女朋友一發脾氣就會死（下）
上集：https://bit.ly/35uaRLj
「你仲唔去搵嘢食？」晴晴望向我。
晴晴嘅性格係有少少暴躁，我要點先阻止到佢發脾氣？根據呢隻Game嘅設定，就算係撒嬌式發脾氣都計喎。
眼見晴晴開始睥我，我手上仲拎住支木棍，我一咬牙，乾脆用棍打暈咗晴晴。
人都暈咗，肯定唔會再發脾氣啦。
我揹起晴晴，開始繼續行。
行咗一段路，我搵到一個食物資源點，我放低晴晴，將食物裝入背囊。
忽然間，一支利箭從樹後射過嚟，直插入我嘅心口。
好痛……Game Over！
點解？晴晴明明未醒，冇機會發我脾氣，點解我都會死？
我仲未諗通，又進入下一局。
呢次我出盡渾身解數，哄掂晴晴，哄到佢完全冇任何怒氣。
然後，我哋一齊努力，想解決眼前嘅困境。
但結果，我哋都係死咗。
一局接一局，我試晒所有我想像到嘅方法。
但無論我點樣做，結果唔係我死，就係晴晴死，或者我哋一齊死。
甚至有一次，我忍唔住殺咗晴晴。
晴晴一死，當然係Game Over。
晴晴問：「喂，跟住落嚟，我哋點算？」
「是但啦。」我直情唔想諗，呢個係咩場景。
晴晴接二連三咁問：「你痴線㗎？我哋就嚟死啦，邊有得是但？你想死咩？」
「其實我哋點都係死，死梗。」我向晴晴講出真相：「我哋陷入咗一個無限輪迴嘅空間，只係你冇記憶，我哋已經經歷過喪屍、地震、末世……」
話未講完，又有意外發生，我哋又死咗。
你睇吓，講出真相都冇用，仲可以點呢？
我乾脆放縱自己，晴晴鬧我，我鍾意駁嘴就駁嘴，唔鍾意就唔出聲。
終於有一次，又係喪屍場景，我俾晴晴激得太嬲，我企起身，走咗。
晴晴拉住我：「你去邊啊？出面好危險。」
我甩開佢隻手，一句嘢都冇講，反正都係死，有咩危唔危險。
但奇蹟地，離開晴晴之後，我好順利咁搵到食物，好似被祝福一樣避開危險。
行咗一段路，我加入咗附近嘅人類營地，一齊打喪屍。
好幾次險死還生，我都死唔去，後來營地嘅科學家研發出疫苗，人類漸漸擊敗喪屍，營地愈嚟愈大。
最後一隻喪屍都被消滅，全人類開咗一個盛大嘅Party。
Party上，我居然見到晴晴，佢仲未死，不過佢身邊已經有另一個男伴……
「Mission all clear！」
我終於見番正常嘅世界，我將頭上嘅頭盔拎落嚟，正常嘅記憶終於返番嚟。
原來，我同晴晴已經分咗手。
雖然我哋都好愛對方，但性格實在唔夾，佢嘅脾氣太暴躁，我哋點磨合都行唔到落去。
分手之後，我成日都掛住佢，好想搵番佢。
於是，我買咗最新嘅VR遊戲「Move on Online」，可以設定前度嘅性格，不斷同佢經歷唔同嘅末世。
但係，無論我哋點樣溝通，都係死路一條，只有同前度分開，我哋先可以各自生存落去。
每次掛住前度，大家就會玩呢隻Game，玩完之後，玩家就會意識到，分開係幾咁合理嘅選擇。
我食咗一支煙，然後……我又掛住佢。
我只可以拎起頭盔，再開始遊戲。
我忽然記起，我已經玩咗呢個遊戲好多好多次，每次我都可以通關，每次我都明白分開嘅原因，但每次我都係要再玩。
人可以控制自己嘅行為，但總係控制唔到自己嘅感情。
表面上我哋知道點樣係錯，但內心總係難免犯錯。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #女朋友一發脾氣就會死
