話唔睇又睇仲要好鍾意
Emily in Paris 呢套野我未睇之前已經見到有好多劣評：話個劇本荒謬、巴黎條街太乾淨、做乜搵個韓國演員做中國人角色、點會個個法國人都流利英文等等。
上個禮拜諗住一路做嘢一路求其睇少少，點知越睇越好睇，有啲內疚地鍾意咗套劇😅所有之前睇嘅劣評我都認同嘅，但係呢套劇實在太充滿正能量，講真今年武肺再加上香港嘅情況真係 sad得好緊要，要睇返啲童話故事沖喜下。
Emily 可以話係好多現代女性嘅dream come true:
1. 喺巴黎返工
2. 自己一個人住
3. 喺巴黎單身
4. 唔知點解有無限量Chanel手袋同外套
5. 被邀請到法國鄉郊酒莊免費任飲香檳仲要誤食小鮮肉
6. 靚仔鄰居每次當佢有需要嘅時候就會自動出現幫手，包括提供食物
7. 去到異地一個月內已經識到真心好朋友👯♀️根據個人經歷呢樣嘢係最冇可能，通常都會遇到一堆怪人或者唔夾嘅人最後先識到好朋友，點會求其喺街撞到兩個女仔之後就勁friend 😂
其實劇情荒謬都唔緊要啦，最緊要睇得開心。睇到Emily個角色好似見返啱啱出嚟做嘢嘅自己：遇到咩project都勁熱血；乜人都信；成日撞板成日俾人呃，但係反而就好開心，之後亦會喺其他地方遇到好多好人好事。
另外有一段講Mindy 角色見番以前好friend 果班大陸有錢女驚比佢哋睇小，想隱瞞自己做保母，點知原來班friend一早知佢係巴黎撈唔掂，只係冇拆穿佢，仲默默支持佢完成夢想做歌手。
呢一段睇到勁感動，追夢呢㗎野唔試過都唔知原來有好多朋友會支持，喺真正朋友面前真係唔使扮嘢，你好景佢地會戥你開心；唔好景會默默支持，呢兩年真係體會好深❤️ 覺得個編劇可能自己都經歷過先會咁樣寫，好有同感。
無論事業又好，追夢又好，持續左一排之後始終會有啲洩氣，久不久真係要重溫下自己嘅初心，搵返當初嘅熱誠。如果做任何事都為求穩陣，覺得一定成功先做，結果好多有意義嘅事都做唔到。唯有對生命對生活搵返啲熱誠，乜都試吓，乜都努力下，有時誤打誤撞先會有成果。Anyway，未睇嘅話就快啲睇，睇咗就分享吓你有咩感想啦🤗
