讀者投稿《唔抵得人好姑奶奶奶篇》
背景：奶奶同姑奶們本身人品唔差，對我都好好，但唔知點解成日唔抵得人好咁。C6除咗有時唔知點解會撞邪咁聽佢哋講之外，一般情況下都係企係我呢邊。
1) 阿B未出世前大約1個禮拜見佢哋一次，見親都問有無打算餵人奶，係個個禮拜都問一次。坐月期間差唔多隔日就係 whatsapp 群組問一次全人奶未，好煩。到有一日頂佢唔順，話俾佢哋聽已經全人奶好耐，仲有多做冰奶，答完後無任何回應，然後從此無再關心過阿B食咩奶。之後有一次問老公，姑奶們自己都係餵人奶？老公：可能有餵過下，但好快就轉咗奶粉啦！
2) 到阿B開始加固，我哋行 BLW，見到我哋唔跟傳統餵糊餵粥就話我哋會哽死佢，又話我哋自創埋啲9唔搭8嘅方法。啱啱加固時，C6係群組send阿B食嘢嘅片，就即刻七咀八舌話我哋累死阿B。到一歲時，send阿b自己用餐具自己食飯嘅片，又係即刻潛哂水，唔出聲。一齊出嚟食飯，全部人只係集中稱讚其中一個姑奶個4歲睇住 iPad 被餵飯嘅女，話佢今日無走嚟走去好乖。我阿B當時一歲，全程自己坐定自己專心食，圓枱咁坐佢哋都可以特登唔望佢，當見唔到佢自己食。繼續講 “你哋小心哽死佢呀！”
3) 阿B個零月果時一齊出街食飯，聽見我講阿B開咗大，要帶佢去廁所換片，奶奶即刻搶嚟即場換，一邊換啲姑奶一邊講 ”阿媽將阿B打撗放係大脾單手就換到片，呢啲嘢你哋啲新手父母唔識 ga la”。頂你個制，我識不過我唔會當眾換片好唔好？你有無考慮過餐廳裡面其他食客嘅感受？文明啲得唔得？而且阿B都有私穩，點解你要逼我個仔當眾露械？你咁鍾意露就除你自己個仔條褲，唔好搞我個仔！
4) 成日問幾時生多個，成日問C6阿X (即係我) 幾時肯生多個，一係就叫C6唔小心整大我個肚。唔知以為我10年前生咗個仔就唔肯再生，其實我個仔啱啱先一歲多啲咋！答咗佢哋N咁多次我哋會再生，但唔想太近，我哋有計劃 ga la，都係繼續講。唔好以為佢哋生好多個，5個姑奶裡面4個都只係生咗1個就收工，你老X！
其實你哋鍾意周街換片，哂你高超嘅湊B技巧，係你嘅事。你哋鍾意餵奶粉，鍾意豆腐都要剪，鍾意餵到啲仔女10歲，仲要俾電子奶咀，都係你嘅事。我明白人人教仔方法都唔同，一直都無出聲，點解你哋要咁多事，講嘢咁難聽？
投稿者補充 22:20：
可能之前寫得唔清楚，引起大家誤會，有少少嘢想澄清返。
從來都唔覺得餵人奶有幾偉大，或行 BLW 有幾威。真心覺得家家嘅教法都唔同，亦唔需要人認同我哋呢一套。
生前生後都係本住餵到就餵，餵唔到就食奶粉嘅心態去餵人奶。介意佢哋係個 group 問嘅原因係，因為 group 內仲有佢哋啲老公、仔、春秋2祭先會見嘅親戚等十幾廿個男人。成日要我係呢班男人面前答夠唔夠奶，講真好尷尬。唔答會追問，quit group 會加返你入嚟的。
BLW 方面，每次都係佢哋係個 group 問阿 B 加固進度如何，C6 先會 send 片，但每次嘅回應都係話我哋會哽死佢。其實你唔認同我哋呢套，真係唔緊要，我哋亦唔覺得 BLW 叻過傳統餵食，每個家庭嘅教法都唔同，但唔好問完又話我哋害死個仔。
最近生咗第二胎，第一次見細 B，即問幾時生第三胎，豬乸嗎？咁鍾意小朋友，你哋個個只生一個？
#退一步海闊天高
#我的極品四大長老
