《喜劇之王》中的專業精神
—
「我要初戀呀！初戀呀！初戀呀！」
—
喺《喜劇之王》入面，龍少爺大鬧夜場，醉住咁話要搵初戀，但無論燕瘦環肥嘅舞女都唔係佢杯茶，佢仲將眼前嘅所有嘢掃曬落地下。喺情急之下，飾演柳飄飄嘅張栢芝將地下嘅WASABI塞曬入口，辣到紅都面曬，流埋馬尿。
—
「我係真心㗎！我真係愛你㗎！」
—
就係呢對水汪汪嘅眼睛，征服咗龍少呢個麻煩嘅有錢佬，亦成就咗《喜劇之王》經典嘅一幕戲。
—
「努力！奮鬥！」電影嘅第一句對白，係周星馳向住個海大嗌，乃戲內戲外嘅自勉，又為電影定調，《喜劇之王》就係一個講述小人物奮鬥嘅故事。
—
但我更在意嘅，係戲入面角色奮鬥嘅目標。
—
好記得有另一場戲，講尹天仇比飾演影后杜娟兒嘅莫文蔚睇中，想捧天仇做下套戲嘅男主角，然後問星爺有無問題，星爺竟然問係咪每日都有飯盒食。
—
簡單嘅一個問題，大可以解讀為鄉下仔出城，貽笑大方，問埋啲低B問題。但我就傾向解讀為「只要做到自己喜歡嘅事，確保有餐飽飯食就夠」。
—
《喜劇之王》入面努力同奮鬥嘅目標，唔係有名有利，而係尊重自己，尊重自己做緊嘅事，尊重自己做緊嘅工作，尊重自己嘅生命。
—
尹天仇教柳飄飄點樣扮學生妹，點樣打側企，點樣垂低個頭，甚至自己做臨記比人踩嗰陣郁都唔敢郁，因為導演未嗌CUT。一開始我哋會覺得咁樣係傻，喺講求效率，金錢掛帥嘅社會入面，又邊會再有人同你講乜嘢係「專業」，點會「認真」去做嘢。
—
為咗專業而努力，為咗自己嘅眼光而奮鬥，因為我哋嘅付出而成就「專業」，但同時又係呢一份「專業」定義返究竟「我」究竟係一個咩人。做古惑仔唔係希望賣友求榮，而要夠「雷氣」；做舞女唔係希望個客盡快醉咗然後收錢，而要比到對方真正嘅快樂；茄哩啡都係演員，每次天仇去搵霞姨，都會著曬成套老西。
—
一個人值唔值得其他人尊重，唔係因為佢搵幾多錢，唔係因為佢喺社會上有幾高嘅地位，唔係因為佢幾有權力，而係嗰個人實際嘅行為，「無論你睇唔睇得起我都好，我都係一個演員。」，尹天仇嘅一言一行，都對得住自己嘅身份。
—
今時今日，社會往往有「倒行逆施」嘅情況，教師唔係春風化雨，而係搞權鬥，欺壓下屬，趕走學生；警察唔係除暴安良，而係犯法，偷錢；香港政府官唔係為香港服務，叫我哋要放眼更遠嘅地方；演員唔係專注練戲，而係搞花邊新聞，不務正業，好似我哋都忘記咗最純粹嘅「專業」究竟係咩。
—
柳飄飄，我特別喜歡呢個名字。柳樹支細長下垂，隨風搖曳，浮遊無根，而柳亦有「留」嘅意味，唯有做事認真，先可以真正咁將一個人停留喺世界，唔再飄泊。認真咁對待你珍重嘅人同事，就好似尹天仇咁，無論得意同失意嗰陣，都願意養柳飄飄，就係「專業」。而只要「專業」，就總會有人感動同欣賞，就總會搵到屬於自己《雷雨》嘅舞台。
—
寫到最後，又回歸番去《喜劇之王》最頭嘅一幕戲，喺波濤洶湧嘅大海入面大叫努力同奮鬥，唔妥協於世界嘅庸俗，保存最原本嘅自我，邊個話臨時演員唔係演員嚟？
畫作：塵阿力映畫
（寫文字輕鬆，但畫畫每一筆都係心血，LIKE阿力個PAGE，作為對本地插畫家嘅支持！！）
