免費「森度遊」南朗山救緩徑
難度 ⭐️/5
上鏡 ⭐️⭐️⭐️⭐️⭐️/5
今期熱爆南朗山救援徑原來係一個鐘頭貨仔🤣
話說鯨吞政府 54億救援金嘅海洋公園早前推出本地深度遊，其中包括行山，一推出就惹來極大迴響。
當個個都話做乜俾錢行山之際，有人發現原來條山徑根本係公家嘅，唔係海洋公園私有，之後有關部門就即刻走去拆咗度閘。條山徑兩日前先開，已經先後有多個行山group推介，有幸今日朋友帶我去，可以率先出相呃like。
好，講返條山徑，真係好方便，海洋公園站一出朝公園入口方向但唔入公園，向右落電梯再轉左，行去巴士站再見到警察學校入口嘅左面就係救援徑入口，得一條路好難蕩失。基本上係一條又上又落嘅樓梯，跟住海洋公園嘅吊車纜一齊行，情況好似昂坪嗰條山徑咁，不過就短好多。一條路上，沿路往返，連影相唔使一個鐘就行完，不過因為比較斜都幾攰嘅。注意：救援徑係通唔到去平時行開嘅南朗山頂，沿着吊車纜有度閘，去到真正海洋公園嘅私人用地，嗰個位真係要折返，所以行唔到去令一邊嘅吊車站。
景色方面就真係一流！湖水藍色嘅海，加上綠草如茵嘅山坡，沿途仲可以窺探豪宅入面嘅私人泳池，近距離感受貧富懸殊，如果有人開始放drone 應該就會有好多有錢佬投訴🤣
美中不足嘅係今日我哋完全影唔到吊車喺頭上經過嘅景色，由於想避開人流，今朝早九點就去到入口，唔使一個鐘就出返嚟，點知原來海洋公園10點先開，返到起點㗎吊車都未郁😅 遲去又驚多人，條救援徑勁窄，遇上人流逼住一齊行會好辛苦，所以都係盡早出發比較好。
其他行山路線推介：
https://chairwoman.me/2020/06/18/%e9%a6%99%e6%b8%af%e9%9a%b1%e4%b8%96%e5%a4%a7%e8%87%aa%e7%84%b6/
#香港行山
#南朗山
