《海灘裡有個動物園》
撒丁島大大小小有超過100個沙灘，每個嚟渡假嘅人去海灘都幾乎係指定動作。
歲月不饒人，金髮藍眼睛妹子、蛋蛋臉、大長腿、黃蜂肚、一眾逼波蕩漾嘅畫面，簡直將我「全軍覆沒」。明明套陳年比堅尼慶幸仲啱著，但真係好想好似寄居蟹咁掘個沙窿own埋自己。
意佬問我做乜喱喺把遮下面唔出去曬，我話：「費事啦～妹子們就話同陽光玩遊戲啫，唔通我呢挺陳年中女走出嚟同陽光玩石油氣，嚇爆人哋對眼咩？」
佢二話不說，求其篤咗幾個疑似意法藉、東歐裔嘅女仔，就話：「你望吓人哋有豬腩肉、斑馬屁股、大象腿，猿人背肌、腳毛仲多過我嘅都有！你咁都要喱埋？咁不如冬天先嚟海灘吧～！」
雖然當刻好想煎巴佢！但諗深一層，人比人真係比死人，意佬佢搬哂成個動物園出嚟，無非都係想俾我知道，其實我都唔係差得過隻寄居蟹啫。依家怕曬到成臉雀斑，唔通老人斑都出齊先去曬咩？怕身材唔夠冚，唔通到格肋底舊肉dum到落條腰先走出嚟玩露肉咩？
啱嘅，做人已經有好多顧慮，如果連去個海灘都瞻前顧後，實在太折磨自己喇！唔好再妄自菲薄~每個人總有佢嘅美，缺陷，也可以係缺陷美。
Instagram @misi_gipsy_italy
#嫁到意大利
#意大利慳悠遊
#比堅尼動物園
#缺陷美
#makeupfree
#素顏加防曬
#曬完又要去斑😅
#姊妹們有冇去斑產品好介紹🤣
