<<當你將自己嘅所有押喺一個人嘅身上 ...>>
最近睇左一部好舊嘅電影，係張藝謀執導，鞏俐主演嘅<<大紅燈籠高高掛>>。
呢套戲發生嘅時間喺民初，主角鞏俐係一個大學一年班嘅學生，佢因為父親離世，所以冇得繼續讀大學，而佢亦冇得再留喺屋企，佢俾佢嘅step mom 將佢「賣」出去，嫁畀一個地方嘅有錢人做四姨太。電影冇明確咁交代究竟呢個有錢人做乜，總之佢就係好有錢。
鞏俐其實好唔願意，但佢知道生存法則，要食飯，就要認命做呢個有錢人嘅四姨太。
故事點解叫<<大紅燈籠高高掛>>, 因為呢個有錢人每一晚都會叫齊四個老婆企喺門口，個老爺就好似皇上翻牌子咁，揀其中一個老婆服侍自己，揀中邊個老婆，就會喺嗰個老婆嘅房門口掛好多好多嘅燈籠。
作為四姨太嘅鞏俐，因為又後生又新鮮嘅關係，初頭每一晚都俾老爺寵幸，而如果嗰晚老爺揀中你，你就可以享受一次腳底按摩。電影中講述做多啲腳底按摩，就多啲機會懷上「龍種」。
初頭鞏俐覺得呢一切都好戇鳩，個老爺想去邊到訓咪up 囉，點解又要掛燈籠，又要做腳底按摩。 屋入面嘅其他三個老婆，一如所料都係唔好相與， 鞏俐亦不屑同大家爭寵，既唔鍾意死老嘢，亦都唔鐘意腳底按摩。
但日子過得耐咗，鞏俐開始變成「骨精」，享受日日俾人腳底按摩，期望得到老爺嘅寵幸，想贏其他三個老婆，得到下人嘅尊重，咁就冇人敢恰佢喇。
故事講到呢度，大家係唔係覺得呢個情節好熟悉，好似一般嘅宮廷鬥爭劇咁， 妃子想得到皇上嘅寵幸。
但呢個電影嘅focus 並唔係鞏俐點樣突圍而出，喺四個老婆入面，爭做最得寵嗰個位， 佢嘅focus係鞏俐由明明唔想爭取，懶懶閒過日子，變成好想爭取。
鞏俐一開始根本唔想得到老爺，但老爺用各種甜頭同魚餌， 令到呢啲老婆上癮，令到呢啲姨太太嘆慣咗之後，返唔到轉頭， 最後離不開老爺。 鞏俐想得到寵幸，除咗係佢唔捨得捨棄呢啲甜頭，仲因為呢間屋入面，人人都爭取老爺寵幸嘅氣氛。人人都爭取，好似自己都唔可以執輸一樣。
睇完之後，我覺得香港人其實好似鞏俐，我哋一開始都係不屑大陸畀我哋嘅任何甜頭，但係我哋或許受唔住誘惑，淺嚐甜頭就一發不可收拾，唔想捨棄呢啲甜頭。我哋明明唔想爭取大陸嘅機會同生意，但人人都爭取，於是我哋感受到群眾嘅壓力，無啦啦都去爭取。
鞏俐接受腳底按摩，係好似食白粉上癮一樣， 大陸給予香港嘅所有著數亦係「腳底按摩」，表面上 好似係香港享受緊，其實提供腳底按摩嘅大陸，係心懷不軌，佢係希望個女人同佢生仔，大陸提供腳底按摩並唔係無條件嘅，佢係想喺香港身上刮到啲著數返嚟，佢從來都唔做蝕本生意，一旦你嘆慣咗腳底按摩， 你就由上靶變下靶。
大紅燈籠高高掛結局係點呢 …
鞏俐呢位四姨太，為咗爭取老爺，為咗爭取腳底按摩，於是佢扮大肚，佢一向大家宣佈懷有龍種，佢間房就點著長明燈，可以100 percent擁有老爺，但好衰唔衰，有一日來m嘅時候，俾工人發現咗。老爺知道真相，即時收返所有嘅燈籠，宣佈封燈。鞏俐上一刻可以100 percent擁有老爺，日日享受腳底按摩，下一秒竟然全部被人沒收所有權利同享受。
鞏俐嘅結局意味住咩？當你將自己嘅生命一百個percent押喺一個「老爺」身上，老爺一唔鍾意你，就可以將你擁有嘅所有沒收。
而家將所有一切押喺大陸，押喺支付寶, 押喺微信，押喺港珠澳，押喺高鐵嘅香港人，唔知會唔會震騰騰？但願「老爺」呢世都唔離棄你地。。。
電影入面嘅老爺就離棄咗鞏俐，最後一幕係 ...老爺又娶咗五姨太啦 ...
#雞_全部都係雞
#我們都是四姨太
#誰是雞蟲
