《祝君好》
♂：早晨
♀：早晨
♂：有冇諗過今日我唔再同你講早晨呢？
♀：諗埋如果你唔講就到我block你添
♂：朋友都可以講早晨既，我決定左一世都要同你講早晨喇
♀：唔好隨便承諾呢d野
♂：我諗左一晚，覺得自己做到先至敢講，所以你可以認真記低
♀：就算我拍拖，我結婚，我生仔，你拍拖，你結婚，你生仔，你都會繼續講？
♂：除非我死，唔係我都會同你講早晨
♀：好……你咁講我就咁聽，但我唔會認真，唔係傷心既係我自己
♂：岑雪兒，我諗唔明自己點解要傷害你
♀：因愛成恨呢件事唔係好普通咩
♂：你又無對我做過咩，點解我要恨你？
♀：無人可以長期付出而不求回報，如果我拍拖結婚生仔，唔再同你每日傾，甚至你講早晨晚安都唔回你，咁樣你仲會繼續咩？
♂：打四隻字，我唔會要求太多
♀：咁即係一個原因，你唔再愛我，當唔愛一個人先可以無所謂
♂：記唔記得之前講過鍾意同愛既分別，鍾意一個人，係因為佢做左自己想要既野，但愛一個人，係你以對方為先，我開始明點為之愛，愛並唔需要對方做乜，只要你開心就好
♀：點解你要愛我？
♂：應該就係呢段時間同你相處既感覺，我覺得自己唔會再搵到超越甚至類似既感覺
♀：成世人流流長，話唔定聽日你就會遇到呢
♂：可能既，如果我真係搵到，我會同你講，然後同你道歉，我唔可以再同你講早晨同晚安
♀：你發生左咩事，好似唔同左咁
♂：諗通左野，同埋知道自己位置
♀：係既，所以我話做朋友都係唔錯既選擇，起碼位置上大家無咁多負擔
♂：現實同寫故事唔同，寫故事我可以一句講，主角用左半年、一年、十年去令自己成長，然後成為更好既自己出現係女主角面前比幸福佢，但現實可悲既地方係，日子係一日一日，你再努力都需要時間
♂：呢段時間入面，主角有幾努力都好，都會唔開心，都會煩惱，引發磨擦，失去耐性等等，我發現現實唔可以好似故事咁一味激情，有時慢慢黎先至可以有更好表現
♂：對你，我唔可以再快喇，某程度我都係好執著想同你一齊，所以用一個唔同你失去聯絡，唔令大家愛同感情磨擦既方式去相處，咁起碼先有一線生機，大家都唔會咁辛苦
♀：佢叫Michael，之前有段時間，我係住係佢租比我既地方，我出道無耐就係個酒局認識佢，佢好成熟好體貼，從來唔會要求我為佢做乜，但我講出口既佢唔會拒絕，我唔講出口既佢都做到足
♂：完美男人？
♀：以條件去講，以誠意去講，佢都係完美
♂：咁點解你唔同佢一齊？
♀：佢有老婆
♂：如果佢無老婆呢？
♀：因為識左你，我離開左佢租比我既地方，搬左返去屋企，本來我想同佢結束，但佢最近同我講，佢已經同老婆講左離婚，話想同我一齊
♂：難怪，多謝你肯同我講，我諗你都搞清楚我地既位置，真係當我朋友先講
♀：我同佢好奇怪，唔似同你會每日傾好多野，佢只會講幾點係邊食飯，幾時想見我，從來都唔會傾閒計
♂：所以我既優勢就係呢樣
♀：係，有一刻我覺得，我真正想要既可能唔係條件，而係一個真正想了解我融入我生活既人
♂：你肯見佢，會諗，已經係一種選擇，即係你仲猶豫緊要揀邊個
♀：我知你未必信，但我係想係呢段時間同佢結束
♂：呢方面我唔評論，你自己決定你想要既野就得，我份人都幾有耐性既
♀：你會唔會睇唔起我
♂：唔會，我只係覺得如果我早少少成熟，或者你就會無咁辛苦
♀：佢大我十年有多，如果我想要成熟既我就一定會揀佢，佢從來都唔會好似你咁發小朋友脾氣，我搬走個陣，佢一句挽留都無，佢知道個問題係乜，直接處理完先再出現，比起你，的確係成熟到恐怖
♂：我都想成為佢咁既男人
♀：你都係唔明……
♂：我諗我需要少少時間消化下，晚安
♀：晚安
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
