關於 大樂師為愛配樂 劇情 ，我們在網路上蒐集到這些相關的討論、資訊與評價

【#Nj評《大樂師.為愛配樂》】明明拍得動人但死因不明，我唔忿氣

係命運唔俾面《大樂師.為愛配樂》，受到各大院線冷待白白令一部好片被無奈埋沒。睇完套戲我諗唔難肯定電影質素，即使未去到最好但絕對係見得人甚至有驚喜。淨係講牌面，裡面用的演員大家都識，幾位都公認係近年香港電影的清泉支柱。暴龍哥鄭中基話晒都係最佳男配角，個人形像達過去多年高峰，這部電影更加為他洗底話俾人知佢唔止搞笑唔止鄉音。顏卓靈咁靚女咁得意，《狂舞派》紅到個個都識，點解吸引唔到人入場？白只又係唔洗講，另一最佳男配角助陣，又冇支持誘因？黑仔姜皓文夠親切啦，過去兩年套套港產片都有佢頂住，今年仲係最佳男配角大熱，個個都話撐佢又唔見真係有人入場撐佢拍的電影？我諗唔通，《大樂師》死因不明，我唔忿氣。
.
我個人係非常之欣賞這部電影，可能係近幾個月睇過最好睇的幾部電影之一。唔係淨係港產片，係連同西片一齊計都有得贏！我完全唔覺得要定性什麼本土電影定係港產片，我欣賞《大樂師》時沒有因為它是香港製作而調低標準。某已上岸動作巨星話本土電影無運行，我可以話《大樂師》正正就係可以突破地劃界限的一部片，裡面沒有特別賣弄的香港情懷，外國人都會睇得明都可以樂在其中。我又唔會好老土咁話「音樂」這回事無疆界，始終技巧上有人拍得屎有人拍得動人，而《大樂師》絕對係後者。一部電影賣音樂創作概念，集合綁架動作，離地水上生活，兄弟胡鬧輕鬆搞笑，感覺其實有少少超現實，成功地組成一個好笑有趣又感人有意義的故事，適合各背景喜好的朋友，無論你愛不愛音樂。
.
主題曲貫穿電影助注入靈魂，金培達原創歌曲《沒聽過的歌》雖然loop完又loop，但係睇住這首歌慢慢在劇情進行當中建構，浸淫在自然環境下為空泛未寫好的旋律豐富補完配上歌詞，資源緊絀下試錄demo再登上表演台，每部分都見證著兩位主角關係的提升，進入因音樂而成的世界遇見對方欣賞對方，一份溫暖湧上心頭。除了原創歌曲，電影還投放大量時間在魚排屋拍攝，佈景道具做得精緻不馬虎，爛鋼琴爛得有美感，最後一幕更為船屋增添意象，只看心思已經值得入場。這部戲令我好滿足又窩心咁離場絕不簡單，演員切合角色交到功課配搭有火花，故事完整有意思拍出來有驚喜，但偏偏沒有得到足夠戲院足夠觀眾支持，你話我唔服氣係唔係好合理？
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
.
大樂師．為愛配樂 Concerto Of The Bully
Cherry Ngan 顏卓靈
Ronald Cheng 鄭中基
白只
姜皓文
Chrissie Chau 周秀娜
蔡潔 Jacky Cai
Bravos Pictures 巴福斯影業
#大樂師 #為愛配樂

[悶，不由自主]
套戲悶到有啲互相折磨嘅感覺，唔係有村BB做主角，我諗我半場就走咗。啲劇情仲婆媽過粵語長片，角色面譜到唔面譜，又唔知想點咁，每隔五秒先gi一句對白，但講嚟講去都係三幅被。仲要係行定勳做監制，兩個字-失手!呢家趕去又一城睇大樂師為愛配樂。
-
利申:日片愛好者

[方以文 問兩句][姜皓文]

黑仔呀！係金像奬男配角候選人黑仔呀！今次佢係《無間道》當中戲份雖然比較少，但每次太子一出場我都好期待，因為太子係傻嘅，個劇情可以轉變得好快又估佢唔到。佢夾埋鵬哥出嚟，兩父子嘅互動又係無敵。搵到黑仔講兩句（其實都唔只兩句，好詳盡），由電視劇《無間道》講到電影，仲講到佢挑戰做跨性別者嘅作品《翠絲》。

________________________

問：太子呢個角色成日都high大咗，你演嘅時候要用咁多力辛唔辛苦呀？個角色最大挑戰又喺邊呢？
答：《無間道》呢個太子最難搞嘅係，我設計呢個角色唔係好想似平時黑社會反派角色，我將佢搞到陰陰沉沉，畫晒眼線、搽晒黑色指甲油，成日好似high大咗咁。最難搞係每日開工化妝，最初指甲油係我太太喺屋企幫我搞嘅，搞搞吓就不如做個gel甲，方便開工。太子係幾得意嘅一個角色，我幾鍾意佢，佢都真係幾可愛。不過你唔好睇佢成日high吓high吓咁樣，後段嘅劇情佢都幾狼死。
________________________

問：同鵬哥演嘅泰山咁多對手戲，太子又係佢個囝，點樣做先可以keep到太子個勢，唔好畀泰山呢個角色掩蓋？
答：我同鵬哥合作過好多好多好多次，佢睇住我大咁濟，不過我同佢合作咁耐，係未做過佢個囝，今次做鵬哥個囝係好開心。你冇得搶呀，你唔可以搶佢，因為泰山同太子兩父子，泰山一出嚟，太子直情係無碇企，佢嗰威勢你係冚過唔到。喺現實開工拍攝嗰陣，鵬哥好照顧我，同我研究好多嘢點樣去推高啲太子個角色。兩父子嘅對白完全係鵬哥幫我度好晒咁濟。鵬哥真係一個不得了嘅前輩，亦師亦友，無得頂。
________________________

問：有冇邊場戲你係印象特別深刻？你自己又最鍾意邊一場？
答：我幾鍾意謙仔（羅仲謙）同埋撈家（羅嘉良）反面攤牌嗰場戲。如果係太子嘅話，我自己幾鍾意哥松哥（劉松仁）死咗，太子兩父子去踩場嗰場戲，都幾狠同埋幾冇性嘅。人都死咗都喺個靈堂度大吵大鬧，真係好唔畀面，但係又幾符合太子兩父子嘅角色性格。
________________________

問：會唔會拍多啲劇呀？例如好似今次《無間道》咁嘅網劇同網大。定係都係集中喺電影發展？
答：拍劇就睇時機啦。電影同電視兩樣我都好鍾意，基本上我係鍾意演出。無論係電視、電影，有好嘅劇本我都會去參考，希望有機會去試。我唔排除今年、明年會拍一啲好嘅電視劇或者網劇，總之係好劇本我都希望去參與。
________________________

問：之前睇報道話你會挑戰演跨性別人士嘅角色，好想睇呀。仲有咩角色想挑戰呢？
答：係呀，拍咗喇，套電影叫做《翠絲》。故事係講一個中年男人，由細到大都周旋喺一個思想：好想去做女人，一出世就覺得自己生為男兒身係唔應該，佢入面根本係一個女人嚟。呢套戲同小紅姐惠英紅合作，好開心佢教識咗我好多女士方面嘅嘢，同埋我哋個製作團隊裡面，無論係男女工作人員都當咗我係女人。我記得有位美指，係女仔嚟嘅，喺我換衫嘅時候佢叫清場，要啲男人避開。大家都幾上身，我好鍾意。裡面嘅棘手嘢，就係要研究女士。原來做一個女人係唔簡單，唔好話一舉手一投足、聲音、行路姿勢，仲有佢哋日常生活嘅瑣碎事，高踭鞋好，着衫好，都係一個學問，女人真係唔易做。今次呢部戲，係將我全身所有嘅毛髮都剃光，因為戲裡面係要女人裝扮，係唔可以有胳甩底毛、腳毛手毛、胸毛，要好光滑。因為跨性別人士喺變性手術之前，係要打賀爾蒙針，啲毛髮係會生長得好慢，然後唔會生鬚生毛。所以係劇情所需，係一個難忘嘅好演出經驗，希望呢部電影《翠斯》出嚟嘅時候大家會鍾意。[按：好想睇呀！希望快啲有得睇]
________________________

問：嚟緊見到賀歲片有你，仲有冇其他作品等緊出街呢？幾時再衝擊金像奬呀？
答：今年過年好開心，嚟緊有兩部片上嘅，有《我的情敵女婿》同埋《大樂師‧為愛配樂》。《女婿》係賀歲片，開開心心，好耐好耐未拍過一啲咁瘋狂嘅賀歲片，多謝葉念琛導演畀呢個機會我，喺戲裡面又可以同嘉玲姐合作，又可以同視后級嘅唐詩詠合作做情人，好開心。

至於《大樂師‧為愛配樂》，我有份入圍角逐今屆金像獎嘅最佳男配角。裡面我演嘅大哥雄，係我從影以來都未演過一個咁特別嘅角色，個情緒變化好驚人，一時呢樣一時嗰樣，嗰個變臉速度特別快。《大樂師》係一個輕鬆幽默嘅黑色喜劇，有音樂劇做底蘊，係姜皓文從影而來一個幾特別嘅演出，我幾喜歡。嚟緊金獎像好開心，能夠有兩部戲入圍最佳男配角，除咗《大樂師》，仲有同劉德華華哥合作嘅《拆彈專家》。呢部都係無得傾，劉德華一次又一次咁畀機會我去演佢所演嘅角色，一次又一次畀我去發揮，我係好感激劉德華先生，導演邱禮濤、編劇李敏，我都非常感激佢哋。《拆彈專家》係發生喺紅磡海底隧道嘅故事，係幾震撼嘅一個港式電影嚟。希望今次金像獎有好嘅成績，多謝所有鍾意黑仔嘅朋友，為黑仔打氣嘅朋友，我會繼續加油努力，一定唔會令大家失望，多謝晒！[按：拎個金像獎返嚟啦，係你喇﹗]
________________________

#方以文問兩句 #姜皓文 #黑仔 #無間道 #翠斯 #我的情敵女婿 #大樂師為愛配樂 #拆彈專家