《論學好英語與食雞的重要性》
最近睇咗的士司機用純正英語大鬧鬼佬短片，揚威港外，深明學好英語嘅重要性。
雖然我哋做得銀行，好多人英語水平都一般般。而呢點我認嘅，第一個舉手🙋🏻。
除咗我之外，分行嘅黑仔王RM英語都係半桶水。雖然佢外表似Uncle Siu，把聲都有啲似，但真係英語有限公司。
話說有一次，有名你叫「黑仔王」，佢無啦啦接咗阿Dino，唔係朗拿甸奴 (00後係咪未聽過？)，而係癲嘅鬼佬。
開頭佢同Dino傾得好哋哋，唔知點解無啦啦得罪咗Dino啲咩，阿Dino突然高八調大鬧黑仔王RM，又擲凳，仲想反枱 (如果張枱反到嘅話)。只見Dino情緒缺堤，不停叫囂「I'm the Boss！I'm the Boss！」仲不斷表示要見老闆。最後老闆當然用360度鞠躬解決咗佢，而Dino亦大方地表示會close晒啲accountsss咁啦。
後來，由老闆嗰度得知，原來係言語間有誤會得罪咗阿Dino，搞到佢覺得黑仔王RM唔尊重佢，然後啲嬲嬲谷晒上條頸，先咁大口氣。所以話，如果向的士大哥學好英語，應該可以霸氣側漏咁反駁：「I don't care you are a boss! You are not my boss! Go back to your country!」
至於小妹，都有曾經因為英語唔夠好而未能同鬼佬開火嘅經歷。眾所周知，灣仔駱克道有好多間酒吧，成日好多菲裔女人喺入面搵食。可能係文化差異引致嘅飲食習慣不同，中午Lunch流流啲鬼佬都會攬晒女，飲晒酒咁嘅，我每次經過都八卦望一兩眼。
啊點知有一次中午經過，喺一間酒吧門口比個飲到醉昏昏嘅鬼佬用枝酒樽截住前路，跟住講咗句「Hey Sweetie, xxxxxxxxxx?」由於小妹未學好英語，聽唔清/ 聽唔明/ 唔Q知佢鬼食泥講咗句咩，就急急腳走佬。
咁走還走，我好有危機意識，邊逃邊用眼尾睄佢，幾驚佢突然惱羞成怒用酒樽扑濕我！好彩，最後佢係一面黑人問號，再做咗🤷🏻♂️(聳肩)呢個姿勢，一路用死魚眼含情默默咁望住我背影直至完全消失。而家睇完的士大哥教學，學咗一兩度散手，覺得當時應該可以咁樣樣回應：「Holy Shxt! You block my way! This is criminal! Go back to eat your chicken!」
講起食雞，除咗駱克道，我推薦大家可以去試下隔兩條街嘅老店悅香。
雞有雞味，堅正。
由於呢篇係論文，我稍為總結一下。身為飲香港水、流香港血嘅港女，學班港姐話齋，要致力捍衛「世界和平友愛」。為咗可以同外籍人士更好地交流切磋文化，以及推介香港正宗美食(🐔雞!)，學好英語係重中之重！
#HappyFathersDay
#BringFathertoEatChicken
圖片來源：Openrice
友愛openrice 在 <屯門> 華記粥品@友愛村 的推薦與評價
小妹妹剛工作出糧請食飯~翻新了的友愛商場新式餐廳她竟然沒興趣, 反而這間粥店合她口味！開頭比佢的店面扼到, 食過先發現原來真係幾唔錯架Woo Lo http://www.openrice. ... <看更多>