《你的名字。》詳盡影評: 時間線及劇情解析、象徵意義
《你的名字。》詳盡影評 分為四部分:
0:09《你的名字。》無劇透影評
1:36《你的名字。》時間線解析
4:20《你的名字。》劇情分析
9:00《你的名字。》各種象徵
足本支持：https://youtu.be/6enmLc4gGSc
各位觀眾可以選擇你喜歡的分段收看。
影評內容
《你的名字。》無劇透影評：
《你的名字。》琴日上映我已經刷咗兩次，我依然覺得仲想再去幾次細味呢套戲。呢套戲絕對係一件藝術品，睇戲嘅時候你會覺得每一秒都不能錯過，因為新海誠嘅作畫同橋圖係非常仔細同埋層次分明，佢係一位好識利用光線同陰影豐富畫面層次嘅人，而「黃昏」都算係一個幾代表到佢嘅元素。另外，新海誠係文學出身，所以《你的名字。》嘅劇本同構圖都有濃厚嘅文化氣息，因為佢對文字有一定獨特嘅細膩度，所以佢同王家衛一樣都好鐘意用讀白反映主角嘅思緒，而佢寫嘅讀白往往能夠增強作品嘅藝術感。劇情上最基本嘅起承轉合都做得好流暢，配合埋RADWIMPS嘅配樂同歌，劇情嘅舖排每一刻我都覺得好煽情，有笑有淚，最後結局令人有想喊不能喊翳住個種感覺，又或者係令你有一行眼淚莫名奇妙不停地流嘅感動。係我心目中呢套戲有非常豐富嘅元素比觀眾進入不同層面嘅思考，包括有夢境、平行時空、時間、宇宙，甚至係前世今生同埋神學，比觀眾嘅想像同思考空間非常大，入場嘅時候唔好當呢套係商業電影咁睇，當你自己入左一個藝術空間，試下喺自己思考從未有過嘅角度切入去感受呢套戲，你對情感會有一種新同深層次嘅體會。
接下來將會先做一個時間線解析，當然就劇透到媽媽都唔認得嘅，我要求各位未睇套戲嘅觀眾睇完先再返嚟再睇。《你的名字。》時間線解析：
1200年前
最早嘅時間係發生喺廸亞馬特彗星喺1200年前第一次墜落，造成糸守町中間嘅系守湖。（喺瀧入左三葉身體同敕使籌備計劃嘅時候敕使上網發現系守湖係一個隕石湖，就係1200年前被隕石擊中）
200年前
之後就去到200年前戲中提及過嘅「繭五郎大火」，當時系守嘅文物同古藉都被燒毀，因此宮水家嘅後人對宮水神社嘅祭典內容同知識都無從得知，只有祭典嘅形式被流傳。
3年前
跟住時間去到3年前，女主角宮水三葉開始同3年後住喺東京嘅男主角立花瀧發生交換身體嘅神秘體驗。喺彗星墜落嘅前一日三葉發現自己似乎鐘意咗瀧，喺大家都唔知有時差嘅情況下三葉去咗東京搵瀧，當時嘅瀧未同三葉相遇根本唔知佢係邊個，而深信彼此一定認得大家嘅三葉大受打擊，臨別個陣瀧追問三葉係邊個，三葉講完自己個名之後跟手就比咗佢條組繩髮帶阿瀧，嗰時嘅瀧就以此組繩當做吉祥物之類一路戴住。傷心嘅三葉返屋企剪完頭髮之後嘅第二日都無返學，夜晚嘅秋祭系守町嘅500幾人因爲彗星墜落而死亡。
3年後－2016
時間再去到3年後，即喺立花瀧交換身體個陣嘅時間 2016年。瀧同三葉依舊喺各自嘅時間交換身體，雖然有時差但各自都順住彼此嘅時間繼續生活。瀧喺2016年10月彗星隕落3週年嘅前幾日同奧寺前輩約會失敗之後，突然失去咗同三葉嘅連繫。失去三葉嘅瀧發覺自己原來好在乎佢，於是憑著依稀嘅記憶去到變成廢墟嘅系守町。喺關鍵時候瀧去到宮水神社嘅御神體中，飲咗三葉嘅口嚼酒，與此同時瀧發現御神體入面嘅石壁原來被刻畫咗彗星一分為二嘅圖案（喺劇情解析嘅部分會講多少少）跌倒之後嘅瀧再次同三葉交換身體，拼盡一切要救哂系守町嘅居民。去到黃昏之時，兩人奇蹟相見，之後瀧就返到2016年，三葉返到2013繼續拯救居民，從此二人不再交換，對彼此嘅記憶就好似發咗場夢咁，慢慢消失，呢part真係睇到好心酸！
5年後－2021
最後去到5年後嘅2021，二人憑住熟悉嘅感覺終於遇返大家，而彼此經歷過嘅記憶都無哂，剩低嘅只有對大家嘅感覺。
《你的名字。》劇情分析：
接住落嚟嘅劇情分析將會係屬於我自己嘅個人理解，開始之前先講少少《你的名字。》嘅構思背景。新海誠由2014年開始構思你的名字。，其中一個靈感源自平安時代嘅小野小町創作嘅歌詞：“夢里相逢人不見，若知是夢何須醒。縱然夢裡常幽會，怎比真如見一回。” 所以戲中有唔少讀白都係關於夢，而整個交換身體嘅經歷最後都好似發完一場夢咁記憶消散。咁究竟件事有無真係發生過呢？以下係我個人對於整個故事嘅解讀。
喺系守町嘅宮水神社供奉嘅神係守護系守町嘅，因為繭五郎大火令神社嘅文化古藉失傳，所宮水家嘅後人並唔知道舉行神社祭典嘅目的同埋神社要守護啲咩，只有形式被流傳落嚟，例如，Musubi（結）、用口嚼酒代表半身嘅供奉等等。而其實當瀧去到御神體跣親見到彗星嘅壁畫，紀錄1200年前第一次嘅彗星隕落，暗示宮水神社其中一個失傳嘅任務就係守護系守避免第二次嘅彗星墜落。雖然失傳咗，但因為宮水神社神明嘅守護，呢個故事就揭起序幕。首先我地要分開瀧同三各自變成對方嘅時間，戲中三葉第一次變成瀧嘅前一段故事係交代佢嘅小背景，包括老豆離開咗神社、組繩嘅意義、宮水神社失傳嘅文化，而其中最重要嘅係佢係神社嘅巫女。巫女係日本神社輔助神職嘅職務，喺古代仲有靈媒嘅身分。三葉當時以巫女嘅服飾用左一個儀式，並將口嚼酒以組繩綁好供奉比神明，根據「Musubi 結」嘅解釋，作為巫女嘅佢同神明一早已有連結，喺儀式過後佢喺神社樓梯大嗌「來生讓我做東京的帥哥」。如果喺儀式過後，將呢個呼喊視之為一個巫女向神明許嘅願，神明就應巫女嘅要求以呢個形式嚟拯救系守町避過天災一劫，順應呢個呼喊戲中下一幕就係三葉第一次變成立花瀧，即刻呼應到所謂來生(死後)成為東京帥哥，因為我地可以睇成係佢死後3年先變成立花瀧。令佢地二人一直連繫住嘅就係三葉喺3年前彗星隕落前一日送比瀧嘅組繩髮帶，宮水家做嘅組繩係「Musubi (結)」、人與人之間嘅連繫、時間嘅流動都係，全部都係神明嘅力量。所以喺瀧第一次變成三葉之前嘅畫面就係三葉除條髮帶比佢個一幕，代表住瀧當時只有唯一一個同三葉嘅連繫，之後下一幕就係一醒咗就發現自己變成三葉。去到劇情中段
瀧變成三葉同婆婆佢地去敬神，呢段比咗好多線索解釋往後劇情。婆婆話敬神就係連接神同人嘅重要慣例，去到御神體，婆婆話個邊係隱世，要返返呢個世界就要用最重要的東西交換，就是口嚼酒，代表住三葉嘅半身，而水米酒都可以係「Musubi (結)」，進入身體就會同靈魂連接。所以當瀧喺2016年追尋三葉去到御神體嘅時候，佢飲完三葉嘅口嚼酒之後可以話係同三葉嘅靈魂連接咗，從而沿住組繩（象徵時間的流動）去到殞石墜落當日朝早，變成三葉拯救系守。另外同婆婆敬完神落山嘅時候係「黃昏之時」，喺個陣婆婆就突然問瀧變成嘅三葉係咪發緊夢，之後瀧就去返2016年扎醒咗。點解會這樣呢？呢個位係套戲第二次提到「黃昏之時」，第一次喺係電影一開始三葉上堂嘅時候老師有講解，「傍晚，非日非夜的時段；世界的輪廓變得模糊，可能看到非人之物的時段。」就係黃昏之時，所以身為神職嘅婆婆喺呢個黃昏之時就開始察覺呢個三葉有啲古怪，亦解釋咗之後瀧同三葉喺唔同時空亦能夠喺御神體外邊嘅山端相見，因為佢地相見嘅時候就係「黃昏之時」，而我認為因為瀧戴住嘅組繩化表住三葉嘅連繫，所以當瀧比返條組繩三葉嘅時候，佢地嘅連結中斷，而喺神明嘅角度，三葉作為巫女經已以此方式改變咗歷史，成功守護系守居民，完全使命，所以兩位就好似發左一場夢咁，各自遺忘曾經擁有嘅經歷。至於最後三葉點解可以游說到佢爸爸拯救系守，有個網站引述左部分你的名字外傳小說嘅段落，我覺得解釋得幾充足，會喺留言擺低來源比大家睇下。
《你的名字。》各種象徵：
1. 3嘅數字象徵
點解要係相距3年嘅時差呢? 3呢個數字有象徵唔同嘅意思，好多宗教都有完美全能嘅意思，而亞厘士多德就認為3有完整嘅意思，基督教都有三位一體嘅講法，耶穌都係3日後復活。所以我會認為3係有人一種重生嘅意味，3年後瀧令所有人復活，令到系守再次變得完整。
2. 5嘅數字象徵
點解係5年後重遇呢? 係日本，數字5有完滿嘅意味。
3. 三葉的髮帶
三葉嘅髮帶有紅線嘅象徵，代表姻緣嘅連結，所以當瀧接下佢嘅紅色髮帶都代表住佢地已經被呢條命運嘅紅線連接咗。
4. 一分為二的迪亞馬特
一分為二嘅彗星有新開始嘅意味，彗星喺原來嘅軌道脫軌並一分為二，可以象徵住開創新軌道，就好似呢個故事咁，兩位主角喺彗星隕落之後踏進人生一條新軌道。*另外彗星命名為迪亞馬特，喺《第十二個星體》呢本書入面迪亞馬特星因為同尼比魯星相撞，一分為二之後大啲嘅衛星就成為而家嘅地球，換句話講迪亞馬特隱喻地球嘅前身。我地可以睇成一個同地球擁有相同靈魂嘅星體每1200年同地球擦身而過並留下不能磨滅嘅印記，同兩位主角嘅經歷都極為相似。
5. 神體嘅所在地
神體嘅所在地係一個圓形，圓形象徵時鐘時間，正正可以映射整個故事。唔知大家有無聽過生命之花，係一個圓形入面，一切都係循環永恆，你永遠唔會搵到邊一點開始，邊一點結束。其實時間都係一樣，永遠無錯嘅時間，只有錯嘅觀念。好多時候你以為開始左，可能已經結束，你以為結束，原來係一個新開始。瀧同三葉，喺呢個永恆之圓最終相見，都可以代表兩位喺「黃昏之時」進入左同一個時間領域。佢地相見嘅呢一part亦都係我覺得最好J嘅部分。
Bonus：言葉之庭的彩蛋
最近送個小彩蛋比大家，講解「黃昏之時」嘅老師服裝同《言葉之庭》嘅小雪老師好相似，而且都係教古 典文學，聲優都係花澤香菜。
以上所有觀點都係我個人見解，而我認為呢套藝術品比我地嘅想像空間係非常之大，如果你有任何睇法都可以留言討論。因為我真係好中意呢套戲，第一次用左咁多時間去出影評，如果大家好睇嘅希望你可以分享開去比更多人感受，如果呢條片能夠有史以來突破5,000likes我會出多一條相關影片助興，你地都可以留言提議主題。期待我新片就記得㩒下呢個訂閱製啦，仲有隨時like我Facebook IG催我出片或者睇下我會出咩片，多謝你支持
#你的名字 #影評
