【老如松柏】
今天，天氣寒冷，毛毛細雨…
致電整天也沒人聽，下午往送禦寒物資予獨居長者時，決定親自往他家拍門…
在保安處登記順道查問，女保安表示不熟悉該座住客…
按升降機前視察信箱，有信件在內未拿…
到門外了，有電視機聲，心想應在屋內…
但拍門呼喊，沒人應…
細聽屋內，沒動靜…
在屋外致電他家，有鈴聲但沒人聽…
我看見他有個緊閉了佈滿塵的氣窗，決定按隔鄰屋門鐘打聽兼借櫈…
我邊繼續落力拍門邊呼喚他的名字，可惜隔鄰屋同樣沒人應門…
看看手機，5：25pm...
就在我叫喊近五分鐘時，電視機聲忽然終止，門緩緩開了…
87歲、安裝了心臟起膊器、樂天知命但年少已無親無故的他，儍乎乎的望著我…
「我打咗成日電話搵你，做乜冇人聽？」
他臉露可愛的無牙笑容：「我出咗街，落咗公園坐，啱啱返嚟…」
「做乜有電視機聲又唔開門？」
「我頭先喺廚房！」
「你夠唔夠暖？我可以俾衫、被同食物你…」
「唔駛喇！我有呀！夠暖呀！」
「我頭先差啲想借櫈擒上嚟喺氣窗裝你！有電視機聲又唔應門，嚇死我喇！」
「哎呀～阿肥姑娘妳對我真係好，咁關心我…」
「下星期再同東華三院姑娘上嚟探你…」(事緣我推介了他參加東華的「圓滿人生」服務計劃，他原打算日後睡沙嶺的，但我不准許！)
「知道！東華姑娘打咗俾我…」
「你有平安鐘㗎呵？」
「有！」
「記得唔舒服即按，有需要幫手隨時搵我！」
「知道！」
「咁我走先喇！」
「好！阿肥姑娘拜拜，多謝妳咁關心我，特登上嚟搵我！」
回中心路上，我看見一棵松樹…
常聽見別人祝長者老如松柏…
我在想：「孤寂一生的松柏能有一條樹藤扶持也不錯吧？」
★Facebook常叫我花錢推廣我的專頁，但我真的不捨得花這樣的錢！大家如果喜歡我的分享，或支持我和媽，歡迎讚好和分享我的專頁 #小北斗的夜空，謝謝大家！★
