我嘅職業係：同性戀治療師（上）
「踏入嶄新嘅20世紀，醫學發展一日千里。希望在座各位，都可以為現代醫學盡一分力。跟住落嚟，我哋要解決嘅世紀難題係：同性戀！」
導師講完呢段說話，在座嘅學生紛紛鼓掌。
我都好激動，我哋嚟緊要研究嘅課題，居然係近期最熱門嘅「同性戀」。
同性戀，有人話係精神問題，有人話係生理問題。
總之，出於一啲好奇怪嘅因素，居然有人唔鍾意異性，鍾意同性，數量以男人居多。
呢種奇怪嘅傾向，對家庭、社會都造成嚴重嘅負面影響。
好多家人都會帶同性戀嘅人嚟求醫，但現時嘅科學，仲未有一種可靠嘅療法，可以醫治到呢種被惡魔詛咒嘅疾病。
最近期嘅研究指出，同性戀嘅病因係激素異常。
所以，我哋參與嘅第一個項目，就係要幫同性戀患者注射激素，並且記錄佢哋嘅身體變化。
我參與咗幾個case，暫時未有咩成果，我都好努力咁去做，希望可以幫到病人。
直到我見到一個新嘅病人，阿倫。
阿倫係一個天才，佢喺劍橋大學畢業後，負責海軍密碼分析，期間研發咗一啲破譯密碼嘅重要技術，又搞人工智能之類。
而且，佢運動都好勁，係世界級長跑高手。
咁犀利嘅天才，偏偏患有同性戀。
阿倫嘅同性戀病實在太嚴重，嘗試過同男人發生關係，被判以「明顯的猥褻和性顛倒行為」罪，需要進行化學閹割，即係注射女性荷爾蒙。
阿倫既係國寶級人才，亦係一個好好嘅實驗對象。
我哋嘅團隊去咗觀察佢，睇吓化學閹割可唔可以幫助醫治同性戀。
因為注射女性荷爾蒙，阿倫嘅身體出現咗好多變化，佢嘅乳房不斷發育，亦冇辦法再參加賽跑。
我本來就好敬仰阿倫，所以我成日去安慰佢：「你比心機接受治療，好快就會變番正常人，唔會再對男人有性慾。」
阿倫總係搖搖頭，唔出聲。
突然有一日，阿倫服毒身亡，震驚成個國家。
我好唔開心，又覺得自己好無用。
如果我勁啲，搵到醫治同性戀嘅方法，阿倫就唔駛受咁多折磨，唔駛搞到自殺。
所以，我發誓，我一定要搵到醫同性戀嘅方法，拯救眾多同性戀者。
再試咗幾年，我確定，激素治療係無效嘅。
除咗被判刑嘅同性戀者外，都有唔少人係發現自己有同性戀傾向，主動求醫。
梗係啦，邊個唔想光明正大咁愛一個人，邊個想成世俾人歧視，仲會俾人拉。
所以，我有機會實驗好多唔同嘅方法。
呢個時候，我已經係一個獨當一面嘅醫生，經過多番考慮，我決定嘗試手術移植。
我閹咗一個男同性戀，移植咗另一條男屍嘅睪丸落去。
由於唔係成日都有壯年男性嘅屍體，我仲試過移植黑猩猩嘅睪丸，反正黑猩猩咁man。
可惜，即使睪丸移植成功，同性戀依然係同性戀。
又一個方法，失敗。
我開始諗，同性戀未必係激素問題，可能係心理病。
就好似有啲人受咗刺激，從此陽痿一樣。
下集：https://bit.ly/3b3iYBZ
將專頁設定為「搶先看」/ "See first"，最新故仔馬上睇！
殭屍唔易做：https://goo.gl/eAjdEX
偉大的炸藥：https://bit.ly/3apqvr0
#短故 #短篇 #小說 #陳美濤 #廣東話 #粵語 #tomatochan #我嘅職業係同性戀治療師 #我嘅職業係
化學閹割國家 在 [新聞] 性犯罪再犯多泰國擬立法「化學閹割」 - 看板Gossiping 的推薦與評價