【讀屎片】
當年被X醒！留學為咗乜？
當年初中，被家父安排去英國留學。臨離開之前，有兩位經已過身嘅長輩，專程約我厘個小朋友單獨食飯。响我嘅眼中，兩位係代表咗當年香港Book Smart同Street Smart嘅精英。佢地好巧合地都送書比我留念，同時對我講咗一番關於留學嘅道理（其實係X咗兩鑊）。無論書或者當日嘅道理，我留到今日再帶回英國，亦會留比下一代。
Book Smart嘅長輩，係典型苦學成才嘅港大學生，八十年代經已係一位律師。當年佢約我去中環Hilton食Lunch，一坐低，佢忽然間全程同我講英文（我即時變啞）。佢問我將來想讀乜，我咪話睇下將來乜嘢科可以搵到好工囉。
佢聽到之後立即轉channel，用香港人最流利嘅粗口X咗我半個鐘。意思係，讀書讀得好，自然有入場券嘅機會搵錢（當時黎講），搵唔搵到就睇你自己嘅能力！屋企用咁X多錢比你留學，係開眼界，見識個世界，知道自己想要乜X！最後佢比咗本" A Practical English Grammar"我，佢話自己無機會留學，佢當年都係由「食」厘本書開始，眼界亦由英文書打開。
而Street Smart嘅長輩，佢小學都無完成，不過就成為咗一個好成功嘅企業家。佢叫我同佢响油麻地大排檔食飯。佢話自己連書都無機會讀，不過覺得唔緊要（不過又未聽過佢講粗口喎）。因為佢認為讀書，只係學校將啲好嘅貨（我估係知識）同貨架（我諗係邏輯），放入個腦度。不過如果一個人夠叻嘅，咪自己識揀好嘅貨，同時又勤力啲執貨，結果都可以係一樣。
佢又同我講，叻唔叻，咁細個就睇你唔出（佢講嘢真係算厚道！），不過至少屋企都比機會你有好嘅貨同貨架。不過最緊要，都要自己識揀入乜嘢貨先得，入錯都一樣係無用嘅。之後，佢送咗一套「三國演義連環圖」比我，佢話係佢自己第一本睇晒嘅書。
兩個上一代極端嘅香港精英嘅道理同教訓，對我黎講非常深刻。而且我覺得可以跨越年代，對每一個留學生黎講都可以受用。可惜我資質有限，最後都係讀咗一條屎片出黎。不過因為佢地，從初中開始，我就知道做人係要有視野，亦不停去揀「好嘅貨」，同時都經常執貨。
從前至今日，留學，唔識揀讀乜科，又唔知嗰幾年做乜，結果咪只係當有張打工入場券囉！識讀又肯留意多啲嘅，其實可以得到更多。可惜現今有幾多家長同學生明白厘啲道理呢？只係著重名校同神科，將來咪變成高能力低常識囉？而香港亦會唔會再有咁嘅質量嘅長輩，再可以「X」醒我厘類資質低嘅香港蠢仔留學生呢？
#屋企肯出錢去留學
#緊要係讀名校
#亦最好讀神科
#其它嘢唔洗識
#又要識洗識玩識食
#真係簡單
又要識洗識玩識食 在 [討論] 館長模仿賴品妤跌倒是不是又敗票了？ - 看板HatePolitics 的推薦與評價