對於今屆施政報告，很老實說，我係俾佢殺左個措手不及。你見我呢兩日都好好人咁主力出啲輕鬆文，就係為左留返大家啲力去聚焦婊爆個施政報告。
老實講，呢個報告黎得非常溫和，所有重要議題都先迴避，連報告時間都縮短，以免講多錯多，你以為林鄭係CY2.0、好打得？佢係打得，但佢走嘅根本不是CY拳拳到肉路線。佢係唔會同你打，個施政報告望落去第一眼，竟然感覺上算係正常，你就知佢內功幾咁深厚。
無錯，呢個施政報告就係典型的「唔做唔錯」，就連我呢個死八婆都搵唔到佢有咩野可以「婊」揚。
結果大家都係走晒去講一百幾十蚊車船津貼，01仲要出埋計數機俾大家好似mpf咁計...(facepalm) Come on... 老麥轉個減價餐都唔止幫大家慳咁少啦下話？你地係咪真係窮成咁？！普選呢？鉛水呢？醫療爆煲呢？學位教師問題呢？學童自殺問題呢？單程證及假難民問題呢？嘉湖山莊個泥頭山呢？僭建呢？丁權呢？最高工時呢？收貨啦？
佢唔講，媒體同議員們就唔識問架啦？依家唔係林鄭出題，然後你地班奴才應制，佢閃，你就要主動去捉佢，如果唔係年年施政佈告直情同你講廢話，然後各個部門「遍地開花」，推普教中兼愛國又得，推任達華出黎飲水食卡士蘭亦得，得左！你地到時逐個逐個捉得幾多單黎講？
我依家睇facebook，好似睇緊《賭俠》咁，林鄭就在你面前收埋一堆問題，不停地講「你睇我唔到、你睇我唔到」，然後全個社會，真係睇佢唔到。唔係呀嘛？！
另外，粵港澳大灣區辦公室有冇人跟？入面搞啲咩？搞條港珠澳都傾家蕩產了，依家成個粵港澳大灣區會唔會教香港傾國傾城？你睇大陸報紙佢地超期待的，你唔驚呀？你仲喺01度拎部計數機督乜鬼呀？慳個幾十蚊，賺左都唔夠買聰明豆幫你補腦啦陰功！
最後，仲要搞個鄉郊保育辦公室黎「促進偏遠鄉郊的可持續發展」，其實你唔好發展就自然可以持續架啦，邊次政府唔係一講「可持續發展」，嗰樣野就即刻唔可以持續？佢個報告提及嘅荔枝窩，可持續到上兩個月鋪左條石屎路出黎，紅樹林仲要唔見左一忽。我好懷疑鄉郊保育辦公室的職責就係郊野版的城規會。自從有左城規會之後，香港仲有邊一棟古蹟唔係死得特別痛快的？有冇環保界的朋友出句聲？
#香港真係好窮
#原來一百幾十蚊就可以引導風向
#你叫CY情何以堪
//呢個我諗就係現屆林鄭政府嘅戰術。
輿論上嘅滴水不漏，表面上不作為，亦同時係不讓對方有作為。
佢知道反對派一定要搵嘢去反對，只要無乜嘢好反對，咁反對派提出嘅反對就會非常咁小學雞。
例如鋪天蓋地咁講嗰一百幾十蚊。
講完有無用？有架，又係政府好衰，小恩小惠都無丫，俾乞衣都五百丫，而家俾幾十蚊我丫，咁囉。
#和平真好//
反對派搵唔到更勁嘅嘢笑啦？係好小恩小惠啊，咁又點呀？依家，佢就係話俾你知，香港人要呢啲小恩小惠已經好開心。係你唔夠貼地咋。落政府總部前地又開返啦，跟住呢又話俾你知佢記得普選個喎，你仲可以用啲咩位入去呢。唔係冇嘅，我又唔係幫泛民打工，我食餐飯睇吓black mirror好過啦。好犬儒啊？係咁㗎啦。
#犬儒？
#問吓唔犬儒果啲點做囉
