2016年1月25日，首播《棉花小餐包》呢集，寫呢個食譜，因為兩個原因：
1）某日睇某節目，有麵包師傅話「唔落添加劑，唔會整到鬆軟麵包」
2）剛好有讀者要求我做老人家嘅牙食到嘅包
因為1），我有啲唔忿氣，點會呢？我就要寫一張無牛油、少糖、無植物油、無漂白麵粉、無煉奶嘅食譜（原來依家啲人叫煉乳，但其實如果係道地香港人，會叫煉奶，例如壽星公煉奶、鷹嘜煉奶）。
研究咗好耐，發現唔容易，本來想擱置，但咁啱輪到2）出現。讀者有需要，再難我都要寫好，於是又再埋首鑽研，不停叫自己「堅持落去，讀者收到食譜會好開心㗎！」
終於，寫好喇！但如果就咁叫「無牛油小餐包」，好似太求其，咁可以叫乜好？鬆軟小餐包？軟熟小餐包？枕頭包？哎呀，諗唔到呀！
就咁啱，我拎住舊化妝棉🤣拍攝完正在落妝，就叫「棉花小餐包」啦！
食譜出街之後，我記得當時有幾千個讚，好多觀眾一窩蜂跟住節目整，整完仲拍片「將餐包按扁、回彈」嘅畫面，果時香港唔興咁玩包㗎，但一時間，大家都開始咁玩都包，個個變鼓手喺自己片段中將小餐包拍完又拍、同小朋友一齊撳、自己再忍唔住拍多吓🤣
眨吓眼，2020年喇，日子過得真係好快，仲好記得想當年，無牛油減油鹽糖食譜係香港並不受歡迎，根本無乜人睇，堅持到今日，總算行出自己一條路，尋日出咗棉花小餐包3.0，期待日後嘅4.0、5.0、6.0！
