唔知大家有冇留意我哋喺東涌有一間牛角次男坊,食丼飯的。 唔使我講大家都想像到當機場旅客下跌99.9%,生意都唔會好。 近呢大半年其實主要都係服務區內的機場員工及區民。國泰大裁員當然令到我哋更加困難,啱啱星期三開會提到呢間分店的困難, 但係我當時心諗我哋點困難都唔會有國泰員工咁困難,就同負責嘅同事講:「其實我哋啲同事長期服務國泰員工,可能有啲根本都變成認識,會唔會心裏面都想表達一啲感情?」 負責同事有啲愕然然後話俾我聽:「都會有㗎...」然後有同事提議不如整啲崗位等國泰員工申請,但係坦白講如果我哋啲崗位合適國泰員工自己都會嚟申請啦唔使我地特登搞啲乜,咁作為一間卑微嘅食店我哋其實有乜嘢可以表達心意呢? 我叫管理層去分店問吓同事意見做得到嘅我實支持。 最後佢哋自己寫咗張卡貼喺在店舖出面,攞咗公司本來準備用來做推廣嘅鮑魚,送俾國泰員工。 有同事知道之後都好感觸講:「雖然係少少野,以前成日希望坐飛機upgrade機位,希望這鮑魚upgrade可以代表到我哋小小心意。」
#同事關懷社區我做老細都安慰
Search