*希望大家睇完能留言分享覺得個姐姐有冇問題，謝謝。
讀者投稿《工人姐姐有問題嗎奶奶篇》
因為要做在職媽媽，所以要請工人。阿媽同奶奶都唔識英文，所以要請印傭。好好彩，俾我請到個識講廣東話又識湊初生bb的工人姐姐。
轉眼就放完產假要返工，兩位長老協議咗每人嚟我屋企兩日，幫下眼睇下姐姐湊成點，兼玩下孫。我媽同姐姐夾得好好，有講有笑。老公就覺得姐姐一般，無叫早晨無乜禮貌，我奶奶就覺得姐姐勁差。。。
1/ 佢話姐姐粗聲粗氣，講嘢大聲，用語唔禮貌嚇親佢。咁我解釋大家有文化差異，姐姐雖然識講，但其實有啲用語佢未必明。（佢會講「發達」去形容「大件事喇」，「得啦」去形容「ok，知道」）
2/ 話姐姐用水電用得多...咁我老公（佢個仔）以前一支公，水電煤當然平，依家屋企多咗三個女人(我、阿女、工人)，仲要兩個阿媽day time喺屋企，咁一定貴好多啦⋯⋯除非唔洗唔抹啫⋯⋯
3/ 洗手盤同廁所地下濕咗，奶奶叫姐姐用抹手布抹乾佢。姐姐話太太(我)話塊布係抹手，抹廁所係第二條。奶奶唔理姐姐，佢自己用抹手布抹，姐姐拎咗條布掉落洗衣籃，講咗句：呢度我屋企唔係你屋企。奶奶超嬲！！我當然明奶奶嬲乜，但姐姐意思係話兩個屋企兩套規矩。。。
4/ 奶奶放阿女喺搖椅無用安全帶，姐姐話俾佢聽一定要扣，奶奶話姐姐教佢做嘢。。。
5/ 姐姐做妥工作，同奶奶講話入房休息一小時（姐姐夜晚睇bb瞓覺，所以無覺好瞓嘅)，點知呢一小時不停撩姐姐傾偈講嘢（姐姐同我講嘅，奶奶無講過)
6/ 奶奶成日話佢教阿哥個工人教得好有禮貌，好似狗仔咁乖(阿哥請菲傭，只講英文，奶奶完全唔識嘅）
7/ 有次午飯（我返緊工，得奶奶食）姐姐蒸豬肉唔夠熟，奶奶話姐姐特登想攪到佢肚痛。
8/ 豬肉事件翌日，姐姐下午煮蝦子麵俾奶奶食，奶奶二話不說倒咗。。。
9/ 我為免佢哋太多正面接觸而起衝突，故安排姐姐洗廚房。奶奶話我好叫姐姐洗廚房，話姐姐會認為係佢叫嘅，目的係報復喎。。。
10/ 奶奶成日話bb喺姐姐手，買佢怕；亦成日話當佢一家人，所以俾好多衫佢，又買嘢食俾佢；但又話如果工人係佢請一定炒佢。。。
11/ 奶奶叫姐姐食包，姐姐太飽唔食住。奶奶隔陣再叫隔陣再叫隔陣又再叫，叫到姐姐講 「得啦，你唔好理」。。。
我承認姐姐係掘雷鎚，講嘢無尾音令人聽落唔舒服。但廣東話唔係佢母語，講到聽到應該叫好好啦。。。
再者，姐姐做嘢快手，乾淨指數至少有70分（100滿分），夜晚又要湊b，咁下午入房休息下都唔過份吖。如果當日工作未完成，佢就唔會抖。
姐姐又識煮餸，豉油雞、栗子炆腩排都識。。。重點係，姐姐真心鍾意bb，令我好放心。
如果姐姐有日頂唔順要辭職，我真係唔知點搵返個唔駛我擔心嘅姐姐呀！
#退一步海闊天高
#我的極品四大長老
#大家俾啲意見個工人係咪已經算好好
⬇設計圖片
