男人身邊的【兄弟】
我地細個一齊踢波，一齊買宵夜；一齊玩四驅車，一齊去模型舖偷30000轉摩打。
嗰時我地成班都好似兄弟咁，返學又一齊，放學去跟隊踢波都係一齊。大家踢完波拎幾蚊就跑去公共泳池，涼都唔沖就成班一齊跳落水，見到成浸油浮上面，大家都會笑到格格聲。
到咗中學，我地雖然大家都有女朋友，但依然係日日一齊踢波，放假就去返暑期工做運輸跟車。出咗份糧之後夾錢買咗部天地線電話，一人用一日。
嗰段日子，又開心又冇煩惱。
到當中有幾個冇讀書，出咗嚟做嘢，我地嘅踢波時間，由以前嘅一早踢到晚，去到要等埋人放工先夠腳。雖然耐唔中會有某某放飛機，成日人好似入咗黑洞咁搵唔到佢消息，但我地都估到佢係俾條女捉住唔俾踢波。
我地嘅活動開始變咗去唱K，因為少啲人都可以去。
到全部人出哂身，個個有份正職，要兼職要加班要見客要見工。唔好話踢波，就連睇場波都已經好難約人。我地開始用Facebook去聯絡，方便咗時間，反而唔見哂以前要出嚟見嘅動力。踢波開始要問黃牛炒場紙，因為就算我地去跟隊，都已經頂唔住班後生仔一分鐘。
我地依然好enjoy，因為慢慢呢一類聚會已經係我地生活中唯一可以enjoy嘅時間。
到咗而家，Whatsapp真係太方便，我地好易約到人，又好易俾人放飛機。每個人都有自己嘅心結，屋企事業阿爸老闆女友老婆阿仔嘅問題統統都係我地嘅問題。踢波嘅時間愈來愈短，對話亦都愈來愈少，
好似今日咁，阿正同阿勇兩兄弟踢踢下波又嘈起上嚟，聽王力維講，好似因為阿正反對阿勇同個叫yoyo嘅女仔一齊。
之後我地就散咗band，波冇得踢，唯有自己返屋企睇波啦。
有時，幾忙都好，都會突然間好掛住呢班兄弟，唔知我地下次幾時齊人可以再見呢？
你地身邊有冇咁嘅兄弟呀？有嘅，tag一下佢，表達一下自己。
