19.10.2018 (閃光長文慎入)
今日係我同老公15週年拍拖+結婚紀念日😜
我想藉呢個專頁讚揚一吓我嘅另一半:
即係湯唯、藍妹、細佬、金寶湯同羅宋湯嘅爸爸😎(下稱湯爸啦🤣)
我同湯爸係中學同學,
數數手指,再數埋腳趾,原來跟咗湯爸15年了。
每一年嘅今日我都會回顧返當初一齊時嘅點滴,因為我好怕我會唔記得。
記得中五時Boyz啱啱出道,我好愛關智斌Kenny, 湯爸為咗引我注意,佢就改自己英文名做Kenny🤦🏻♀️
我哋班有晚喺學校bbq,個時我哋icq曖昧中,bbq完我拎垃圾去後門揼,湯爸跟埋過嚟,個刻得返我哋兩個,我仲以為佢會同我表白,嚇到我個心噗噗跳💓,結果......我哋一句話都冇講過🤣
而最後,膽小的湯爸都係用返icq表白哈哈哈哈😅(佢解釋佢唔係膽小,而係謹慎喎...)
個時日日放學一齊去石硤尾邨買章魚小丸子加包維他奶,拎去嘉頓後面公園食,再行到長沙灣都唔捨得講拜拜,最後湯爸陪我搭2F,去到佢屋企樓下佢先肯落車(其實只有3個站),原來係為咗喺巴士藉機會拖我隻手😆
我哋中學時期嘅日子就係咁平凡而簡單👍🏻
咁多年嚟,湯爸對我講嘅甜言蜜語少之又少,無論我發幾大脾氣佢都由得我發,唔會同我鬥咀,因為佢知道我發洩完就冇事,千祈唔好再撩起我把火就得,雖然我唔鍾意呢套方法,但喺我身上又真係work個吓先死🤦🏻♀️
湯爸少說話,多做事,佢會用實際行動去表現對我嘅關懷同愛護,例如我第一次領養湯唯,佢口裡講咗一千次唔願意,又話唔會理湯唯,又話自己好憎貓,到最後佢反而比我更「喵奴」:怕湯唯熱、怕佢涷、怕佢唔夠食物、怕佢瞓得唔舒服,每次上班時都會打俾我噓寒問暖.....係問湯唯🤣
之後分別領養藍妹同細佬,佢又係一千個唔願意,但都接咗佢哋返屋企,發現佢哋有唔同嘅毛病,湯爸又毫無怨言地帶佢哋出入獸醫診所多次。每一次我嘅決定,湯爸都默默接受,仲一力承擔(受),你哋話呢啲絕種男人邊度仲有呢?
之後金寶湯出現了,36週產檢當日,發現金寶湯同34週一樣,冇大到,再加上我當日驗到有尿蛋白同高血壓,醫生話係妊娠毒血症,決定當晚就要緊急開刀,否則我同bb性命會有危險,因為太突然,我同湯爸咩都未準備好,(連bb床都未送嚟)金寶湯就出嚟了。
出世時金寶湯好輕,又有黃疸,我哋又冇請陪月又冇工人,湯爸真係一腳踢,唔識幫bb沖涼?上youtube跟片學;唔識整炒米茶?湯爸抄網上食譜,然後炒俾我飲🤣不過始終金寶湯係早產b,要照顧佢真係好困難,臨急臨忙又好彩搵到個好陪月可以即時開工,我同湯爸先鬆一口氣。不過頭一個星期湯爸對金寶湯嘅照顧,我敢講佢已經💯分,可以考到陪月牌喇🤣👍🏻
湯爸喺我心目中係一個超人,雖然佢會怨我專揀啲吃力不討好嘅工作嚟做,但佢又會一直喺我背後支持我,扶助我,只要我想做到,佢就努力幫我達成,我覺得自己好幸福,因為我遇上你,你完全豐富咗我嘅人生,你不但係我嘅老公,我嘅情人,仲係我嘅摯友,我嘅soulmate,我好慶幸一早已經認識你,俾我mark實你,等我無後顧之憂想做咩就做咩,你就做我嘅back up。
15年過去,我決定由喜歡回顧轉變為展望未來😜聽日,我哋將會迎接我哋新成員-羅宋湯出世啦🎉我哋將會由一家六口變成一家七口,希望我同湯爸繼續謹守我哋嘅崗位,做好父母嘅角色,做好夫妻嘅角色,同埋做好喵奴嘅角色,我哋一同努力建立同維繫我哋理想中嘅Tong’s family好嗎?
#每年一曬😎
#loveyouforever
#幸福從身型顯示出嚟
#咁多年我哋夾埋重咗60磅
#生完羅宋湯要一齊減肥
#之後每年展望幾時退休環遊世界
#我唔是魏瓔珞
#我愛你我會講出口
#夫妻相處之道
#就係咩都要講出嚟
#嗌交唔可以隔過夜
#做父母要有教育共識
#邊個做好人邊個做醜人定齊齊做壞人😈
#做喵奴要明白一日奴才一世都係奴才
#唔好期望付出同收獲成正比🤣
#lovestory
#couples
#pregnant
#babies
Search
唔好期望付出同收獲成正比 在 CTgoodjobs - 一家公司的好與壞,好大程度上睇下佢有無珍惜你嘅 ... 的推薦與評價
... 上睇下佢有無珍惜你嘅付出。 #付出同收獲#都要成正比#CTgoodjobs. ... 對公司額外的付出,是賺到了,還是蝕到了? ... 【見工面試】見工應該點樣講自己期望薪金? ... <看更多>