《吃榴槤的她》
有位朋友佢係外國曾經落酒吧玩結識咗一個外籍美女，但正當佢準備接吻之際，突然發現對方有種唔係常人頂得順嘅口氣，兩個人就此緣盡。
而我，面對嘅唔係口氣咁簡單，而係一個食榴槤嘅老婆。
知唔知點解講到食榴槤仲慘過口臭咁？死魚嘅腥臭味，同榴槤嘅香味，如果只係一種比較，我會揀榴槤，相信你都會。
但問題係，你考慮少咗一樣野，口臭，係一種問題，你會去逃避，你會去解決，就好似我朋友咁，佢大不了咪握個手講拜拜，但一個食榴槤嘅老婆，你避唔到……
第一次係我上外家食飯，食完之後外母拎咗個榴槤出嚟，係貓山王，細細個，我見到好開心，我話，咁細你哋都唔會夠分，我就比你哋食啦，但咁偉大嘅犧牲係老婆眼中，我太慘喇，無得食咁好食嘅榴槤，所以佢分咗一舊比我，我望住成家都食嘅人……
好快咁咬咗一啖，吞落肚，諗起《低俗喜劇》入面句，好惹味喎！
自從知道我唔食榴槤之後，老婆每次都會特別照顧我，榴槤布甸、卷蛋、蛋卷、雪糕、總之同榴槤有關嘅我都食過晒，每次我愈係痛苦，老婆就愈係開心。
口臭，係問題，你唔向問題屈服你都可以好理直氣壯，但食唔食榴槤係喜好，我食落肚又唔會痾唔會嘔，只係唔鍾意，所以老婆就會以此為樂。
有晚佢食完，突然胃氣一脹，之後，空氣就瀰漫著一種榴槤加上胃酸嘅混合味，我當時太年輕，反應太大，如果比我揀我會閉氣扮無事發生算。
但當時我反應完，老婆一句就問，你係咪嫌棄我喇？唔係！咁你做乜咁大反應？臭嘛！咩臭啊，你聞清楚，係香味啊！係係係，係香味得喇！
然後佢就話，唔知點解今晚好想錫你，來吧，我哋打個車輪啦！
我推開咗佢一下，而呢一下，佢話我係咪唔愛佢喇。
為表我對佢嘅愛，我哋打咗個比結婚當晚更長更深入嘅車輪，完事之後，我即係去廁所漱口……
呢五年，你哋知唔知每逢夏天我係點過？
尋日老婆又買咗個榴槤，當晚我唔覺意攬咗佢一吓，然後想同佢發生超友誼關係時先發現有陣味……佢見我面都變埋，話好喎，以後唔想同我超友誼嘅就食舊榴槤就得，我只好無奈接受。
之後佢問我，其實你點解一直都唔食榴槤呢，呢幾年我都因為陪佢食而食咗好多一直唔食嘅野，唯獨係榴槤我會咁大反應，一直都唔肯食。
我無答佢。
老婆，其實，我要食都得嘅，但我覺得你見到我咁痛苦咁嘅樣，你會歡樂過一齊食囉，同埋我唔食，你咪可以食多少少囉！
「喂，我咁講係真心啊，唔係我想逃避而講出嚟嘅客套說話啊！真啊，你信吓我好唔好？你再係咁，我就日日食蒜泥白肉喇！」
－－－－－－－－－－－－－－－－－－－－－
有興趣購買《弊傢伙，我女朋友有咗》的朋友，可以經以下連結購買：
Payme, FPS, Alipay連結：https://forms.gle/UEdH32PfVD2cp5nK6
掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
