//懷住極其悲痛嘅心情寫成呢篇文。因為成件事至少有一半我係親眼目擊嘅//
//有網友第一身經歷班車情況，貼埋響文末作為補充參考：//
831其實係繼8月5日全港大決戰之後，再一次政府與人民之間的Show Hand大對決，亦係8月8日劉業成作為警隊鎮壓新總指揮之後，策劃嘅一場最大戰役。
為此目標，今次劉業強幾乎所有牌都經已打哂出黎：
1. 金鐘出水炮車噴顏色水；
2. 灣仔希慎瘋狂作催淚彈、布袋彈、海棉彈交叉放題；
3. 銅鑼灣再次使用臥底戰術進行突擊拘捕；
4. 臥底於被識破身份而被圍剿後連開兩發真槍，反映開真槍於警察看來已為平常事而非禁忌；
5. 繼續於各區進行濫打濫捕
但上述呢幾招都唔及一招「港鐵夾殺」陰毒，亦都令上面發生嘅一大堆原先非常重要嘅事件變成次要。
一直以黎地鐵都被認為係成場抗爭嘅最終「非軍事區DMZ」（ Demilitarized zone），原因並唔係為咗包庇抗爭者令佢地免於被警察追捕，而係令一般市民知道，即使地上面打到火紅火綠，地鐵站仍然能夠令佢地隨時逃離危險之地，又或者至少可以確保警察唔會同抗爭者響地鐵開拖。過往之所以即使地鐵宣佈封站，仍然係堅持以「准出唔准入」方式繼續維持封閉車站服務，為嘅就係至少令被閉車站嘅一般市民可以離開。
但由央視主播，去到梁振英同林鄭並唔係咁諗。佢地覺得港鐵太過偏袒示威者，咁樣係益咗佢地。所以自從821封九龍灣至調景嶺站、822封葵青同荃灣站之後，佢地就係要打斷抗爭者利用地鐵作為轉移地點嘅工具，掉番轉警察卻係可以隨時利用港鐵黎運兵。至於住係當區嘅市民就算你唔好彩，10點幾宣佈封站而你12點前仲走唔切的話，你就會面臨警察封路、樓下商場店舖全關，夜晚只能捱麵包餅乾嘅情況。
劉業成卻仍唔滿足於呢個地步，佢就係處心積慮要打破「地鐵站=DMZ非軍事區」呢個禁忌，務求令佢心目中嘅「暴徒」唔能夠再利用港鐵站作為最後嘅庇難所，要佢地響「惶恐之中渡日」。
於是響佢精心策劃下，由831八點開始借助藍屍同抗爭者衝突，以增援作為藉口，首先煞停所有列車，然後突然間響太子站派譴大批防暴、速龍湧入地鐵站內，但要拉要鎖嘅反而唔係意圖傷人嘅藍屍，而係所有疑似抗爭者嘅年青人。其實列車被煞停、所有出入口被封後，基本上係無人可以逃離現場，要慢慢籠中捉鳖有幾難？
結果最先去月台嘅並唔係一般刑事偵查嘅CID，而係無編號兼蒙面，打人毫不留手嘅速龍隊。甚至我懷疑劉業成係特別落咗響地鐵站內濫打濫捕嘅命令，因為佢係要比抗爭者留低恐慌嘅回憶，等佢地以後唔敢亂搭地鐵，徹底進行鐵路夾殺。
最後就好似《逃犯條例》修訂一樣，警察已視最初果個「為解決列車內乘客糾紛」嘅藉口如同廢話，完全無爭執嘅旺角、油麻地、九龍灣、荔景站，防暴警都已毫無顧忌直接走入車站內恐嚇市民。
劉業成同林鄭、梁振英甚至中共鷹派嘅諗法係一脈相承：你班抗爭者唔驚就打到你驚，你有人反抗就拉到你無人為止。但佢地唔明嘅係有班人其實就係唔會驚；而就算驚你，亦都會因為另一種人類好重要嘅情感：憤怒所克服。
當呢班速龍走入地鐵車廂打到青少年同老人家滿頭是血、當有年青人被你地猙獰嘅行徑嚇到抱頭痛哭，但你地仲要無情咁再響一啲放棄抵抗嘅弱者身上射上胡椒噴霧，基本上一個包含極權剝奪自由、強者欺凌弱小、暴力加害求饒者，如此醜惡嘅劇本，繼721之後再次響831完美複製。
所以啲人真係唔好再問點解抗爭運動搞咗咁耐，民意卻永遠唔會逆轉；點解政府警隊只不過係想令社會回復平靜，最終卻只催生更多仇恨。因為佢地永遠唔會明白，除非你聽朝就將所有有良知嘅香港人全部槍斃，否則只要佢地仲有一條命響度，憤怒就會催生佢地更加勇武，而就算再懦弱怕事嘅小市民，都會出於義憤盡力協助呢場抗爭繼續落去、響心裡面全力為呢場抗爭打氣。
我唔知今日之後抗爭者會點樣針對「港鐵夾殺」而諗出新嘅反制手段，但可以肯定嘅係，高壓係永遠唔會淋熄抗爭之火，而只會令佢愈燒愈旺。
==========
//我響太子月台班車上面 我係由天后趕過尖沙咀 中途收到清楚場轉旺角快閃 走果陣響旺角月台傾下一站快閃目標 無幾耐消息到話旺角防暴到上面地面 再一陣睇tg群入面睇直播嘅通知響c出口進入 所以成班仲響月台換衫或商量嘅 示威者即刻上車走 左去到果陣其實好多人上左車去離開 上左車果陣其實班車普通乘客唔多仲有坐位
示威者佔左多數 有人拉門比人儘量上至成車塞滿晒 我估有三份二都係示威者 車門開開關關左幾分鐘 最初係示威者拉門 後來係廣播話本班列車不載客要求所有人離開但無人理 有人按緊急制同車長理論 之後tg直播消息話差人已經入左閘落緊月台 同車卡啲記者已經準備影住樓梯位，果陣先真係開到車
響車上示威者大家仲傾緊下一站去邊快閃 九龍塘黃大仙九龍灣乜都有人講下 車只係行一個站去到太子 響太子又響廣播本班列車不載客要求所有人離開 普通乘客同示威者大家都鼓燥 大部份普通乘客都無離開車箱 示威者有啲出左去月台整理自己 傾偈 睇ig中 有啲認為上面離開就係狗屋危險 有啲人就照走 我當時係列車比較尾位置 身邊有兩個fa一邊跑一邊講響前面打緊 我聽到就往果面方向跑過去諗住幫手 去到月台控制室果度
見到藍絲比人圍緊走行緊上樓梯 邊走同時繼續鬧緊人影人大頭 月台控制室因為班車唔載客關系有示威人士圍緊拍打佢玻璃 無幾耐就開始播果段恐怖廣播 因於嚴重情況本站關閉請所有乘客離開 所有閘機已開啟
果陣好多剩底嘅示威者已經諗位走 見到自己友開始少我都唔例外開始行過去樓梯 果陣消息到話太子上面已經速龍入左閘衝左入嚟
到我真正開始上樓梯上面已經倒灌翻落嚟 我哋響下面已經無位走 其實當時下面大部份係普通乘客
我身邊有個女士嚇到喊 行唔到路講唔到嘢要人扶 我同朋友仲係gear陪佢響月台坐低安慰緊佢 有咩幫佢擋一擋叫佢唔駛擔心 我同我同行朋友都係中坑，立即除左裝收起響背包等自己比較似普通乘客 速龍就衝左落嚟 佢哋衝落嚟無目標咁周圍衝周圍跑 其國一個話呢邊果邊就成玩衝晒過去
嚇到普通市民好驚 我見到佢哋目標只係後生仔 唔理咩色衫只要個樣靚仔就會衝過去撲低
速龍防暴同便衣不停響上面落嚟 我雖然除左gear入背包但仲係黑衫 所以匿左入車箱棄裝再翻出去扮路人睇咩情況 果陣響我親眼見到有六七個細路比人襟低左 仲係有好多警察響月台不停衝前衝後一時又衝入車箱搵目標 後來月台太多差人 我都比人趕左上車 上車箱後警察仲係不時來回望入嚟搵目標 車門不停開關唔發車 過左大概多五分鐘左右
終於都開到車 響下一個站石夾尾 又再響廣播話本班車不載客要求所有人下車 有人唔肯落要求一係叫白車一係開車走 我出左車箱睇 有人響車門旁圍緊月台職員理論 職員咩問題都解答唔到 無幾耐講播就響話 所有觀塘線荃灣線本最所有服務停止 我就響呢個站離開左
下面我見到嘅事就係咁 由於我同朋友都係中坑 棄左裝所以走得甩，希望幫到你厘清時序同經過
我係往調景嶺方向 最傷果幾個手足無見到現場亦都無消身可能唔係我呢面車//
地鐵尾班車觀塘線 在 金水- 留意地鐵尾班車時間將軍澳線： 往北角0059 - Facebook 的推薦與評價
留意地鐵尾班車時間將軍澳線： 往北角0059；往寶琳0118；往康城0118 觀塘線： 往黃埔0026；往彩虹0109；往調景嶺0108；往觀塘0118 地鐵站大約會在0120開始關閉. ... <看更多>