比較喜歡寫恒指及港股通的事，主因係講嘅人好多，真係細看條文或過往蛛絲馬跡的人少，大家吹染藍及入標的，都係憑感覺憑記憶。
研究一個行業都可能要幾日，但睇一次條文規則，最多一兩小時，一年仲可以用四次以上，你話幾化算呢，哈哈。可惜今次恒指服務公司已經率先宣佈，篇文變咗唔太特別喇。
//
在恒指網站可以看到，過去十年恒指做過5次建議或諮詢，2017及2018年的改革較重要，先係優化國企指數，將民企及紅籌加入，之後便是將W股、外國公司及合訂證券納入恒生綜合指數，由於此指數係港股通的標的指標，換言之就是為W股加入港股通打通條路。只要你細心翻查恒指公司的新聞中心，每次作出諮詢公佈，都不會是季檢當日，至少都會相隔一天。而另一細節位係，所謂季檢，係指檢討上一季度，數據亦是用上一季的，今次5月的季檢，其實就是截至3月31日的數據作計算，換言之截數之時，仍未公佈諮詢結果，程序上今次不可能加入W股。
先講W股染藍，應該是無懸念的，大家由起初好抗拒，變成熱炒W股，業界反對聲應很低。至於第二上市入恒指，青冰覺得未必會直通，因為現時具超大市值而又大成交的第二上市股，只有阿里巴巴，其餘的第二上市係宏利（945）及迅銷（6288），所以代表性仍嫌不足，但而家市場已經傳緊京東下月會上市，網易亦已秘密遞表，今年中概股回歸應該不少，但恒指公司又唔會咁得閒遲啲再搞諮詢，所以青冰推斷今次將有一些指引，例如上市要夠兩年之類，劃定個時間表畀佢哋。
//
【大茶飯】恒指檢討細節位（青冰） - Yahoo新聞
https://yns.page.link/NAQ3e
