做人唔一定要好有錢、但一定要識禮貌同尊重人！！！
#多謝清潔哥哥姐姐
今朝搭𨋢返工，𨋢到開門入面有個清潔叔叔，推住架手推車，上面裝咗部舊雪櫃加幾袋垃圾。
大熱天時係幾臭的，但我見有少少空位又趕住返工所以照入，清潔工人讓少少位畀我，不停同我講唔好意思，話樓上有人丟大傢私一定要執咗先，我話唔緊要，大家都係做嘢啫。
落咗幾層，再有一對母子想入𨋢，個小朋友著住校服，似係小學生，佢彈彈跳咁想衝入嚟，但畀佢阿媽一手拉住。
「唔好入！有垃圾啊！」個阿媽皺晒眉，仲即時捂住小朋友口鼻，唔講以為有喪屍病毒。
阿媽想保護小朋友嘅心情我理解，但喺個清潔叔叔面前咁做會否太無禮貌？你估佢想臭嫁咩？我諗佢係最希望大家丟垃圾時可以綁好啲個垃圾袋，唔使啲臭飯汁爆到周圍都係，搞到佢個身咁臭。
「唔好意思！我出一出嚟先，你哋入，我下架𨋢。」清潔叔叔拉住架手推車慢慢推出𨋢。
個阿媽即時拉開個仔彈開幾尺，等架手推車出咗𨋢先急步入𨋢，沿途仲狂撥隻手嫌臭親佢。當時我幫個清潔叔叔Hold住𨋢門，好有衝動想閂門夾鳩個阿媽。
母子入到𨋢，臨閂門前阿媽同個仔講：「你畀心機讀書啊，唔係大個就做執垃圾啦知唔知啊？」
聽到呢句我真係忍唔住，即時撳返開度𨋢門，阿媽望住我呢個舉動。
我掉轉頭同個小朋友講：「係啊，畀心機讀書，唔好學你媽咁狗眼看人低，唔識尊重人啊。」
個小朋友呆咗，我諗佢應該聽唔明我講乜，但無所謂啦，因為佢阿媽聽到之後好大反應：「我教仔關你咩事啊？咁多嘢講？」
我無同佢嘈，只係講咗句「架𨋢咁臭嘅？」就行咗出𨋢。
個阿媽喺架𨋢入面繼續鬧：「死仔包、無家教、閒事莫理啊！」中間夾雜好多old school粗口，個小朋友嚇到喊咗出嚟，𨋢門閂咗之後，阿媽連同喊聲就就慢慢落下。
「哥仔唔使勞氣喎，慣晒喇。」清潔工笑笑口，佢個表情話畀我知，今次件事咁激動只係我大驚小怪。
「呢個唔係慣唔慣嘅問題，睇唔過眼佢咁樣教，害咗個細路。」
「唔該晒你哥仔，累你遲咗一班𨋢添。」
「唔緊要，我再護送你落樓下，哈哈。」
好多父母都以為逼個仔去補習、學乜學物…個仔女就會變成一個人才。又以為睇古惑仔就會入黑社會，睇deepweb就會做變態殺人犯。
但其實小朋友無論睇幾多書，幾多電影…
佢哋嘅學習對象都一定係父母。
試問有邊個細路嗰陣無試過模仿自己父母？
男仔拎老豆鬚刨扮剃鬚，女嘅偷偷拎阿媽支唇膏去搽。
如果呢位古派粗口阿媽可以教識個仔，尊重清潔工人。雖然污糟，都係靠自己雙手搵飯食。
雖然長大之後未必可以做到有錢人，但起碼佢會係一個好人。
IG：BlueGodZi
多謝清潔哥哥姐姐 在 筲箕灣・梁詠詩Jen - 謝謝清潔姐姐及哥哥及時出手相助！ ... 的推薦與評價
謝謝清潔姐姐及哥哥及時出手相助！ 一起合力清理及通好淤塞的渠口了！ （謝謝街坊Kenny借相一用） #謝謝出手相助#好驚變宏華河. ... <看更多>