*嚴禁劇透*
*粗口自行過濾*
*外表可讚免彈*
*可瘋狂話戲屎但免人身攻擊*
[方以文問兩句][何廣沛 郭子豪 張彥博][Part1]
>>>
https://www.facebook.com/…/a.10913097475…/2065981856799182/…
[方以文問兩句][監製 方駿釗][Part1]
>>> https://www.facebook.com/…/a.10913097475…/2056370151093686/…
[1230隔夜超短劇評][TVB][跳躍生命線 EP25 大結局]
[讚] 馬神由上集喺電話聽到Man有事開始，到今集一開波上救護車，再去問天，畀足晒位表演，交晒功課。呢個要嚟做今集大結局嘅開頭有氣勢。
好鍾意在哥身邊永遠都有阿芯嘅存在，阿 Man話係死亡隧道見到藍色光就諗起在哥。初時我都諗唔到點解係藍色，又諗唔起係關阿芯嘅骨灰鑽石事。但佢一講嗰吓我真係好感動。到最後醫生見到在哥諾兒，在哥同佢講句唔該，醫生流眼淚，我都好感動呀。話就話係移植眼角膜之後嘅多淚水分泌情況，但原來個眼角膜係車死阿芯嘅林茂祥捐出嚟。除咗係因為林茂祥間接救返諾兒還返畀在哥之外，其實都係呼應返今集其中一個主題，就係緣份。講到底，可能都係阿芯一直守護住諾兒同埋在哥，佢哋先至平平安安。
阿Man今集同在哥又見到反曙暮輝，每次出現我都覺得係阿Man嘅男朋友出現。不過今次就唔同咗，阿Man之前每次見到都好不安，諗返起被困雪山嘅經過，但今次佢可以對住反曙暮輝笑。由傷痛變做祝福快樂，係可以嘅，但有快有慢，又要睇際遇。
魯賓遜都係咁，唔記所有嘢，甚至連老婆走咗都唔記得，或者佢都已經唔記得喺條街影相係為咗畀老婆睇，但都依然記得要喺街度影相。呢個回憶對於魯賓遜嚟講係同老婆最後嘅連結，佢今集話好痛，係因為佢知道呢個連結已經變咗質。但最後呢個連結轉化咗，最尾叫傑仔拉開個幕嗰吓，由痛變咗做接受。
呢種轉化亦都喺裘叔同埋小蝶身上見到，食完中秋飯兩個人喺電車路度行，其實行嚟行去都係跟住個軌跡，喺個循環度兜兜轉轉。過去嘅扭轉唔到，到你有一日放得低就係放得低，係一吓嘅事，未必有真正事件發生咗而引起。今集小蝶對返裘叔好少少係咁。好多集之前祈祈放低咗angus都係咁。
如果單睇今集，係講緣份，係講過去珍惜嘅會一直陪住你，傷你嘅有一日會變得無關痛癢，咁都真係幾中。
[彈] 但如果係當一個大結局咁睇，呢集又真係差咁啲。一路講嘅「無常就係日常」、「意外無常」、「奇蹟希望」，今集只係集中講奇蹟希望。或者你會話咁之前講晒啲無常意外嘢，今集講奇蹟希望都好啱數呀。咁聽落就啱嘅，但如果係一個大結局，我希望啲事件係一啲主軸線嘅收尾。睇返今集，「阿芯一直喺在哥身邊」應該係個主軸嚟，但可惜之前咁多集在哥都係帶吓帶吓，得幾集做主，完全托唔起個結局。呢個亦都係有觀眾話第21集開始唔好睇嘅原因，就係因為之前描寫在哥時不痛不癢，如果之前在哥生活當中出現多啲阿芯嘅影子，最後何詠倫單嘢又可以同阿芯單嘢有啲對比或者加埋阿Man落去的話，咁結局週呢五集就唔使跌watt得咁離譜，完全好似係Season2咁，諗諗吓四集何詠倫可以剪走佢，仲完整。
好多人聽到係音樂情人鄭子誠做旁白就話好正。咁鄭子誠做旁白梗係滿分啦，但對於套劇嚟講又係另一回事。本來佢唔喺結局出現，我都可以當個旁白係鄭子誠，但依嫁刑sir出現喺長沙灣消防局，咁佢旁白就再唔係鄭子誠，而係刑sir。由刑sir去做大結局個VO呢個安排真係失咗手。畀在哥講可以力挽狂瀾加強返佢最後五集嘅力量，畀傑仔講可以勾起返佢由小巴司機到救護員嘅經過仲有救過啲乜人。如果畀魯賓遜去講個旁白就仲勁，真係用一個全面旁觀者嘅角色去講，又可以強化返最後一幕仲有roller啲相嘅感覺，我哋做觀眾呢個旁觀者就最有共鳴。呢三個人選明明都係好過鄭子誠（重複呢個係指結構上，而唔係旁白技巧上，雖然KK講都應該會好正）。
另外，我同大家一樣都好鍾意KC同Terry，但喺另一套劇度用嘅時候真係要好小心。今次劇組搵李偉健嚟做，又係叫Terry，又安排歐瑞偉同場，明顯係食《愛回家》條水。但真係太搶，Terry感勁重，寫佢有準備防曬蚊怕嘢，又準備咗一蚊，明顯係雄姐嘅延續版嚟，亦都可以呼應返套劇話緣份呢件事，可惜呢個安排就畀Terry overwhelm咗。如果有歐瑞偉，我就一定唔搵李偉健。最好就搵一啲以往都演過救護員嘅演員，咁又可以玩吓嘢，又唔會太過火。
冇BBQ，但個大食會仲無謂過BBQ。想玩嘢變咗拖低個劇嘅質素，得不償失。
[維基百科話你知][拉撒路綜合症]
拉撒路綜合症（Lazarus syndrome）是指在心肺復甦失敗之後人體循環系統自發地恢復運作。自1982年以來，它已在醫學文獻中至少有了25次記載。又被稱為拉撒路現象（Lazarus phenomenon），是以聖經中的拉撒路來命名的，在聖經中，他死後耶穌將其復活。
對於這一綜合症的出現原因，目前仍沒有很好的解釋。一種理論認為，其主要原因是在心肺復甦過程中胸腔內累積了壓力，在心肺復甦結束後這些壓力的釋放導致心臟的擴張，從竇房結出來的電脈衝觸發了心臟的跳動。
[演員表] 馬德鐘 飾 麥在田 / 何廣沛 飾 卓家傑 / 郭子豪 飾 陸昊然/ 張彥博 飾 呂劍雄 / 張曦雯 飾 文暉 / 劉佩玥 飾 章可祈 / 陳瀅 飾 向滿月 / 羅天宇 飾 譚家俊 / 韋家雄 飾 高行仁 / 張文慈 飾 麥愛花 / 李成昌 飾 卓裘 / 歐瑞偉 飾 王海 / 陳偲穎 飾 麥諾兒 / 李霖恩 飾 常朗天 / 陳偉洪 飾 余國榮 / 李日昇 飾 張啟冠 / 崔建邦 飾 羅應佳 / 張國強 飾 魯永健 / 楊卓娜 飾 游子嵐 / 羅蘭 飾 李英愛 / 蘇恩磁 飾 何鳳蓮 / 楊卓娜 飾 游子嵐 / 謝雪心 飾 湛小蝶 / 鄭子誠 飾 刑峰 / 溫裕紅 飾 祥嫂
#1230隔夜超短劇評 #無綫 #TVB #跳躍生命線 #馬德鐘 #何廣沛 #郭子豪 #張彥博 #張曦雯 #劉佩玥 #陳瀅 #韋家雄 #張文慈 #李成昌 #歐瑞偉 #陳偲穎 #李霖恩 #陳偉洪 #李日昇 #崔建邦 #張國強 #羅蘭 #溫裕紅 #謝雪心 #鄭子誠 #方駿釗 #冼翠貞
