［我覺得真係威喎］咪講笑，勁過柯南。我做過嘅幾間公司，都畀人收購。咁呢間，就畀人收皮（諗唔到更好嘅詞語）。
TLDR：冇乜必要唔好買自己公司股票呀，CFA係咁講的，所以CFA嘅嘢真係冇發達，但又唔會乞食咁咯
1. Er………………當然如果醒目仔就梗係食花生，或者睇「醒目仔時間」。。但當年我係唔睇亞視的，實則有乜人睇亞視？否則都唔會有 「老周電視」呢個戲仿。但我就唔係醒目仔嘛，所以都講兩句。
2. 關於康宏除牌，有人話可能有好多人搵我，實情荼走就人涼。要搵都唔使搵我。
3. 不過，有人黑心咁諗，「你係咪好心涼呢？」「使唔使開香檳慶祝？」。答案係，我並冇特別感覺。當然，星期五打邊爐日，當然係照打的。如果我話你知「好傷感」亦係有啲假惺惺，但的確我冇特別開心
4. 因為，關我乜事？
5. 你理性少少諗已經知，康宏隻股票，由我加入嘅第一日已經停緊牌，到我被炒嘅最後一日都仲停緊牌。嗰啲前世的滄桑 後世的風光，同我無關。
6. 有人話，啲球員倒戈對返舊球會入波唔會慶祝以尊重母會咁喎。太抬舉我了。首先，我在康宏先兩年爭幾日（＊），並冇乜咩感情，你估真係曼聯名宿奧雲咩。我做得最耐嘅係耆英證券，亦都影響我最多，在嗰度過咗最青澀最張狂最憤怒最開心嘅日子，結婚買樓都係嗰時，每次我經過太古廣場三期都仲諗嗰嗰時嘅日子。咁如果你講我做過最大嘅公司，自然係星展，雖然都唔係好耐，但即係踢過下大會（＊＊）掂過下草皮嘛。
7. 咁但，佢牌除又唔關我事，唔係我搞到佢除牌。所以，比較適合嘅講法，你話等於係我踢過隊波降咗班咁咯（史浩克零四？）。咁但我並唔會特別開心，或者特別唔開心。
8. 當然最重要嘅係：本人並無持有任何康宏股票（噢耶！）。你心諗，傻的嗎？你咪話你工作期間隻嘢都一路停牌，你點持有？此言就差矣，停咗牌，都可以關畀你嘛。雖然事實係冇。咁正如我舊公司都有試過花紅出股票，雖則我就咁多年都冇收過，證明都係未夠勁。
9. 不過，買自己公司股票好唔好？其實一般係唔好的。我依書直說。
10. 固然睇你間公司點，咁我都唔少朋友因為公司股票而進帳好多。咁但，
11. 佢關畀你，你咪自己計數。一般都係現金為王，即係我收開五皮人工，你畀六皮我再加股票（固然，睇幾多股票，同埋上咗市未，同埋係乜公司）幾好，你畀五皮我再加股票麻麻地，你畀兩皮我然後同我講你公司之後點勁就 on9 + bye （一個好重要嘅indicator：offer你呢樣嘢嘅人，自己又係咪成份糧出股票先？）
12. 咁但，公司關畀你，或者你出糧代支（＊＊＊）以外，就最好唔好自己走去買了。原因？concentration risk 嘛．當然好多人會話 on9，我做騰訊嘅個個月拎幾千蚊去買自己公司股票一早發撚達仲使聽你9up？
13. 但我依書直說，CFA 係咁講的（亦所以，CFA真係冇乜發達，但又好少搞到乞食，雖然樓下賣雞蛋仔嗰個都CFA，但都係一門手藝，賣雞蛋仔唔食乞食丫，乞都係特色小食）。一般，你工作在嗰度，分分鐘出糧花紅都係嗰啲公仔紙，有啲仲有信心度買埋公司啲產品（例如做大家樂就買幾皮嘢現金券，我心諗，梗係買對家啦）。咁公司一唔掂，你就幾邊一齊受了。當然，你做騰訊嘅就唔使講，可以睇多次上面嗰段
14. 原本真係WFC ，但之所以打咁大段嘢，並唔係因為我對康宏有任何好正面或負面嘅感情（對個別人就有嘅，但鐵打的衙門流水的官，個別同事唔係代表成間公司），亦唔係因為我有任何財務權益
15. 主要係，因為聽聞有啲舊同事，係持有公司股票嘅。So sad。而啲同事一般都同我無仇無怨嘛。咁人地破財，我總不會特別開心—雖然我亦唔會因為咁特別傷心。
16. 我相信，既然公司過去N年都停牌，佢地都應該大約預咗有呢一日。但都係一件唔太好嘅事。咁而我接觸過嘅舊同事，應該百份之九十以上都係幾好嘅人—我可以話你知呢個比例相當高的了！好多公司四成係仆街冚家鏟，仲有四成係廢人。剩返兩成？咪又仆街又廢嘅極品。
17. 咁所以，都係so sad，但亦係就事論事，依書直說。並非而家出嚟話told ya，而係過去我都唔止一次講，自己做嗰間公司就唔好買自己公司股票嘛。書係咁講的
18. 話說回頭，雖然近期星展股價不錯，新高了，但其實同我做嘅年代都係差不多—亦即係，固然唔係差嘅投資，但，照計拎去買美股一定回報更高，就當你買指數都夠。
19. 最後一講，有舊同事問，公司除咗牌即係點，係咪即係清咗盤。答案係否，理論上，正如公告所講，係business as usual 嘅。又係請循其本，我做嗰兩年爭幾日，公司都係咁運作啦，一路都停緊牌的。
20. 之但係，如果啲舊同事持有嘅股票，無論係公司關畀你（冇計），定自己手痕買（實在唔應該自己買自己公司股票），就應該，真係凍過水了。
21. 理論上啦，冇上市嘅公司，都係有價值嘅，「Coinbase之前都大把場外成交」「Patreon OnlyFans都係」。咁但，你公司唔係Coinbase 唔係Patreon OnlyFans嘛！
22. As per 公告所講，「除牌後，將不會有正式機制協助進行股份買賣」。咁但當然，可以有其他場外交易嘅，以前都有公司試過，「本公司現正委聘一個為非上巿 公司而設的電子交易平台，為有意出售其股份之股東及有意買入股份之潛在投 資者提供對盤服務」 ，聽落係靠譜嘅，不過到時啲價就，哈哈哈哈哈哈
23. 好過冇咁咯，畢竟，停咗牌咁多年，好多人以為變廢紙。咁執返一成，好過雙目失明啩？
24. 希望呢篇文唔會又有人嚟找我麻煩。不過該公司都出名鍾意找人麻煩的。
（＊）明嘅，自然明。就係兩年爭幾日就郁咗我。嘻嘻。
（＊＊）何謂大會就自己定義，但星展一度係全東南亞最大市值公司，應該都算大。
（＊＊＊）諗唔到更好嘅詞
太古廣場三期 在 太古廣場3座行人隧道Three Taikoo Place Tunnel, mhp1261 ... 的推薦與評價
太古廣場3座行人隧道Three Taikoo Place Tunnelmhp1261香港灣仔永豐街太古廣場3座入口。有行人隧道往金鐘站。 太古廣場三期 行人隧道2007-02-27啟用。 ... <看更多>