《 唐人 》
其實唔識嘢唔緊要，千祈唔好衝出嚟柒。
即係689樣衰唔緊要，唔好再著埋曬啲鬼五馬六乜嘢漢服出嚟嚇人。
教育局唔知去邊度引述一個姓宋嘅乜水去解構粵語，佢自己唔識廣東話，又話乜嘢粵語屬於漢語，又乜嘢漢族漢人…… 淨係講漏咗漢奸。
我唔知點解南蠻地方嘅夷人粵語會屬於漢語？
咁台灣高山族嗰啲泰雅語屬唔屬於漢語？
秦始皇統一六國關唔關事？
而家一帶一路嘅國家，由印度至中東， 好多都仲將中國叫Chin，我曾經喺土耳其搭的士， 唔識英文嘅的士佬問我 Chin？Chin ? 開頭都唔知佢點解，後來先明白佢問我係唔係 from China， 有一種推論，話 Chin 即係強「秦」流傳落嚟嘅讀音。
另一個說法，如果唔係仁勇兼備（匹夫之勇 婦人之仁）嘅項羽最後一刻衰咗畀劉邦，今日我哋就唔叫漢人，變咗叫楚人、著楚服講楚語。
當然，最冇得爭論嘅就係大唐盛世，四夷臣服，所以而家全世界仲有唐人街，食唐餐講唐話，返唐山即係返中國(當然唔係解唐山大地震嗰個唐山)， 由李小龍《唐山大兄》開始，帶起著唐裝嘅風潮。
呢度要再插689兩句，佢推廣「華服節」都可以著唐裝，起碼真係可以著出街見人，唔係闊袍大袖扮到成個太監咁樣衰！
咁到底乜嘢係中國嘅國語？
乜嘢係唐人嘅母語？
唔該班有識之士唔好9up當呼吸，長篇大論扮曬專家。
答案就係睇下邊個做緊皇帝。
李懂媽
