<<唔知大家仲記唔記得「全靠當天喜歡過錯的人」？>>
兩年前我曾經同大家分享過，我有一個經歷失戀傷痛嘅朋友，失戀失咗勁耐，日日都鄺俊宇加 middle 加瓊瑤加亦舒上身，痛到日日都m痛加盲腸炎無限復發咁痛，當時我哋一班仆街朋友見佢咁痛不欲生，於是不停喺多年嚟恥笑佢。
我哋曾經送過周秀娜攬枕，以解佢寂寥，亦試過買華加整體助長器，鼓勵佢增高增加個人魅力再戰情場，都送過「縱使失戀工作至上才爭氣」蛋糕，希望佢專心工作，而兩年前我地就喺佢生日，訂咗一個「全靠當天喜歡過錯的人」嘅蛋糕繼續恥笑佢。
咁又過左兩年，呢位朋友最近點呢？
(班仆街朋友叫我好似鏗鏘集回顧舊檔案咁，講番呢兩年呢位俾我地恥笑左咁多年嘅朋友嘅轉變，同埋點樣將佢個生日恥笑行動昇華)
好似那一天我們會飛個首主題曲所講，「青春怎會零創傷」但係越創傷，個人就會越有進步，愈會成長......
呢位比我哋恥笑多年嘅朋友，除咗擅長失戀之外，其實都有遠大嘅理想，佢醉心於攝影，上年佢辭退穩定嘅工作，全職轉做freelance photographer ，真正咁捉緊生活濃度，喺佢嘅作品坦白流露感情和態度。
除此之外，呢兩年佢對人生好似睇化咗，而家全心禮佛，佢嘅轉變，就好似紅孩兒壞事做盡最後都修心養性咁。由於佢呢兩年全心禮佛嘅關係，我地呢班冇放棄恥笑佢嘅仆街朋友，都適當咁調整同昇華我地嘅恥笑行動。
上年佢去咗靜修，我哋就訂咗個「大佛蛋糕」，key咗佢個樣上去，仲對佢有一個祝願，希望佢以後，可以用生命影響生命，發揮 大愛，普渡眾生。 我哋仲送咗頂佛陀冷帽畀佢， 希望佢禪修嘅時候唔好冷親個頭，用心思考。 而我哋唱嘅生日歌，已經由「全靠當天喜歡過錯的人」改為「觀自在菩薩」嘅心經。
今年我哋察覺到佢年紀已經唔細，於是精心製作咗長輩圖， print 喺蛋糕面，一來celebrate 佢同張關愛座嘅距離又拉近左一年，二來希望佢明白生活有好多挫折，要有屢戰屢敗嘅精神，思考色即是「胸」嘅險惡，希望佢搵到一個唔會「令佢令佢令佢令佢再度再度灑淚兒」嘅人。
年復一年，我覺得同呢個朋友慶祝生日，就好似Christmas celebration 咁(近年係似佛誕啦)，我地真係好重視佢個生日，當係annual dinner 咁搞，當年我地諗住恥笑下佢失戀失咁耐，漸漸佢嘅生日成為大家嘅回憶同經典。我地喺恥笑佢方面， 係別出心裁，用心良苦。
朋友應該對於擁有我地一班咁用心嘅仆街朋友感到「執到」，你需知道，唔係恥笑咁簡單，其實唔重複地恥笑你，係難架。
你年年生日比我地恥笑，呢份快樂真係一啖砂糖一啖屎，好彩我地年紀一把，可幸係大家都有一顆腦筍長期未生埋嘅童心。
呢位曾經痛不欲生，而家浴火重生嘅朋友，祝你生日快樂。
#愈仆街嘅朋友真係愈善良架
助長器 在 [新聞] 學者調閱柯文哲器捐摘取資料「台大醫院- 看板Gossiping 的推薦與評價