18169:
Hi老師,2400點睇
2382現價算平嗎,是否依然優質
龔成老師:
心動公司(2400)集團主要於中國、亞洲、北美洲、南美洲及澳大利亞開發和營運網上遊戲,網絡遊戲都為免費,收入主要來自銷售遊戲內的虛擬物品所產生。
集團同時也開發及營運付費遊戲,以及與第三方遊戲開發商合作發行及營運授權遊戲。
業務上,有吸引地方。不過,我一向都新股半新股都無興趣,因為真實面要過一段時間先見到真章。所以新股估值困難,只建議你小注,同時你要明白當中的風險。
舜宇光學科技(2382)只是合理價,未平,這股有質素,可長線,不過中短期相信會較波動。
------------------------------------------------
Q18170:
龔老師你好丫,我係你的忠實粉絲,我有問題想請教你丫
我現時27歲,剛買樓,供$20000,供30年,現在還有大約120萬儲蓄。諗住大約用100萬左右去投資。用來幫輕供樓,想請你俾一些建議。
我諗住買
0002—$110000
0003—$220000
0066—$190000
0270—$65000
0435—$35000
0778—$130000
0823—$120000
1212—$63000
2388—$43000
餘下10-20萬做現金
求龔老師指點
龔成老師:
如果你要供樓,建議你留有一定的現金,唔好絕用資金,加上現時的大市只是處合理區,不算特別平,因此,唔建議你用太多,暫時動用$60萬已足夠,慢慢分注投資,餘下就等機會先用。
另外,上述股票雖然有一定的質素,但不少的增長力都不強,以你27歲,未必適合。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
因此,建議你重新選股。你可以投資「平穩增長股」,加少少「潛力股」,「收息股」則不用投資。
------------------------------------------------
Q18171:
龔成老師 你好 見到你開post 都有啲成功例子 所以都想請教你
我啱啱大學畢業 搵到野做 2萬一個月 扣除家用交通費日常開支 一個月都應該儲到12000 我自己都有買過股票 但全部都仲坐緊 買左303 (平均62蚊)861 (平均6.5) 386 (4.08)
原本啱啱畢業都儲左9萬蚊左右 5萬蚊買左以上3隻股票 有打算短炒和月供股票 個人希望5-6年後有100萬結婚買樓 如果係呢個目標 月供股票做唔做得到
諗住供媒氣同盈富
同埋想問 2588 現價可唔可以入
所以想請教下你
龔成老師:
要留意3樣野。
第一,唔好再短炒,我之前做銀行、證券行多年,見證大量客短炒全部都蝕錢,只有長線才能有錢賺。
第二,你在選股上要提高能力,選一些更優質的股。
第三,當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你現時持有的偉易達(0303)、中國石油化工(0386)標算供的煤氣(0003)都只是收息股,你年輕,唔太適合投資這些股。
盈富(2800)可投資,而神州控股(0861)中銀航空租賃
(2588)小注都可以。
你要再選一些優質股,長期月供及投資,要「建立」一個增長優質的組合。
------------------------------------------------
Q18172:
龔成老師你好,我已經留意左你專頁好耐,但一直唔知點開始
我完全冇投資經驗,不過有儲開錢,最近公司裁員,而家手上可用的資金有20萬,想嘗試一下投資
我應該試月供股票,定係用呢20萬黎投資其他股票?
因為暫時都應該唔會有但穩定收入,所以想聽下老師意見
龔成老師:
你要做三樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。
建議你盡快睇《股票勝經》。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平。你可以先了解下不同的收費。
第三,將每月的部分資金,去做月供股票,供盈富(2800)。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過半年,有知識及少少經驗後,就可以利用你手上的資金,其中一部分,去投資股票。
如果你真的唔想月供,就自行慢慢,分注投資盈富(2800)。總之,現金唔好用得太快。
------------------------------------------------
Q18173:
老師你好,有問題想請教下,我今年48歲,計劃明年退休,另一半做生意的,已不用供樓,打算兩百萬投資股票
現在沒有持有任何股票,如果每月做到收息一萬作為生活費,請問投資組合應如何配置,同時現在市況可以開始吸納嗎?非常感謝
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你48歲,其實財富仍然有增長力,但就不能太進取,應該要以「平穩增長」作為核心。
你可以考慮盈富(2800)。
另外再加:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
上述股,你可以分注去入,慢慢將資金,轉為優質股的組合,例如每個月入一次,分注去人,將買入價平均。盈富可較多。
你可以將$100萬,分開1、2年去入。餘下資金,就等機會先入。
當然,如果你目標是「現金流」,唔打算增長,只求收息,就可以這刻集中投資收息股。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
------------------------------------------------
Q18174:
龔老師你好,有投資問題想請教一下
小弟今年29歲 月入大概24k 資產有120k 之前冇投資股票經驗,而家想試下月供 扣除所有開支暫時有5k可以投資
盈富(2800)@3000
銀娛(0027)@1000
港鐵(0066)@1000
請問咁樣可以嗎?
謝謝老師
龔成老師:
可以。
這些都是有質素的股票,都可以長期進行月供,已經可以開始。
餘下的資金可以持有現金先,慢慢等機會先入市,暫時可以做左月供先。
月供要長期進行先有效果,唔好理中短期股價,保持進行就得。
------------------------------------------------
Q18175:
本人現年37歲,已婚有兩小朋友,家庭月入100K,正供兩層物業,月供30K及均已租出,租金足夠供樓,現金有300萬。
本人投資股票經驗少,若然想用200萬買股票作長遠收息,請問有哪些組合及什麼價位可以入市介紹?謝謝
龔成老師:
以你的年齡,財富仍有增長力,其實應集中「增值」多少少。
因為當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
不過,如果你本身怕風險,可以建立一個「平穩增長股」+「收息股」的組合。
平穩增長股你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
投資收息股,可以同時作為財富分配的一部分,但不建議將全部資金都投資,因為一定要留有一定的現金作防守,以備不時之需,以及若大市下跌,可以買平貨之用。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
但要留意,現時股價只是合理,未到平宜,因此買入時宜分注,同時不能用盡現金。
我暫時建議你先用$100萬,在一年內,慢慢分注投資上述股票,同時增加投資知識。等你有知識及經驗後,之後才動用餘下的資金。
------------------------------------------------
Q18176:
Hello~ 龔成先生
見你會解答投資疑難,冒昧試下問你
我5月初死蠢誤墮投資騙局,買入(1701),隨後急瀉。
我對股票投資係零概念,近年生咗兩個小朋友就做全職主婦。諗住自己暫時無能力返工搵錢就試下買股票,點知💔
(1701)急瀉後,一直唔敢沽貨,仲蠢到再低追,宜家唔知點算?
1701買入
@2.71 ( 20000股)
@0.475 (40000股)
@0.4 (40000股)
另外想問下你,我手頭上有30萬積蓄(可動用) ,有咩股票值得投資增值?因為平日要照顧小朋友,無乜時間研究股票,請賜教
另外,聽完你啱啱講解嘅【98%散戶會犯的錯】, 我消化完係咪即係我宜家持有嘅1701根本係無質素嘅股,係咪唔應該期望佢會升返少少(e.g 0.8)。寧願現價沽出去投資優質股?
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
途屹控股(1701)本身質素不佳,如果你有睇佢的業務情況,生意大跌,同時出現虧損,就算現時已大跌了很多,這刻仍未是平。
首先,長遠一定要賣出這股,絕對唔好再加注,問題是怎樣賣出。
佢係中國的出境旅遊產品及服務供應商,如果全球疫情過後,有機會升翻少少,你可以等一年時間,但你預好難上到$1以上。最多見佢升翻D,就要賣出。另外,如果這股現時佔你財富已有一定的數量,最好減少少先,以平衡風險。
至於投資其他股票,我反而希望你唔好心急,有時間學下投資先。最多動用小部分資金好了。
你可以考慮盈富(2800),以及銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
------------------------------------------------
Q18177:
龔成老師,看過你facebook 的post 之後就著迷的買了你好幾本著作並一口氣看完,獲益良多,並增強了我本身的自信,由不相信自己有可能發達,變為想嘗試一步步向著擁有豐盛生活的一天努力
不過,看完80後百萬富翁和股票勝經,我都有一個疑惑,就係,書中一直強調只要買入的股票只要是優質股就不用怕佢短中期的波幅變動
無論如何它都會保持上升,但如果大圍因素有變,比如美國大選(只是一個例子,可以是將來其他因素),結果導致股票大瀉,而如果已有這個預期結果
就算是持有優質股,都要繼續持貨?還是先放光,再從低位再入?
再一次多謝你將在投資路上的經驗作無私的分享,多謝!
龔成老師:
在大方向來說,只要是優質股,我地會偏向長線持有的,因為這是最有效令財富增值的。
當然,不少受散戶都有你的想法,就是在某些時候,先賣出,之後等跌再入,正如你上述講「結果導致股票大瀉,而如果已有這個預期結果」。
如果真的能預期這情況,當然可以這樣做。
但我可以好肯定同你講,散戶的預測,錯的機會一定比正確的機會大!
4年前美國大選,民調一直都話特朗普輸,最後佢贏,同時,當時的股市,一直都預期特朗普如果真的贏左大選,股市會暴跌,但最後佢當選後,股市連升6個月。
所以,表面上「預期會跌,先賣出等跌再入」,是正確,但要估升跌,難度遠遠比你想象中高,如果你認為自己估到,這反而更危險。
------------------------------------------------
Q18178:
龔老師 我係絕對新手 大學未畢業 亦無修讀經濟 知道您推薦2800 比無能力選股嘅人 所以我都開始咗3000月供 但想請問如果我想更進一步
開始研究潛力股作長線投資 應該如何開始學習? 有冇邊本書介紹?
我睇了你的少年百萬富翁 知道你當年在圖書館搜集資訊,咁現 又有冇咩渠道能收集到研究股票嘅所需資料?
我認真希望能跟你學習 謝謝
龔成老師:
你睇《股票勝經》《選股勝經》《年報勝經》《50優質潛力股》,之後,你上港交所坡露易的網站,下載企業年報去研究,這是最好了解企業的方法。
https://www.hkexnews.hk/index_c.htm
------------------------------------------------
Q18179:
老師你好!本人一直有買賣股票,不過短炒為主,所以本金沒有大上落,輸小贏小。
之前9.x買入868,但10.x已放,現在後悔不已。想問老師投資策略,希望可以一年內倍增。現手持:
200股3690
300股9618
另有15萬現金留作投資用途
龔成老師:
你唔好再進行短炒,這根本無法贏錢,之後要以價值投資作為核心。
現時你持有的,都是有質素的股票,長遠有發展力,可長線投資。
不過,你唔好太過集中持有這些新經濟股,你應該建立一個平衡的組合,長線投資。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18180:
你好, 一直有睇開你既fb學習投資, 當中獲益良多, 現有一問題想請教下
我同男友今年都42歲, 大家都無物業, 兩人合共5萬蚊收入, 已儲有首期, 現各自和屋企人住公屋, 我地應否買樓呢? 始終年齡唔細, 而家先供樓好似太遲
龔成老師:
現時仍可買樓的,你地的年齡仍然可以做長年期的按揭。
你地先計算一些首期、每月供款金額、目標物業樓價,最重要是「供得起」原則。
香港樓市中短期會波動,但長遠仍是向上,雖然現時樓價唔算平,但從自住角度,仍是可以的,你地可以討論下相關計劃的可能性。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。