【我本書終於賣曬喇！😭】
長文慎入。
成件事好突然，突然到我想做少少紀念儀式、出個last minute post都冇機會。或者，疫情大家宅在家中想睇書，又或者呢排文章多咗人睇，知道我出咗書，最後呢幾日突然有一班人買書，好似當日賣Postcard咁，最後截都截唔切。
喺度除咗多謝近600位買咗書嘅讀者朋友，更加要多謝買咗之餘幫我宣傳、喺唔同群組推薦嘅讀者朋友，我係知道嘅。仲有，你哋每一句讀後感、每一次嘅回覆，我都係開心嘅。我純粹將自己經歷寫出嚟，冇諗過會成為你哋人生最愛小說之一、係你睇過最緊張故事之一。我知我本書唔薄，六百幾頁可以令你哋緊張到一日追看完，意料之外。感動嘅係，我嘅故事鼓勵到你哋出發、做啲無悔青春嘅事，甚至喺人在外地絕境一刻，我嘅經歷幫到你救到你。我冇諗過自己會做到咩偉大嘅事，當你哋話我知時，我都不知所措。我本小說都俾過學校拎嚟做教材、做閱讀理解，甚至有學生問我拎Right改篇成舞台劇劇本。我本書係有粗口，當日甚至話如果香港出到可能要貼18禁封條😂，但有情節會影響到下一代，應該都算係件好事？
由2017年開始賣，我搞咗近十場大型簽名會，亦喺唔同嘅分享會做宣傳、再搞細嘅簽名會，亦都因此第一次上電視做訪問，又有報紙專訪、做過幾次電台訪問，最深刻都係擺咗三日書展。
當日因為書展，我去緊南美都改機票早返嚟，當時計劃並唔係咁樣，但為咗書展改行程，改機票錢仲貴過本身張機票，加埋書展自己俾場租，值唔值得？我當日諗，南美可以再去，但書展未必有機會再擺。今日諗返，有得必有失，我冇得如計劃咁，南美直上埋中美，依家想去都去唔到，但果幾日同大家嘅交流、聽到大家埋嚟嘅鼓勵、買完都特登走嚟同我影相簽名，好滿足；人生做過好多場乜展物展，都幫唔同公司做過書展，但呢次每日擺檔直踩十幾個鐘，我唔係為人哋而擺，而係自己擺檔、自己生意，今日諗返呢件事，都仲覺得好夢幻。
出書之前係搞過好多次分享會，但真真正正可以同大家關係由Online變成Offline，都係出書呢件事。因為出版社同書局有夠仆街、昆上昆上昆，荒謬到要由個作者自己去賣書、自己做宣傳、自己去交收、自己去租場。初時係洩氣，但冇諗過反而因為「交收」，同好多讀者朋友由「網友」變成咗現實朋友，簡單如飲杯咖啡食個tea，到真係變成可以傾閒計嘅朋友，甚至有幾位曾變埋工作上嘅拍檔。呢種關係，出書前完全冇諗過，喺度，老土都要講句，Nice to meet you，你哋知我講緊你嘅。
呢個賣書過程，都見識過好多人性陰暗面。例如有Hater有心玩嘢，特登約我到山長水遠交收然後甩底，又有人為咗R書睇各出奇謀唔想俾錢，更有人話自己唔夠錢要籌錢買，結果籌到今日都未籌到120蚊。更黑暗嘅係，我單靠一人之力做唔到太多，亦都想多少少曝光率，結果同唔同書店、Cafe合作，惹來冷言冷語都算、仲有不知所謂嘅「合作條件」，賺到錢全部佢袋。衰啲講句，好多所謂嘅「有心小店」，執笠係抵撚死，你點對人，自有今日，唔該唔好拎完光環喺度呻。冇經歷過呢個過程，我未必知道呢個社會有咁醜惡一面，都未必知道Hater可以有幾癡線，喺度都要多謝你哋，俾我上到人生好好一課，無價嘅。
我本書由2013年執筆、2015年完成，寫咗兩年。2014年有第一間出版社搵我，結果香港前前後後有三間出版社搵我，全部都係仆街嚟，以為低處未算低，搵到去台灣先係終極大奸狗。其間，我飛過兩次去台灣，單拖同佢哋好似流氓咁講數，我曾經驚過最終又解約出唔成，最終只能說句：唔完美，可接受。前前後後三次上台灣間山寨出版社講數咁款，唔係好受，都係難忘經歷。最後，終於喺2017年成功出版。
第一次喺台灣嘅書局見到自己本書，果種激動夾雜感動，好正。
當然，我都好多謝曾經同我合作過嘅真正有心小店，無論係長擺定短期擺，甚至願意免費租場俾我嘅Cafe，私底下更同店長成為咗朋友，喺度都要多謝你哋。近排有人要結業有人就嚟頂唔住，艱難時期，幫唔到啲咩，唯一可以做就係聽你哋呻，大家加油。
話說我同仆街出版社書份約係到2022年，我事前都驚，會唔會到2022年仲未賣得曬，點知只係用咗冇兩年半就全部賣曬。近十場簽名會由香港做到台灣，買書嘅讀者遠至美加、冰島、紐西蘭等等，我全部都寄過，好多謝你哋郵費仲貴過本書下，都願意肯支持。
事前好多書局、出版社、Hater甚至身邊人，睇死我唔會賣得到50本，結果我賣咗近600本，呢條數，我敢肯定，放喺書局五年，都唔會賣得到。多謝每位支持嘅朋友，係你哋幫我創造奇蹟。
出書之前，我冇諗過自己可以做得到，更加冇諗過呢一切全部係靠自己諗出嚟、傾返嚟，背後冇財主科金，一切都係靠自己，原來信自己，一樣可以做得到。我人生咩嘢好成功，呢個過程，都算係自己一大奇蹟。
如果大家仲想買，大埔嘅解憂舊書店，到執筆呢刻如無意外應該仲有一本，而部份三中商書店有讀者話曾經見過－－我唔知點解仲會有啦，大家都可以去睇吓，再唔係可以去呢幾個網買。真心，我唔想俾仆街出版社賺，情願大家去三中商都唔好嚟呢度買，不過in case你真係接受唔到幫襯三中商，就唯有俾仆街出版社賺啦。無論你幫三中商定仆街出版社買，我都唔會有一蚊落袋架喇，所以，你哋喜歡：
博客來：goo.gl/pSGkTh
PCHOME：goo.gl/bhrKMB
TAAZE：goo.gl/oba3oM
果啲籌錢籌咗兩年都未籌到、話冇銀行戶口同Payme而又唔肯交收，兼且開足兩年都未開到戶口、個個月都話買一次而又從來唔肯俾錢嘅人，請唔駛留言話我做乜唔留俾你、下次一定會支持乜乜柒柒喇。得啦，明架喇。唔駛留言當做咗嘢、當支持咗。
暫時我冇下一個Plan，有的話再話俾大家知。
最後，再一次，再一次，多謝每位買咗嘅朋友，願意支持、相信一個獨立作者。更高興認識每個私下變成朋友嘅你同你，人世間嘅緣份可以好奇妙，但交收交到變成朋友，呢種緣份我幾年前冇諗過。
出書係倒錢落海嘅事，蝕錢正常，打個和要還神，多謝你哋全力支持，我竟然賣到有賺。
喺未有下個Plan前，想「實體支持」嘅話，可以去以下網址科金😂
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
【IG請follow】www.instagram.com/travelerwithmovie
