《一袋炸雞與一袋少了兩舊的炸雞》
如果你有一袋新鮮出爐嘅炸雞，你準備同你心愛嘅人分享，但你返屋企要半個鐘，炸雞嘅口感會直線下降，你會唔會自己食兩舊先？
今日同同事一齊出去做野，做完野都晚飯時間，大家各自返屋企，而我哋不約而同地，買咗一包炸雞返去同老婆分享。
一拎到手個時，我同同事講，喂，快少少食兩件先，依家唔食一陣就一定無咁好食，然後我就放入嘴，外脆內軟，我不停呼氣，辣味同咸味係口腔入面散開。
而同事佢無食，佢準備返到去同老婆一齊食，唔想獨自擁有呢種美味。
我同佢差唔多高，但當時聽到佢嘅解釋，我覺得佢好似高過我好多。
然後一路返屋企，我一路思考，到底我係唔係自私呢？正所謂甘苦與共，好食一齊食，唔好食又一齊食，咁先係愛啊哈利！
偏偏佢呢個咁好嘅老公，係路上同我講最近同老婆關係變差，問我點算好，作為一個業餘愛情作家，我當然好樂意去分享愛情，同埋探討愛情啦。
我問佢，如果你食咗兩舊雞先返去，比你老婆知道，佢會唔會因為咁而發你脾氣，話你偷食。
佢話好大機會。
我再問佢，其實袋雞無人知道有幾多，你食咗兩件，佢都唔會知，點解你唔偷偷地食。
佢話唔想自己獨食又唔講。
我話，咁問題咪就係係呢度囉，佢問我點解。
愛一個人，甘苦與共係一種愛嘅表現，但依家你情況唔同，你唔係因為愛而同佢甘苦與共，而係因為佢發脾氣你先唔敢咁做，咁只係一種有條件嘅交換。
但你又唔會想呃佢，即係你唔係一個自私嘅人，你寧願唔食，都唔想呃佢，令佢唔開心，其實你已經做得好好喇！
問題就係出係呢度，點解你享受到最好嘅炸雞，佢享受唔到，就會唔開心發脾氣呢？
假如你當兩個人係同一個個體，食一舊新鮮炸雞係有兩分，而凍嘅炸雞係一分，你先食兩舊，再返去同佢食八舊，總分係十二分，但你返到去同佢一齊食凍炸雞，整體分數只係十分，明明有十二分你咗唔揀，偏偏要揀十分，你唔覺得好唔合理咩？
因為你哋仲未肯將兩個人當成兩個個體，一個七分，一個五分，咁就出現高低，咁就出現比較，為咗呢種公平，而損害兩人整體利益，就係你哋心目中既愛情。
愛一個人，從來都唔係講公平，當你開心咗，你同佢分享，佢明白你嘅喜悅，為你感到高興，咁先係良好關係；兩個人好公平，但兩個人都損失快樂，只係互相拖低大家嘅腳步。
而婚姻需要進步，每行一步，都總需要有一個行先，再互相牽引向前行，你有冇聽過兩腳一齊跳嘅人會行得快？
為對方比你活得好而感到高興，兩個人都有呢個諗法，關係先會係不平衡中邁進。
我返到屋企之後，將炸雞重新焗好，然後同老婆分享新鮮嘅美味，太好食喇，下次我同你一齊去食最新鮮嘅炸雞！
－－－－－－－－－－－－－－－－－－－
婚姻關係故事：
小說《老婆最後的十二個難題》生者與逝者永別的交流【全本完】
第一回傳送門：http://bit.ly/37UXIw5
小說《弊傢伙，我女朋友有咗》結婚與生育的準備和考驗【全本完】
第一回傳送門：https://bit.ly/38gDQU8
小說《婚姻革命系統》【連載中】
第一回傳送門：https://bit.ly/3zaVunx
－－－－－－－－－－－－－－－－－－－
支持作者：
依家我推出一個回水計畫
購買《老婆最後的十二個難題》，98蚊，運費自付，如果睇完你覺得唔值98蚊既，我退款比你，退幾多你話事，最多98蚊全退，免費送比你，運費我就唔會退喇！
購買連結：
https://bit.ly/3fL9QUH
此計劃適用於較早前已購買的讀者，你地要回水隨便出聲！
我唔想因為價錢既門檻令大家錯失左一個好故事，反正蝕我就預左，Nothing to lose
講既就係咁多，Whatsapp電話9616 7814 （書展期內不定期回覆）
