<<比"let it go" elsa更有勇氣嘅包山王>>
話說今日下晝，去咗睇一套港產片<<獅子山上>> …
(放心以下冇任何劇透) 呢套由梁國斌執導，林德信同衛詩雅主演嘅電影，根據真人真事改編拍成，講述包山王黎志偉，喺一場交通車禍之後半身癱瘓，由一個職業攀石運動員，搖身一變成為傷殘人士。 其中亦記錄咗黎志偉嘅一個創舉，就係坐住輪椅爬上獅子山。
電影入面係提及咗好多香港嘅社會問題，包括醫院 人手短缺，睇病嘅輪候時間過長，傷殘人士申請政府資助面對冷言冷語，運動員申請職業運動員補貼嘅困難，政客利用傷殘人士做宣傳同公關，香港人對於殘疾人士嘅表面同情，內裡嘅嫌棄。總括嚟講，呢部電影絕對唔係一部<<一公升眼淚>>, 唔係煽情逼你喊勵志電影。而係真實呈現一個傷殘人士，喺香港地生活嘅難處。
喺咁艱難嘅香港環境，面對咁不幸嘅心路歷程，當事人黎志偉話，佢就係發揮李小龍嗰隻be water嘅精神。
睇完呢部戲，完場嘅時候，電影導演梁國斌就喺戲院匆匆忙忙咁出現，第一句就單刀直入，話呢套戲嘅票房相當之差。而家市道冷淡，呢個時勢大家冇心情睇戲，亦由於下個星期迪士尼會推出elsa嘅第2集，於是呢套戲應該好快就會落畫。
我係從來唔會因為要鋤強扶弱，或者發揮同情心就 推介一套電影。正如我唔會盲撐唔好食嘅小店，我係真係覺得呢一套戲，好真實咁講述到香港傷殘人士面對的困難，所以想推介畀大家。(另一個電影亮點，係呢套戲揾盧覓雪飾演包山王嘅攀石教練，係咪有驚奇先)
近幾年大家會投訴市面上有太多嘅合拍片，演員都返大陸搵人仔，其實如果大家唔想合拍片成為主流，就應該入場支持港產片。大家覺得公眾人物或者藝員，喺呢個時勢都唔敢表態，驚失去大陸嘅市場， 咁我諗如果大家撐港產片，就會有多啲明星或者公眾人物喺香港有生存空間，搵到食就唔會依靠大陸，佢地就敢表態。
大家可能話呢個時勢，睇戲尋開心會感到內疚。其實大家已經冇任何嘅entertainment, 保持快樂，維持正常生活，抗爭時be water，培養鬥長命嘅心態，先可以喺長久戰得到最後勝利嘅。
#eason嘅演唱會都取消埋就睇下港產片啦
#那懼牆攀不上
#唔需要因為今日去尋開心搵快樂而感到自責
#食野都揾黃店睇戲睇港產片啦
#希望唔好俾elsa霸哂所有場次啦
#let_go啦elsa
#有冇人覺得elsa好煩
#獅子山上
#黎志偉
#如果你唔識勇武抗爭就發揮下消費力啦
