真係走得就走 (6)：移民最難嘅數學題~至愛親朋
無論任何家庭，尤其是中產，當考慮移民嘅時候，要面對嘅最大問題可能唔係錢，又未必係生活習慣，更加未談上政治環境，而係要離開人生多年黎建立嘅親情、友情，甚至係人際網絡。厘條我本人覺得，可能係考慮移民之中最難嘅一條數！
我曾經提及過，移民唔係一家幾口嘅問題，連帶可以係關乎上一代與及下一代嘅問題。上一代，我相信怕嘅係被拋低嘅感覺，做仔女係應該令父母清楚而安心地知道，世界其實好細。加上科技發達，每日都可以聯絡，而大家亦可以互相往來探望，結果可以好似我兩公婆一樣，見父母嘅時間同一同生活嘅總和，係可以比响香港過去嘅幾年嘅時間還要多。總好過以前响香港多多借口，食餐飯都難，過時過節就送幾間屋都放唔晒嘅按摩椅好嘅。
對於下一代，我本人就放嘅比重就好大。我認為對小朋友黎講，移民越早就越好。唔好講香港現在嘅教育制度，亦唔講洗腦或者政治氣氛。就係講個社會環境同價值觀，做家長嘅，根本無論點樣身教，小朋友唔多唔少都會習染到（你唔睇膠劇，同學仔日日都可以睇）。對我黎講，厘個係我最大嘅原動力之一。
以我自己嘅經驗，中文水平學到初中先離開，無錯係會好一啲（我差唔多每個post都要網友提醒我錯白字！中文有幾好？）。不過我可以話比大家知，我本人就因為當年「太遲」去英國，係要用上好大嘅力量去適應，以及建立响外國嘅人際關系（英文都唔識多個，但係唔黐中國人小圈子喎，幾辛苦）。唔洗我講，大家都會有眼睇，點解大陸或者香港嘅中學或以上嘅留學生，全部都係黐埋一堆，除咗上課，平時英文都唔多講句。咁去留學做乜？不如慳番啲錢讀Distance Learning啦！
所以結果都係選擇題，要下一代正正式式咁融入外國生活，未來响世界上發展，就要比早啲比機會佢地成為當地嘅一份子。至於中文，做家長嘅，只好盡能力，睇緣份。我係會提醒自己，未來係子女嘅，我真係唔希望佢做一個中文又唔好，英文又唔native，唔上唔落嘅「華僑」。（走得嘅，自己回頭就算，重講下一代要番去「回流搵大錢」，好多年後喎，諗下都驚啦！）
至於成年人嘅友誼關系，大家問下自己，由2014年開始，真正志同道合嘅朋友重剩番幾多個。我本人覺得去到我嘅年紀，係知已嘅，有幾個都算係幸福。係知已嘅，根本唔需要好似小學生咁日日要見著，而飲飲食食嗰啲，唔好講啦！人到中年，我相信做每一個重要決定嘅時候，係要將家庭而唔係友誼放响首位嘅。
最後就係嗰啲所謂人際網絡，其實講白啲就係「港式connection」或者「強國式關系」。我厘樣就覺得好實際，如果真係關乎生存嘅，咁真係無辦法。事實上，移民就係需要reboot一個新嘅人生，開展一個新生活。如果生存都未計得掂，的確唔可以亂黎嘅，因為點都要對家庭負責。不過，如果要保留connection搵多啲錢，又能夠移民呢，我相信個世界係唔會有咁便宜嘅事情。
結果我都係嗰個諗法，一個中產，又要有新生活，又要子女好，又要幾代同堂，又要朋友多，又要搵到錢，又要繼續keep到啲connection，咁其實唔需要諗移民。因為根本唔係一個中產，係乜都有嘅上等人。
#真係走得就走
#人嘅數先係最難計
#又要安撫上一代
#又要諗自己
#又要計下一代
#唔諗掂點走
***************************
真係走得就走 (1)： 國教、普教、蔡若蓮
http://bit.ly/2vPyVHq
真係走得就走 (2)： 代言人
http://bit.ly/2w8vqww
真係走得就走 (3)： 移民係一條數學題
http://bit.ly/2wgKIyP
真係走得就走 (4)：「乖」與「聽話」？
http://bit.ly/2xp1ny6
真係走得就走 (5)：移民與香港買樓數學題
http://bit.ly/2vHSayM
***************************
