【深夜長文】
曾經我不下一百次去幻想，企上呢個台係咩感覺？我幻想過經過左咁多年，我終於去到一個里程碑，會同你地一齊笑住打機做埋好多唔同嘅傻野，之後嘻嘻哈哈渡過半個鐘；我幻想過可能係走高手向，播住自定BGM 出場，補多句「我終於黎到呢度喇，佐為」，之後一命爆機咁完成整個Event ，好多好多個唔同嘅方法，好多好多個唔同嘅場面。
我自己都係一個好鍾意FF嘅人，由當日我得1000個followers 都唔夠我就開始幻想呢一日。
到兩個月前左右，有關同事打比我邀請我去參與呢個盛事，我真係開心到成晚都訓唔著，呢間遊戲Event 我去好多，大部份都係用記者身份做；以KOL身份做，仲要上台嘅，真係第一次，好似一開始咁講，呢個係一個里程碑，我用「希治閣」呢個名去做遊戲相關事終於叫有人識。
到6月初發生住唔同嘅事，每星期都發生唔同情況，其實我都有諗過唔同情況，我記得有朋友問過，如果取消我會唔會好唔開心？其實當下我都好想講，依家仲打機，好似唔係太好。去到今日上台之前，我打開手機，望住D新聞，真係同自己隔一兩條街架咋。個感覺真係好強烈，一邊班朋友歌舞昇平，一邊班兄弟出生入死，有好幾個朋友都同我呻話真係好辛苦。
我同平時同大家講嘅一樣，話每個人都係一條橡筋，我地唔可以扯到太盡。出到去我地可能只係一個和理非，但我地最大嘅作用係我地可以做嘅就係幫其他和理非上電，我明白一定會有人話「呢個時間仲做Job 打機有冇良心？」，我身邊好多朋友都比人咁鬧，但其實大家一做完手上面嘅job ，唔少人就會即刻飛返出黎，用另一個身份企喺大家之中。
今日event入面，當我除底VR，望落台下面，好多我熟悉嘅面孔都無喺度，我心入面有一部份嘅自己以為，我一定會好失望；但最後我真係好安心，因為呢個時間大家應該喺一個更應該出現嘅地方。
多謝每一位巴打嘅付出，大家一定要小心，到我地爭取到我地爭取到嘅野，到時，我再喺下一次Event嘅台上面等大家。
ps.今日大叫Titigu 嘅巴打，Sorry呀，台上面個喇叭真係太勁我聽唔到，我都係事後先聽返朋友講先知，我唔係特登唔應架。
#唔出相喇
#唔想搞到人地公司
#其實好多人都付出左好多努力
#唔好灰心唔好放棄
#呢幾日大家個心都好亂
#灰埋今日好喇
