[貨幣101—美匯指數]兼講金本位,同簡明貨幣制度史
繼續事忙(好快忙完!過埋生日啦),出啲簡單文教學。反正上個post 反應都不錯(https://bit.ly/3fgSP1i),話見到美股,同美金美匯指數,基本上係反向咁行。
TL:DR — 你日日見到嘅美匯指數,係1973年嘅產物,咁多年冇update過。而美匯指數出現,正係因為美元本位金本位收皮。
1. 但,好似都未講咩係美匯指數,其實唔難,Google就得。但都解下。照計細細個都會諗(我有啦下,你冇好奇心係你嘅事),世界上咁多貨幣,我細個年代甚至仲有咩西德馬克法國法郎意大利里拉之類,咁咪好多唔同嘅匯率?同埋,你講西德馬克強勢,係指對乜先?瑞士法郎?日圓?古巴披索?定乜呢?
2. 當然大個咗就知,Pax Americana嘛,美國美元獨大,所有嘢以對美國為準。英鎊弱,就係講對美元。日圓強,亦係指對美元。至於AUD/JPY呢啲咁niche嘅cross rate,就用嚟寫文嘅(*)
3. 但,咁,講美金強弱呢?點算?對乜好?其中一個方法係講相對於黃金,「屌,咪即係金價咯」。咁另一方法,對返其他貨幣,「屌,咪即係EURO掉轉」,又唔多好喎,想對晒咁多隻。
4. 於是乎,就有所謂嘅「美匯指數」,Dollar Index,DXY,有時又會就咁叫「美金」「美匯」「greenback」。就係對返一籃子貨幣,不同比重。
5. 呢度就有問題啦,到底用咩貨幣呢?同埋比重點計?
6. 留意呢個「美匯指數」,可以直接拎嚟炒,有期貨賭,仲有ETF,有期權。而入面啲成份,係極之咁化學同兒嬉嘅。
7. 答案就係,歐元佔差不多六成,日圓十四巴仙,英鎊十二巴仙,加元九巴仙,剩返係瑞典克郎同瑞士法郎。
8. 人民幣呢?冇噃。咁當然啲網友梗係講人民幣點廢點乜。Fine,你覺得開心啲嘅,隨你。但,印度盧比呢?一樣冇。親,印度有民主啦掛,印度經濟規模大過英國添。瑞士瑞典都有,印度冇?仲有巴西韓國,全部唔見影。瑞典老幾呀?GDP細過泰國,好快就伊朗尼日利亞都大過佢
9. 明顯地,呢個美匯指數,係反映「舊世界」秩序。
10. 呢度講遠少少歷史,希望唔悶。可能有聽過Bretton Woods system,布列頓森林體系,亦可能冇。但冇都好,應該聽過「金本位制」,以前美好嘅年代,你阿爺嘅年代,好好的,貨幣背後有黃金支持(不過冇得上Facebook,亦冇得一年去幾次日本)。你有幾多金就印幾多錢,冇得係咁印。
11. 金本位制已不復再,而家行嘅係fiat currency,法幣,講個信字,任印。貨幣嘅「intrinsic value」,等於零。港紙叫做有美金支持,但美金背後一樣講個信字。具體啲就係誰大誰惡誰正確, monopoly of the legitimate use of physical force 即主權,亦好多時包埋鑄幣權。當然有啲國家選擇用其他貨幣,係選擇。但一般嚟講,你在越南就要用越南紙,餐廳肯收美金係選擇,但亦可以堅持你畀越南盾,你唔畀就打柒你。就是咁簡單。
12. 而在金本位,過渡去到而家fiat currency,中間嗰三十年左右,就係呢個Bretton Woods system。係邊三十年?係1944-1973。叻嘅大約估到同乜有關,正係二次大戰。
13. 二次大戰後,歐洲英國等等元氣大傷,日本炸到稀巴爛,中國褲都未有著。基本上就係美國獨大,Pax Americana嘛。最後重建秩序,好多人只留意咩馬歇爾計劃呀,日本天皇去神化之類,完全冇諗金融秩序。你而家見嘅咩IMF 同 World Bank,都係二戰後搞出嚟的東西
14. 講返,二戰後,歐洲日本打到仆街,英國亦正式退下神壇,美國成為無可爭議嘅唯一大國。亦都因為咁,呢套Bretton Woods system,就係人人掛美金,唔準貶值,然後美金掛黃金,咁咯。因為美國拎住最多黃金嘛。
15. 但,呢度唔講太深啦,大家都估到呢啲固定匯率有乜問題(其實亦係香港盯住美元嘅問題),總有人各懷鬼胎想貶值。更大鑊係,總有人覺得固定匯率對自己唔著數(**),咁你保證我可以換金嘛,我就換金,於是美國嘅黃金都不停流失。
16. 結果你估到了,就係美國嘅黃金儲備都不停流失,等同擠提。然後當然係落閘,但唔使放狗。就係棄守呢樣嘢。美金再唔盯住黃金,其他貨幣亦唔盯住美金,全自由浮動。時為1973年,Bretton Woods system唔夠三十年後。點解係呢個時間?正因為歐洲經濟全面復蘇,同埋美國爆咗幾次危機。
17. 講到好遠,但,美匯指數,就正係Bretton Woods system收檔之後,1973年嘅產物。如果人人對美金固定匯率就唔使指數啦,日日一樣!而樓上講嘅「歐元佔差不多六成,日圓十四巴仙,英鎊十二巴仙,加元九巴仙」比重,正係嗰時定嘅!之後一路都冇郁過!死未,夠化學未?
18. 聰明嘅你又可以反駁,喂,1973年邊有歐元呀?冇錯,當時係冇的。當時係德國馬克法國法郎(唔知有冇意大利里拉西班牙比薩塔,懶查)。但,其實一樣。應該話,1973年之後,唯一再轉嘅一次,就係1999年,叫做歐元誕生,取替咗細細個屋村師奶炒嘅ECU歐洲貨幣單位(呢個詞好有歷史感)。
19. 打後咁多年,完全冇郁過。根本就係連1999年嗰次,亦只係將德國馬克法國法郎等等,加晒入去歐元。就所以,唔會見到人民幣,印度盧比,巴西雷亞爾,墨西哥披索等等東西。
20. 咁白痴都得?係咁的。所以早有人發明一個更與時並進嘅東西,叫TWEXB,Trade Weighted U.S. Dollar Index: Broad。唔複雜,就係用返而家美國嘅貿易額嚟做比重,加權咁計每一隻貨幣。同埋,可以每年update 一次,咁就當然有人民幣呀甚麼了
21. 不過,正如好早都寫過,美股道股係十分過時嘅東西,計法唔太科學,成份股又得三十隻。真係專業(***)嘅,當然講標普指數。亦好合理,因為道指已經百幾年前嘅產品。但,新聞好多時都仲係報道指為先,甚至「專業」嘅都會講。歷史嘅嘢,唔係咁易取代。「即係好似,明明電路中電子就係負極流向正極,但conventional current 電流都係當正極流向負極咁」
下篇會講埋,美匯指數同港股
(*)其實唔難,大約估到,AUD/JPY亦係量度「風險胃納」。後者係險避貨幣for some reason(唔記得有冇講過,第時再解),同美元同瑞士法郎一樣,但凡見兵荒馬亂,美金瑞郎日元都升。前者呢,澳元一般就係「冒險貨幣」,同韓WON印尼盾之類差不多。倒唔係因為地理,或者因為澳洲係新興市場。最主要係,其實澳元係China proxy,鐵礦石亦係,中國經濟差就全球都冇乜運行,澳元鐵礦銅價等等,多數都大插。
(**)想像下,歐元亦係同一個問題,意大利同德國用同一種貨幣,廢柴意撚當然覺得唔公平。以前意撚就話貶值救經濟,而家冇呢回事。但,又諗返,歐元咁撚廢嘅,就人人爭住退出啦。但你見事實係點?事實你見意大利西班牙之類根本唔想退出,反而係有事個個想加入。原因亦好簡單:因為歐盟有錢分畀意大利西班牙之類,仲有意大利西班牙人可以去德國打工。當然歐盟同歐元區係兩樣嘢,但,正路地,只可以入歐盟唔用歐元(瑞典,同埋以前英國等等),唔可以用歐元唔入歐盟(非歐盟嘅黑山同科索沃理論上都用歐元,但只係單方面,在歐央行並冇任何話事權)
(***)上次都有人挑機問何謂專業,係咪串人唔專業。咁只能答你,冇話專業一定叻,但就係講金融業界咯,基金經理,分析員之類。咁當然你唔著波砵都可以勁過美斯,理論上。
———————
版務:收費專欄已減價。支持埃汾高質文章。
一星期三篇,$175睇到6月22號,加埋過去兩個幾月所有文章。
請去呢度訂:bit.ly/2wVXndj
課程編號填: CC01
報完會有email通知,繳費後有Login及Password
逢一三五入去 homebloggerhk.com (入到去就睇到《事先張揚》)
亦睇得返以前嘅文。一般我都係會黃昏出文嘅。
墨西哥 披 索 美金 歷史 匯率 在 君子馬蘭頭 - Ivan Li 李聲揚 Facebook 的精選貼文
[忽然一周:匯市篇]講明,不一定期專欄呀下,甚至有冇第二期都唔知。
從來唔信咩五窮六絶,但五月嘅主題當然係淡,仲有貿易戰。方便起見我由月頭計起(因為侵侵週末出推,我唔知計出前嘅星期五定出後嘅星期一好,懶)
人民幣急跌,預期之中啦。無論係主動(貨幣戰?貶值增加出口競爭力抵消關稅影響?)定被動(避險,資金走入美金),都唔令人意外。但其他貨幣呢?
以下呢個係彭博的圖,月頭至今所有外幣(相對於美金)嘅表現,很好。貨幣係所謂嘅Expanded major。只用Major就好似連韓圜都唔見,用Asian又會冇咗其他洲份。
同你睇下圖,睇下有乜得意嘢。
首先都好多人估到,升得最多嘅係日圓。唔見得因為貿易戰漁人得利(望下韓圜?)。主要都係因為避險。但凡大家京京,啲資金都係去晒買美金,美債(其實可能同一樣嘢),黃金(開始少啲),仲有日圓。仲有,第四位嘅,瑞士法郎,一樣都係避險貨幣。
人心虛怯,西瓜大邊,信美國佬,因為打得,好合理。資金一驚去晒美金美債,簡單易明。黃金,大家都知,世界通行,冇得印出嚟。但,做乜日圓瑞郎會係避險貨幣?好多人日日聽,但從來唔問點解。
其實,我都唔係好知。一個講法話日圓有大量嘅carry trade,好多人借嚟炒其他嘢,因為低息—但而家好多貨幣都低息喎。況且,瑞郎就唔低息啦?不過瑞士法郎係避險,就比較有理據。你諗下瑞士嘅歷史,中立國,瑞士央行亦都係比較獨立,比較正路,同埋印銀紙相當克制嘅(唔係唔印,只係冇咁狼)。
另外,留意第十位嘅,秘魯蘇 Sol。我都唔知係乜,冇去過。重點係乜?重點係,排第十嗰隻已經係跌,即係根本得九隻貨幣對美金係升,包埋quasi美金嘅港幣,同埋美金自己
In case 邊個咁好學又鍾意搞事嘅,會問做乜有USD,自己對自己唔係零咩?識得問嗰個應該幾醒。答案係:Total return,包埋息。美金存十日都有啲啲息。
跌得最多嘅,土耳其里拉。一向都係大波幅,況且近期玩DQ伊斯坦堡市長,立立亂,尤幸本人去嗰期就係匯率比較穩定嗰期(本人當年去拉脫維亞,換完錢,佢一晚貶值一成,佢老味)。
跌第二多嘅,瑞典克郎,寫過了。http://bit.ly/2vRhPb6 瑞典克朗跌至十幾年新低。同係北歐而唔用歐元嘅挪威都差不多。但同係北歐一樣唔用歐元嘅丹麥克朗就在十大升幅,實在冇咁簡單。
南美幾隻貨幣,最惡名昭彰嘅阿根廷披索,違約多過捧世界盃,好少少嘅墨西哥披索(聽過龍舌蘭危機冇?Tequila 是也),仲有哥倫比亞智利,都係有乜依稀就齊齊走頭嘅貨幣。
另外,紐紙澳紙當然成熟好多,但貿易戰梗係跌。因為主宰澳紙紐紙嘅最大因素,係大陸。是真的,特別係澳紙。鐵礦石嘛。
本頁成日講嘅韓圜(畀大家發現咗本人其實都幾鍾意去韓國),其實一早已經兩年幾三年新低,反而呢個月跌幅未算好大。有趣嘅係,明明只係隔離國家,兩個都係美國盟友,中國敵人,但啲走勢極唔同。而獨立嚟講,韓圜啲波幅相當之大。咁固然日本經濟規模大好多,但其實韓國經濟規模已經差不多係世界十大(嚇死未?),同俄羅斯差不多(係咪好誇呢?),大過西班牙澳洲之類—但貨幣嘅波幅,堪比其他東南亞,甚至南美國家,神奇。有機會再寫
有關秘魯Sol又補多句:嚴格嚟講,秘魯呢隻貨幣嘅名嚟自拉丁文。但應該唔少人都知,西班牙文嘅Sol 係太陽(飲啤酒咪知)。秘魯對上一隻貨幣叫做Inti,印加帝國嘅太陽神。唔好以為好耐之前呀,講緊係1985-1991嘅事。就梗係因為惡性通脹啦。85年之前?又係惡性通脹咯。咁85年之前用乜貨幣?都係Sol,所以就有新蘇同舊蘇,好似新台幣咁,但慢慢地就冇人再講新台幣啦。
最後講多句,唔知太陽神Inti係乜?睇波咪知。阿根廷烏拉圭國旗上面個太陽,有樣的,就係Inti。反而而家嘅秘魯旗冇咗Inti
墨西哥 披 索 美金 歷史 匯率 在 USDMXN - 美元/墨西哥披索| 總覽| 外匯| Anue鉅亨 的相關結果
Anue鉅亨提供您最完整的外匯資訊,透過USDMXN - 美元/墨西哥披索總覽快速掌握旅遊購物投資的最佳換匯時機,以及中文新聞、英文新聞、即時報價、歷史走勢、技術線圖分析 ... ... <看更多>
墨西哥 披 索 美金 歷史 匯率 在 美元对墨西哥比索(USD/MXN)历史数据 - 英为财情 的相關結果
日期 收盘 开盘 高 低 涨跌幅
2022年6月8日 19.5831 19.5956 19.6870 19.5570 0.02%
2022年6月7日 19.5800 19.5731 19.6450 19.5096 0.10%
2022年6月6日 19.5600 19.5740 19.6350 19.4700 0.02% ... <看更多>
墨西哥 披 索 美金 歷史 匯率 在 墨西哥比索(MXN)到1 美元(USD) - 貨幣匯率 的相關結果
檢視美元對墨西哥比索的匯率記錄表。您也可將此資訊匯入Excel ... 下面的表格顯示了墨西哥比索(MXN)和美元(USD) 的歷史匯率,時間在2021/12/8和2022/6/6之間. 查看選項. ... <看更多>