有個怨婦見我次次都要喊。佢唔係抑鬱，佢係超級霹靂過分緊張。如果要彈佢去睇精神科，我會比精神科啲人劈死我！！因為佢想實在太煩～暫時我仲搞得佢掂住～ 不過係暫時啫⋯⋯
A. 佢由做女嘅時候都已經多M，多到缺鐵性貧血。 睇過無數咁多個醫生包括埋婦科，做晒檢查。人哋同佢傾過無數嘅方案例如止血丸/避孕丸/子宮環等等等等⋯⋯到左20年之後嘅今日，佢都仲係未決定到用啲咩方法。
但係佢又唔會唔理，每次準時抽血。跟住每一次就會為咗自己鐵低今次又貧血而緊張擔心到喊。你苦口婆心幫佢分析晒，開埋藥俾佢，佢只會攞返一年前包藥俾你睇，又好誠實咁講佢一粒都冇食到但係又唔知點算好。
其實呢再喊多十年就50歲，應該有機收經，加油啊！咁咪唔使煩囉，到時只不過擔心收咗經咁點算呀咁囉。我幾有Insight！
B. 隔幾日佢又再返嚟。佢攞住個電子血壓計，同埋寫滿好多頁嘅血壓簿仔，對住我又喊。佢話佢每日嘅量百幾二百次唔知點解個血壓越量越高。當然就換第隻手再度多百幾二百次。你估下一路驚一路量高血壓高唔高？不過當然佢唔會諗到係佢緊張而令到血壓衝上雲霄，佢覺得係個血壓計唔準。
其實血壓計唔準係可以搵返生產商去Calibrate。不過當然冇咁易耍走佢。佢入嚟好仔細咁攞個血壓計同埋說明書出嚟。問其實隻手點擺最好，要綁幾鬆幾緊，要擺入幾多隻手指係個Cuff先好，泵緊嘅時候越嚟越窄係唔係正常？總之好想一齊睇一齊研究本說明書。
呢個時候好心嘅我梗係第一時間邀請佢出去搵姑娘啦～～～～～ 姑娘2好似硬食咗，跟住就超級霹靂細心溫柔地解答佢每個問題（咁寫當然係因為佢會睇到呢篇野）。但係其實都冇用架，因為你講嗰刻佢會開心啲，之後返到屋企又好驚。出咗去佢對住姑娘又再喊多次。
仲有好多嘢架，耳鳴睇耳鼻喉都已經比人哋話係因為壓力大。心口痛又唔去睇專科又唔去做檢查淨係擔心同喊。覺得自己條頸大左人哋叫佢去做超聲波跟住又喊一大輪。
其實做佢都幾辛苦。Underlying好多Stress。十公升眼淚都唔夠佢用。
～～
幫一年見兩次嘅朋友仔慶生。個少數族裔Waiter英文口音真係勁嗰頭，連我都唔知佢講咩。
間扒房會準備Souffle比壽星仔。我就超級開心獨吞個朱古力蛋糕。
