關於 威剛收貨中心 ，我們在網路上蒐集到這些相關的討論、資訊與評價

【龔成問答信箱】（Q21261-Q21280）

Q21261：

龔Sir, 請問銀娛現價PB 4倍，金沙PB 10以上，Why PB so different ?

龔成老師：

記住，當我地計算企業價值時，要同時考慮企業的業務價值及資產價值，這是配合的。由於企業是永續經營，不打算這刻清算，因此投資者一般會著重業務價值多過資產價值。

有兩點你要注意，第一，市賬率是衡量企業資產價值的方法，但你要了解翻佢的資產價值是否有具體呈現在資產負債表，簡單來說，就是報表上的價值，是否能具體向映該資產的真正價值，這樣去衡量賬面值的代表性。

第二，市場估值時，可能是否考慮業務價值多過資產價值，甚至有些企業，市場不理會資產價值，因此，你要了解翻這企業過往賬面值的情況，市場如何定義價格與賬面值之間的關係，從而推算該賬面值是否有參考價值。

------------------------------------------------

Q21262：

老師，我係你學生，我現在想問下

1. 如何判斷那隻股是增長型?

2 增長型及龍頭 PE 就可調高至25-30?

3. 目前在分柝一些光伏板塊嘅公司 eg 福萊特玻璃
及隆基

我覺呢兩家也是增長型 可以給 30- 40 PE 嗎？

龔成老師：

1）要睇佢身處的行業，現時的業務情況，發展，以及過往財務數據，例如過往生意的增長力如何，預期將來的銷售怎樣。

2）的確可以調高，但未必有一個好實在的數，因為估值對每一個行業來講，其實都不同的。

3）隆基泰和智慧能源（1281）質素較普通，投資價值未算高，盈利變數大。所以，在估值上，都不會比太高。

至於福萊特玻璃（6865）有質素。你可以比高少少市盈率佢，但就未必值得去到40倍市盈率。

佢主要在中國生產及銷售光伏玻璃，此外，亦生產及銷售浮法玻璃、家居玻璃及工程玻璃，並向中國大陸、日本、新加坡、韓國、台灣、德國及美國等地客戶，銷售產品。

睇翻佢的資料，佢的光伏玻璃產品主要用於生產晶體硅光伏電池，以及用作薄膜光伏電池的蓋板，而佢的生產設施位於浙江省嘉興市。

無論生意與盈利都增長理想，財務數據正面，這股值得長線投資。唯一擔心的就是估值問題，始終現價唔算平，近期股價有時在合理區頂，有時略貴。如果投資，可以小注慢慢分注，不建議這刻大注。

------------------------------------------------

Q21263：

Hello 成哥 如果而家2238廣汽集團同吉利汽車等嘅車股比較 算唔算係比較值博嘅一隻？

我見佢都有電動車業務 但係股價跌到好殘

如果而家要揀一隻值博又有發展電動車嘅傳統汽車股 會唔會有比2238同埋175更好嘅選擇？

因為覺得經濟好返傳統汽車行業都會逐漸回暖

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

如果講長遠發展，吉利會較好。

------------------------------------------------

Q21264：

你好，老師，仲有問題想請教你！

好耐之前家人幫我以67.5入過1200股匯豐，一直以收息為主，其後跌市，有再入1200股，現在成本價56.1，應該持有定賣出一部份擺入其他股？

之前亦有月供$2000中銀香港，現已停供，現持有845股，成本價是28.614應繼續月供定持有？

如果我有5000蚊用作投資，我應該如何分配資金？以平穩增長股為主？定係可以考慮一些潛力股？感謝

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。。

如果你投資目標是收息，可持有。如果你希望有較高的增長，就應該在匯豐股價上多少少時，轉其他。

另外，你持有中銀（2388），這會令你的組合太過集中在銀行業。

其實，我地最重要是建立一個組合，要平衡，要優質，同一行業不要多過30%，同一隻股票不要多過15%，你長遠要平衡翻。

至於每月$5000，就要睇你的年齡及風險度，最簡單就是投資優質，平穩增長股。

你可以考慮盈富（2800）。

另外再加：銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21265：

我想問，你成日叫長線，但假如我一直持股唔放咪冇賺囉？？

龔成老師：

你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，那麼永遠無法取出財富。

我地累積財富，會用「先增值，後現金流」作策略，前者著重增值，之後就會改變策略，將已增值了的資產，轉為現金流類別，而我地就是不斷享受資產產生的現金流。

------------------------------------------------

Q21266：

龔成老師：感謝你既回覆，另外想問多少少，小朋友有無話幾多歲學投資好啲？

同埋用咩方法去慢慢教佢理財知識好啲？因為你成日都講理財知識越早學越好

龔成老師：

我相信7-10歲，都可以有基本的理財概念，例如錢從何來（起碼要佢知道，錢是由父母努力工作得來），另外就是量入為出，以及儲蓄的概念。

在適當年齡你可以比零用錢，這是一個理財的訓練，同時慢慢由每日比，轉為一星期，甚至一個月，等佢自己分配。

你可以玩「大富翁」之類的遊戲，都是一個學習過程。我記得《富爸爸》這書的作者，有出過「現金流」遊戲，有兒童版的，你可上網找找。

------------------------------------------------

Q21267：

您好，龔成老師，我係19年5月股票班同學，最近睇完您本書 五年買樓四部曲，想同太太買一層細價樓，請教一下您既意見。

而家我本身有一層自住樓，同太太加埋現金一百五十萬，想係灣仔買樓，因為老師既書都有講過星街、堅彌地街都較好

而且近商業區，人口密度低，有名校網，區內供應預小，我預算550萬至600萬左右，老師您認為買灣仔舊樓收住租搏收購好定係買30年左右既相對新樓有流動性好？

而家我自住樓係我自己名下自己供，睇完老師既書，開頭集中睇堅尼地城、黃竹坑、大圍、九龍城，但堅尼地城好似嘉輝花園咁租金回報相對低2里都做唔到

黃竹坑買唔起，大圍冇咩樓盤都係金獅花園無咩選擇，一係就補地價居屋，感覺上唔係私樓升值潛力又差小小

灣仔區黎緊有會展站，學您教的方法，去左城規會度睇，告士打道以南莊士敦道以北全部係商業用地，地積比去到15倍，咁樣我推輪呢度既地價會唔同，所以想係灣仔區置業。

猶豫緊600萬內預算，買舊樓搏收購好，還是買30年內200尺以上既樓保持流動性好？謝謝老師！

龔成老師：

由於你本身有自住樓，因此現時的作用是投資，最好是建立一個平衡組合，即是你買完樓後，最好仍有一定的現金，以及其他資產剩。

至於灣仔區，有質素的，你可考慮。

我會建議你買30年左右既相對新樓有流動性較好。舊樓博收購，始終成功率不高，因為全港超過50年的舊樓有5000幢以上，要成功被收購並不易，而這段時間往往要支付維修費等，因此值博率並不高。

至於其他地區，你可以留意一些細少少，樓齡不太新的樓，睇下有無一些目標範圍。

其實，灣仔不差的，都可以留意，只是我書無特別講，但整體唔差，你可以細心發掘。

------------------------------------------------

Q21268：

老師，如果我在嘉里派特別息之後賣嘉里轉港燈是否可行？港燈現在會不會特別貴？

謝謝老師指點

定是由得他，放嘉里在度？
嘉里建設（636）

龔成老師：

兩隻股的性質有點不同，唔好貪特別股息，因為佢派息後會除淨，股價會自然調整的，所以不一定有著數。

嘉里增長力都有，但港燈（2638）就只是收息，所以，要睇翻你的投資目標。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

------------------------------------------------

Q21269：

阿Sir，請問吓你以下一條問題，希望你可以回答給我明燈。 方間有許多股評人及平台都教人或講有人因着股市波動而買期權。

所以想問阿sir, 你認為期權可以投資嗎？
唔該阿sir.

是不是不接觸為妙！

龔成老師：

我自己會有少少保留，因為我20年前，都有玩不同的衍生工具，但最都是虧損，之後集中正股長線投資，就贏錢。

當然，一定有人投資期權贏錢的，但我過往做銀行及證券行多年，觀察散戶的投資成績，玩衍生工具的，大多是輸錢。

------------------------------------------------

Q21270：

龔老師你好，我想請教一下，我有2隻股票，分別是3868/$6.18買入及6606/$76.3買入，想問下這2隻股票前景如何，要止蝕嗎？謝謝

龔成老師：

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但不能投資太多，因為佢業務都有風險的，要注意股價波動，如分注長線都可以投資。現價已略貴。

這股前景不差，你持有就得，但預佢股價較波動。

諾輝健康（6606）業務有發展，但之前貴。

佢係中國結直腸癌篩查市場的先行者，旨在推進技術創新，並加快癌症篩查技術於中國的採用。

根據報告，其專有的非侵入性多靶點FIT-DNA測試－常衛清為中國首個且唯一獲國家藥監局批准的分子癌症篩查測試。

佢的兩大家居結直腸癌篩查測試產品，常衛清及噗噗管協同面向不同風險程度的目標人群。

「常衛清」有一定的護城河，可避免施行一些具有侵入性的手術，就能得到一些結果，長遠有一定的發展。潛力度存在。

佢已於全球包括中國境外的17個國家或地區，建立包含71個專利及專利申請的組合。通過直接銷售渠道包括醫院、體檢中心、保險公司、藥房及網上渠道向終端用戶提供產品，亦在較少情況下通過分銷商提供產品。

發展潛力都有，但始終業務未算完整，未有盈利，因此風險都存在，這類股小注投資好了。

------------------------------------------------

Q21271：

想請問而家中國銀行(3988)

而家仲抵唔抵買，現時$2.96。月供緊2手，諗住賺下股息，現時價位會否太高?

龔成老師︰

中行（3988）由於內地經濟無過往年代咁強，股價無過往咁好，由中美貿易戰開始，中國的經濟動力已有所減少，加上最近的疫情，都是影響經濟的因素。不過，初步已好轉，但不是高增長型。

現價合理區中間，唔話係好高，依然係有投資價值。用此股收息係合適，但就唔好對股價有太大期望。

另外，我地最重要是建立一個長期的「財富組合」，要優質，要平衡。同一行業不能太多，同一股不能太多。

所以，若你係以收息作為目標。你可以投資多幾隻不同類型的收息股，令你組合更豐富，和平衡性更高。

以下都係一些有質素的收息股，供你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)。

------------------------------------------------

Q21272：

老師你好！留意了你的教學很久了，但第一次鼓起勇氣寫信給你，希望真向你請教投資的心得和方法。

本人28歲，已婚，我月入3萬，老公大約工資2-3萬，供樓大約1萬5千蚊，減洗費後大約能每月儲蓄2萬5左右，並準備迎接小孩出生。

現有儲蓄約70萬，並擁有以下股票：

11 - 200股，$162 (在2019年已買入)
1211 - 500股 ，$270(當時高位入但沒走貨亦未分注)
9988 - 100股，$253

請問老師我應如何做好我的資產管理和投資策略？

龔成老師︰

我地投資策略其實好簡單，主要係因應你現時人生階段和投資取態，去建立一個平衡的財富組合。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為先，建議你用「平穏增長股」 + 「潛力股」的組合。

由於「潛力股」係需要一定經驗，如果你經驗較淺，可以先小注，大約3成左右。若你係有一定經驗，你可以投資到約5成比重。

現有持股方面，無大問題。雖然比亞迪(1211)係買貴左，但由於佢優質，你連同阿里巴巴(9988)、恆生(0011)一齊長線持有就得。

而你快將迎接新生命，相信會有不少小朋友方面的開支。所以，你係開始投資計劃前，最好先儲起約半年開支和小朋友出世前後的相關洗費，以後備不時之需，咁會較為穏當。

現在你每月先用$13,000做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

大市現處於合理水平，股票和現金最好各佔一半。你可以睇下70萬資金，扣除半年開支和小朋友支出後的比例。若現金佔依然高於一半，你可以再以"分注"形式，入多少少貨。

餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21273：

老師你好，我$15.7買入968, 請問應該長渣還是搵機會放?

另外老師認為939和9888值得長線持有嗎?

如果有100萬存款, 股票比例30萬ok嗎？謝謝回應

龔成老師︰

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

你買價係略貴，但又唔係追貴好多。而且畢竟佢係有質素，你長線持有就可以。但你要預這股股價上落較大，故不宜佔比重太高。

若此股現時已佔你比重較多，你最好沽少少，去平衡翻個風險。

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，你唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但你預此股不是高增長型。

至於百度（9888），佢係有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左，同時到上市一刻不確定性高左。

此股都係有質素，你現貨可長線持有。

現時大市只係合理水平，現金和股票最好各佔一半。如果你有$100萬存款，你可以多用20萬，以分注形式，去投資一些優質股。而餘下50萬資金，我地就等大跌市出現，才加大力度掃貨。

但緊記，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。重點係要平衡，唔好集中晒係2,3隻股票身上。

------------------------------------------------

Q21274：

老師你好，我打算購買元朗尚悅嶺370尺單位作投資用途，因家人先前買入，但移民了，想轉俾我，等我供。

我依家係同老公租緊屋住，因為元朗不方便返工，所以不打算用作自住。

但擔心元朗地區升值潛力低，如資金用作其他用途可能更好。想你俾下意見，唔該曬

龔成老師︰

元朗區始終跟市區有一段距離，所以長線升值能力會較弱。

特別係跟港鐵站較遠地段，會更受影響。睇翻你元朗尚悅嶺這個樓盤，唔係話無投資價值。但會相對較一般，增長潛力唔會太強。

你可以先比較翻租金回報率，到底吸唔吸引，再作決定。

如果租金回報率唔算係特別吸引，而你本身資金又唔係好多。我建議你先集中用優質股去增值，咁會較好。

------------------------------------------------

Q21275：

龔生你好！一路有留意你講3067同1810

想問吓如果想長期每月入貨，呢兩隻股票邊隻潛力會大啲

龔成老師︰

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，你可以用佢作為月供選擇。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。

所以有長線持有價值。由於基金有30隻股票，比起單一股票，風險能減低。

此股可以月供，或自行分注小注慢慢收貨（例如每月買一次、或2個月買一次），然後就長線持有。

潛力度和質素，2隻都係有。但安碩恒生科技（3067）係一籃子的科技企業，相對小米(1810)會更能分散投資風險。

但長線我地係要建立一個平衡性架組合，唔可以成個組合，只係得1,2隻股票。

而且，這2隻股票雖然係有質素，但佢地波動性都偏高。因此，若你係較年長，或者係較保守的投資者，這2隻股票就不宜持有太多。

------------------------------------------------

Q21276：

龔成老師，多謝之前的回覆，長話短說，我人已在外地，最終留下一小住宅單位在港，本打算能在外地置業才賣的，但勢估不到香港狀況動蕩至此，租客剛剛完約搬出，由於我一心留在外地發展，加上對香港信心不大，我正考慮應否把樓賣掉（樓價跟買入差不多），所以想請教：

1） 對自己此決定有懷疑，此時賣出是不是明智決定？
2） 另外，萬一真的賣出了，又不想現金儲放在銀行，以致可以於3-5年後可在外地置業，有可建議？外地的投資理論差不多吧？

非常感激，能傾談此topic的朋友不多，你的建議對我很有幫助！

3）我有推介朋友參加你的投資班，會否考慮推出網上版？

龔成老師：

1）不如我講少少香港樓市分析，你自己衡量現時決定是否正確。香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2）賣樓後，如果你已對外國樓有認識，加上租金回報率不差，其實已可投資外國樓。

另外，你可以投資一些流動性較強的項目，例如外國的ETF（如美股VOO、QQQ），而香港ETF，如2800、3110、3067都得。

另外，可以考慮投資收息股，因為股價變動相對較少，對你的情況都幾適合，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

3）我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21277：

成老師你好呀，我現年22歲，月入21k，我學習價值投資開始了大約9月開始月供11k股票直至現時，月供包括(均價)：

2800($26.9)
0066($41.9)
0002($73.1)
0027($60.1)
2013($13.5)
0981($21.2)
9988($237.4)

另外曾一手買入9988($227.8)一手，0981($20.2)一手，0823($58.4)，一手。

我想問一問我的投資組合風險會唔會唔太適合我這個年齡？

這個月供組合會唔會太保守是否需要作出轉換？
是否需要加大月供額？

我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
應謝回覆

龔成老師：

現時月供的股票，都有質素的，基本上可以持續，長期進行。但要留意，微盟集團（2013）、中芯國際（0981）的風險較高，因此月供金額不建議太大。

其他就無問題。

至於現時持有的3股，可長線持有。

基本上，現時的月供組合，可長期進行，如果日後有較多資金，可以投入更多在月供，你可以考慮加入恆生科指（3067），$2000月供。

因為你22歲，可以承受一定的風險，所以應調高組合的潛力度。

另外，當然要同時留現金，你可以等一些潛力股下跌時出手，如小米（1810）、中生（1177）、舜宇光學（2382）。

加油！要好好把握黃金10年！

------------------------------------------------

Q21278：

龔成老師您好，我是您的忠實讀者，住澳門，香港人，今天已40年歲。首先想多謝龔老師的無私建議及幫助，知道老師每天收到大量來信，需要每天花上數小時解答，希望老師繼續努力，並祝身體安康。

自上年疫情開始，有幸在網路認識老師及您的著作，基本上有關老師所寫的股票書籍都已經閱畢， 亦由上年年中在香港某銀行開始月供股票如下：

2800 盈富基金
0823 領展
1038 長建
0669 創科實業
0066 港鐵
1211 比亞迪
9988 阿里爸爸

現在每月月供約16000。盈富佔供款比例稍多，其他都平均供款，現在談成績真的太早，但帳面上已經賺回買書錢有餘，高見有20%，現在回落至8%左右

但我很清楚長期持有不需要理會股價波幅，只想告訴老師所寫的是可行的，亦明白價值投資，持續購買並長期持有優質股的威力。期待龔老師的新作，定必拜讀，努力增強財商。

另想請教老師以下我的邏輯有沒有問題：

本人在澳門手持一自住物業，可轉按減輕利息同時套現約140萬，每月新供款額佔月薪約23%（原按揭供款佔約21%）。

打算利用這筆錢同時努力儲錢作進一步資產配置，希望10年後能財務自由，但供款年期又變回25年（原按揭尚有15年），總利息加行政費約需要110萬。

我想問利用現在低息環境套現，以現在的現金購買優質資產並長期持有，用未來貶值的現金償還。因為是長期，縱然新按揭還息還本比例又重設，但此計似乎可行。我的想法有錯嗎？

明白必須購買優質資產，先增值後現金流，並定期檢視資產情況，多多學習才能實現。月供是因為我尚未能掌握估值，希望日後老師能來澳開班，定必報讀。

謝謝老師的時間及幫助。感激萬分。

龔成老師：

現時你月供的，可以保持，長期進行就得，這些都是有質素的股票，同時處於一個平衡狀態，而適合你的年齡的，當然，你同時都要留一定的現金在手。

對，我地一定要長線的，不要著重短期價格因素，集中長期的財富累積。

至於轉按方面，由於可減輕利息，因此值得做。而之後只是佔月薪23%，這數目不高，因此可以做。

至於套現了$140萬，其實原理是增加了負債，這點你要明白。如果增加負債後，仍是佔你總資產的比例數不高，就無問題，同時你要明白風險度會高左。

至於現時低息環境，你的方向是正確，因為利用低息資金，投資得到較高回報，能有效創富，不過，你都要同時留意風險度，因為現時的投資市場，並不是特別平，因此在時機上，只是中等。

最好當然在「有明顯投資機會，利用借貸投資，就能創造最大效果」。

因此，你的大方向正確，因時機只是中等，所以就算套現後，都只建議部分投資，餘下等機會。

------------------------------------------------

Q21279：

龔sir你好! 我係你舊生, 遲啲都會上你的進階班。上咗你嘅課堂之後, 都有做月供股票 和 買入優質股, 現賬面都有15%的回報, 個別股票更升80%, 感謝你!

我剛買了綠置居(我名下) 並於2022年收樓, 我月入40K, 一個人做按揭, 每月大概供$9000。

由於現在大約有$70萬現金和$70萬股票, 所以想為太太置業 並預算購買約500萬的物業。她薪金大約45k, 並預計只有她做按揭。

Plan A: 買市區舊樓, 近地鐵站, 約250呎, 35-40年樓齡

Plan B: 買荃灣舊樓, 行10鐘到地鐵站, 約330呎, 35-40年樓齡

Plan C: 暫不買樓, 繼續月供股票 和 儲錢。伺機再為太太買樓。希望龔Sir賜教, 感謝回覆

龔成老師：

現時你的供款水平不算高，因此，就算太太置業，都可以考慮的，但你地要明白，這動作會令你地的財富較集中在物業，同時負債增加左。不是不可進行，但就要明白這風險。

Plan C，在這刻是較好的，因為當你地這刻買樓後，其實要用了不少的現金及股票。不過，如果你地大方向好想買樓，Plan B其實可以考慮，只是在這刻進行，還是過1、2年，等你地有更多資金才進行。

荃灣這地區都不差的，是市區與新界西的重要通道，配套發展成熟，如果日後發展大嶼山，這地區都能受惠。

因此，Plan B在大方向可以進行，只是在時機上，睇下你地有幾想這刻進行，還是等多1、2年進行。

------------------------------------------------

Q21280：

Hi 龔成，我係做股票經紀買賣的、想請教下你意見麻煩晒

我之前係做髮型師，而家立心想轉型去做投資股票工作，之前係光大證券。由於學歷不高，所以我不停努力去進修英文，同去HKU讀左Finance。

跟住考保險和證監牌，我自已本身都好鐘意投資。

睇股票市場，好似上一年，幫客人投資，自已每個月都會有一份收入。但當時況不佳，就算我唔理會輸錢個部份，分分鐘會變成零收入。

龔成老師︰

做股票經紀這工作，收入的確有一定波動性。其實就同好多銷售行業一樣，當市道唔好，無人買野，自然佣金會減少，令收入出現下跌問題，這是無可避避免的。

但我地決定一份工作是否合適，除了睇自已興趣和意願。更重要的，是用長期角度分析，你到底想5年後、10年後，你想收入如何？身價如何？生活如何?工作如何？

當你有左長期的設定，你這一刻就要想。現時這個工作，是否可以達至你的目的。而這個問題答案，只有你自已才會最清楚。

見你過往，都為這份工作，付出不少努力。

你可以睇翻如果證券工作真係適合你，你就要找方法解決你當下所擔心的問題。例如經濟環境差時，要找其他兼職，去平衡個收入。或者做些小生意，令自已多個現金來源等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20121-Q20140）

Q20121：

啊sir,幾年前剛大學畢業上你的股票班，當時用40蚊左右買比亞迪，$240時放左一半，賺左我人生第一桶金

由於我係文科生，一直以為股票要數學人先玩到，多謝你用簡單易明的理論教懂我價值投資

另外，我想分享我的夢想係做一個可以融合心理學、輔導學、專業塔羅諮詢師。因為我興趣係神秘學、身心靈，所以我好明白吸引力發則、秘密、財富金鑰呢幾本書係幾有用，好多謝啊sir你向我地推介呢幾本書，比更多人明白改變潛意識的威力

啊sir你係我心目中唔止係理財專家，都係發放正能量，叫人了解自己追夢的KOL！現在網絡負能量好多，KOL質素參差，呢幾年當我對自己有懷疑時，我睇你Facebook會鼓勵自己，心諗龔成做到自我實現，我都做到！

現在我正職做XXX，兼職做駐場塔羅師/線上塔羅諮詢，正職志在儲錢及吸收經驗，都在實現夢想的路途中，希望幾年後再inbox你，可以用一個非常專業的諮詢師身份與你分享！

龔成老師：

加油！

比亞迪（1211）呢個回報，你應得的！

現時你做好塔羅師/線上塔羅諮詢，我相信長遠有發展的，你要試不同的宣傳手法，要有人認識先產生更高價值。

加油！你已經行對了方向！

我要記住一點，你要幫人，要產生自己的價值，不要為講而講，為賣而賣。我一向的方向都是幫人，希望有正能量，我不會為宣傳而講一些誇張的野，這是大方向。

我都希望你明白這點，以「真心幫人」為中心。

------------------------------------------------

Q20122：

老師
感謝你的分享！

我都想跟你分享一下

原本我對投資幾乎完全沒有概念
最多只懂得跟風 月供股票
而我男朋友曾是「賭仔」
常期望一夜致富
以致常常「輸身家」

但自從他上過你的投資班
我發覺他的心態平實了很多
由以前「有錢就身痕」
到現在願意跟我一起慢慢累積財富

而我
亦透過他每次上完你的堂後的分享
對理財、投資概念提升了不少
以往，我常常很短視
會用生活費作投資

以致股價跌了一點點就會恐慌
最後手續費都蝕了
但現在
我聽你的話
投資應看公司的長遠發展
所以現在投資時
心裏踏實了很多

實在非常感謝你！

我在過去的一年
終於儲到人生的第一個六位數
由以往月月清
到現在變了儲錢是我其中一個主要嗜好

龔成老師：

太好了！

我地最好要學「理財」，不是「炒賣」，只要我地有正確的理財知識，知識與財富一定成正比的。

其實我自己，過往都有行錯路，之後就是輸得多，所以先慢慢學翻正確投資。

加上，我過往做銀行同證券行，都見到唔少人炒賣輸錢，與家人不和，所以我都想你地學正確的投資。

見到你財富增長，反映你已行在正確的路，理財是長期戰，加油！

------------------------------------------------

Q20123：

我現時的投資組合如下，有一些策略請龔sir比一點意見：

持有平穩增值股：
0066 有一手@$43.75

持有潛力股：
3067 有兩手@$18.19
1177 有一手@$6.99
1833 有兩手@$93
9988 有一手@$271

本人30歲，有家庭，一個小朋友，一直供緊樓，同埋有其他開支，不過可以儲到錢，打算之後嘅投資策略是：

1. 現金儲蓄有30萬會留4成現金不動用，咁有18萬分別是9萬在平穩增值、9萬在潛力股。

2. 0066 會每一季買一手（係用3個月出糧儲起的錢來買）

3. 加入0027 銀娛或其他平穩增值股，但我9萬在平穩增值股裡，如果買左0027銀娛之後我只剩下3萬左右，咁可以買咩入場費較低的平穩增值股好？或有其他建議？

4. 我持有的潛力股，打算3067是每三個月固定入幾手，慳返手續費，之後不斷儲貨長線持有

5.1177 再待跌8%就分注買（用金字塔式）

6. 1833 和9988 不知往後的策略如何？

7.其實我應唔應該買一些收息股如778/435、因我見有6%息率？點樣將啲錢再滾大啲，同平穩增長類一齊持有？不過我見股票勝經教嘅水桶投資法建議收息類都不適合我年紀。

謝謝。問題較長。

另外, 我自己&小朋友都有供緊3份保險.. 其實好想斷供….以前未識投資股票, 以為買保險一定好過放銀行, 但我由幾個月前認識龔SIR同埋睇你的書後, 我唔想再供以下3份保險了..每年開支都幾和味..同埋諗返個回報其實好少。

自己有一份人壽儲蓄保險，年供約$18,000，要供18年，已供5年，剩13年要供，

小朋友兩份: 一份年供約$18,000人壽儲蓄，要供18年，已供5年，剩13年要供，另一份是年供約$16,000，要供5年的純儲蓄，供左2年，剩3年要供，

8. 以上3份保險開支約$52,000/年, 龔SIR我想請教你的建議, 我現在斷供好嗎? (當然問過保險經紀人是一定沒可能攞返之前供的錢架啦), 如果我決心斷供，雖然會蝕左之前幾年的錢，但如果我用未來15年-20年時間將買保險的錢，用黎投資優質股更好吧？亦可幫財富增值, 建立平衡的財富組合, 請問我的方向咁樣正唔正確？

9. 接上題，敢問龔SIR如果我上述方向正確，真的斷供保險, 我用15年-20年時間投資優質股, 回報應該更加大，如果選股成功預計回報都想有10%-15%或以上，如果是, 我的方向應該投資哪幾隻平穩增值股是有這個回報?

我分注儲貨買入優質股既話，例如0066﹑0027這些優質股可以做到呢個回報嗎? 扣除供樓同其他開支可以每個月可到1萬蚊（但澳門月供手續費問題，我打算會分注投資，不會做月供股票）。

你是一個良師, 好希望獲得你的正確指導和意見支持, 感謝

龔成老師：

1）方向可以，你30歲，無問題。

2）可以。

3）如果可以，當然月供較好。你可以考慮領展（0823）。

4）可以，這是一個好方法。

5）得，但注意總投資金額不能過多。每入股上限15%好了。

6）最好月供，或慢慢分注入，潛力度是有的，但股價都波動，要慢慢分注投資，控制好總金額。

7）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你唔買收息股都無問題。

8）其實保險在理財中，都有一定的作用，我地理財最重要是「攻守兼備」，你要有防守（即是保險類），同時有增增值。

除非你現時的財富比例，過多在保險，否則，不用斷供。但之後要加強翻股票，保險比例不用太多。

股票增長力較強，但風險度都會較高，你要平衡。

9）其實你照之前的方向已得。

平穩增長股你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。

如果你不月供，就分注買入。你單靠平穩增長股是較難有15%回報，同時要加入潛力股票。

------------------------------------------------

Q20124：

龔sir您好，我最近有需要套現大概HK$1m，正在煩惱應該賣出那些股份，希望你可以比d意見。如果係以下股票裡面賣出（全部有幾手），以股票質素同現價黎講

龔sir有無想法可以考慮先賣出邊d？

1）移卡（9923）
2）五礦資源（1208）
3）HKTV（1137）
4）Sands （1928）
5）1548
謝謝！

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

五礦資源（1208）質素未算好強，金斯瑞生物科技（1548）近年業務增長力不算高。這兩股可以考慮較先賣出。

另外，你要分析你想建往後的組合，如果想增長，金沙（1928）就未算好適合。如果穩陣，移步（9923）、香港電視（1137）就未必適合。

------------------------------------------------

Q20125：

龔sir, 好想請教您，我對保費融資很有興趣，但我本身係穩陣派，見到介紹話係以槓桿形式進行保費融資的，有點怕……請問您覺得可取嗎？謝謝您！

龔成老師：

我講當中的風險。

如果保單的派息，唔能夠與你借貸部分的利息同步上升，你得到的息差就會減。

原理是你借錢，要比息，現時借錢利息低，你有著數，賺息差，但當利率向上，你就有機會蝕息，這是你最大的風險。

------------------------------------------------

Q20126：

老師，想再次謝謝你，我得到人生第1個60萬了！我朋友常常說買美股賺錢，講到好叻咁，知道佢原來放晒美股後先賺左幾千蚊

我想講我三年前follow左老師你fb同上你堂後，暫時賺左20萬了！我相信未來繼續保持這種投資方法會賺更多～

但我因為年尾想買大約400萬樓，所以現在暫停月供（2018 年2月開始友邦，比亞迪，銀娛，中電，中銀香港，領展，港鐵各$1000）同有3手吉利（均價$14.5）2手中生製藥（均價$7.61）。

因年尾要用錢同怕市波動，現在每月淨儲現金約17000蚊無作投資，再慢慢放以上股票（但其實捨不得放晒，全部有質素）到時應有78-80萬

買樓後希望留返約20萬股票，再努力月供同儲現金等機會買潛力股，想問呢個方向有無問題呀？謝謝

龔成老師：

恭喜你！

如果你一年內要買樓，要資金，就要開始準備，如果這刻現金不足，要賣股票，就要開始過程，在一年內賣出股票套出相對應資金，不要等到時先賣，因為無人知到市大市升跌。

所以，你停供，賣股，是需要的。

最好當然是留翻部分優質股，但就要睇你的實際情況。

到你買樓後，完成按揭，到時有資金再慢慢買翻股票。

------------------------------------------------

Q20127：

龔sir,可以點樣了解一隻股適合持有？

龔成老師：

我地買股票就是買企業，因此，一定要優質企業。

另外，偵要睇翻是否適合自己的風險度，潛力股/收息股？

要睇翻這股在財富組合的角色。因為你現時是建立一個組合，長期持有的。

------------------------------------------------

Q20128：

咁其實對潛力股的分析，係咪好靠自己眼光對佢企業前景點睇？

如果想買股票，可以上完基礎班已經慢慢買，定上完7月進階班先？(手上有12萬可投資)

龔成老師：

潛力股有佢的指標的，例如產品、行業、大環境的特點，同時，有些財務數據都能睇到。當然，眼光都是其蠱一個因素。

你要有延伸分析的能力，唔好只集中在當刻的市場消息，要推斷到將來，以及尋找企業本質較好的企業。

股票基礎班，你上完後，已經可以買股票，足夠的。只是進階班會更深入去研究企業。

------------------------------------------------

Q20129：

你好呀 龔sir, 2129 我係0.45買,甘我應賣定長揸？

龔成老師：

LEGION CONSO（2129）質素只是一般般。佢主要在新加坡從事提供以下物流服務：

（一）貨車運輸服務：指港口與指定提貨／交貨地點的貨物（主要為集裝箱）拖運；另亦聘請獨立分包商提供
若干貨車運輸服務。

（二）貨運代理服務：乃一站式解決方案，集團擔當代理並為客戶安排和協調運輸，最終客戶通常來自零售和
製造業等行業，其裝運的起點或目的地通常在國外。

（三）增值運輸服務：包括露天倉儲服務、裝箱與卸貨服務，以及物流堆場與指定提貨或交貨地點的集裝箱拖
運。

其實規模不算大，加上賺錢能力不算強，整體只是一般。

如果你多貨，宜減。如果貨不多，可守下，上翻較多先賣，不過長線投資價值唔算高。

------------------------------------------------

Q20130：

龔sir您好，我岩岩睇財務自由行其中一part(放棄現時現金流，獲取將來更大現金流）

其中有提及「而投資科技股的策略應投資在潛力企業身上，即是要發掘下一隻騰訊、下一隻阿里巴巴，而不是購買現時的騰訊或阿里巴巴」

但是我見龔sir係潛力股推介list有包含呢倆隻，何解呢？係咪因為當時佢哋重未程現真正潛力呢？可以了解一下嗎？感謝

龔成老師：

簡單來說，700、9988是不差的股票，適合大部分投資者，所以對「一般」的投資者，我建議

但如果有知識，有實力，就應該尋找「未被市場發現」的潛力股，這樣才可以更高回報，這是我書希望投資者能到達的境界。

------------------------------------------------

Q20131：

你好呀 龔老師 本人30頭 現在有10萬左右流動資金 早排買左0799升到頂位放左 之後33蚊入左吉利0175 3手

想問下新能源汽車中的吉利 還有在上升趨勢嗎

我還仲想投資多一隻潛力股 京東 美團 阿里巴巴 請問三隻 中邊隻最大潛力推薦入手？

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你這年齡，可投資平穩增長股+潛力股。

你可以考慮阿里（9988），吉利（0175）可長線，另外應同時加入一些平穩增長股到組合。建立一個平衡的組合。

當然，同時要留有一定的現金在手。

------------------------------------------------

Q20132：

你好，老師，我只係新手，近月開始睇你既書同網頁，看到同樣出生基層的你有今天的成就，令我十分鼓舞，加上我真係學到好多野，後悔無早早向你學習，希望老師現時可以指點一下我既儲蓄同選股方向，萬分感激！

年約30歲，已婚，家庭月入6萬8-7萬，供緊一層自住物業，現時每月淨儲蓄現金$15000，想於未來三年內換樓和生小朋友，長遠希望財務自由(不過好難！）

現時已買股約50萬，全都是平均少注：20萬舊經濟股（1373、1113、823、778、11）、30萬新經濟股（1211、1177、1833、9988、1448、1810、2382、3088），未知老師對以上組合分配和選股睇法如何呢？

謝謝老師的無私分享和教導

龔成老師：

換樓，最重要是供款方面問題，你可以定這個為計劃，但就不用急。你可以好好把握這幾年，努力儲蓄投資，到時最好有足夠資金換樓，同時不要賣晒所有股票，令你可以有股樓平衡的配置

現時你持有的，基本上都是有質素的，比例方面亦可以，由於現時新經濟股開始貴，因此你加新經濟股的力度，宜減慢。舊經濟股則無問題。

我見你所選的都是有質素的，都問題，方向已經正確。

但都要由有一定的現金，去等機會入市。

------------------------------------------------

Q20133：

Hello 龔成，本人正是80後，今年36歲，係一位單親媽媽。

由2020年開始，平均月入48000左右，月儲20000左右。
有個已購入既公屋單位與爸媽及仔仔同住，要供養父母。

目前有55萬積蓄，另外有兩手匯豐股票由64蚊持有至今
之前有兩手騰訊敵不過你所講既長線同信心，得到薄利就放左，當時仲係420蚊咁上下。

（本人對股票全不在行，只靠自己直覺同電視走勢分析去做判斷，所以我已報名你初階課程，希望可以學習到正確既理念，再重新出發）

我係一個月前開始留意到你既分享，真心令到我都好熱血，我自問本身都係一個極不認命既人，相信自己去改變命運。

我買左你幾本書去睇，睇完都令我有重新思考，過往既自己有想改善命運既心態，但無行動既勇氣。

我係2020年有留意賣盤，心態係樓價只會一直升值，能夠買完收租，係我其一既長遠打算，為將來收入做好準備。

但之後留意你話「乘法」，我就希望策略應該先用股票買賣，令本金推高才作其他工具投資。

畢竟首期本身都係預一成，其實能夠選擇到優質單位可以話無乜可能，純粹係覺得要快D入市。

我知道最近市況都開始有點熱哄哄既情況出現，所以股票方面，我無諗住宜家哩個情況下入市，你話要睇準時機，咁我寧願等撈底，好過宜家去衝。

故此都特意來郵問下閣下對我哩種情況，有咩建議
本人的確唔知應該從何入手好....

另外好多謝你寫書去分享你既經歷，我會繼續支持..仲有三本寄梗黎，你本百萬富翁仲等左成個星期先有，你都要繼續打不死。只要有目標，就算最後唔成功，過程都好重要。我一定會記住。謝謝！

龔成老師：

不如我講少少香港樓市分析，你可以睇下點配合。相信中短期有可能向下（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

買樓最重要是睇「供得起」原則，如果這方面無問題，你已經可以開始慢慢睇下樓。

最理想就是「股樓平衡」，即是你買完樓後，仍有股票及現金在手，這是最理想的。加上現時新經濟股有點熱，你投資舊經濟股較好。

如果你打算中短期買樓，投資股票的資金不要太多，等你買完樓先正式買更多股票。

而股票方面，你長遠應建立一個平衡的財富組合，優質股要長線。

股票班見！

------------------------------------------------

Q20134：

龔sir, 想問下內房股基本都有負債,如果要選擇內房股投資應該選擇少負債既投資,但我有發現有d股佢負債唔高,現金流足夠,但股票既價值唔高係咩原因?

同樣3333恆大佢既負債極高,仲要成日用折賣樓,但佢又有咁多人投資?

如果股東權益大於負債,咁該股是否暫時沒有負債或債務危機,但是公司的發展與潛力就未知,只是知道沒有財務問題? 是否這樣理解 ?

想問下你對新能源股有咩睇法? 其實睇呢d版塊洗唔洗了解下國策或者拜登對能源政策既方向?

如果現價將2333既股票賣出再轉去175會唔會建議? 因為現狀感覺175既發展潛力比2333大,但不知道為何2333會比炒得如此高。相對2333,175現價是否較平?

Thx

龔成老師：

中國恒大（3333）這是一個高負債的例子，其實佢業務本身不算差，但負債太高。負債高其實有好有壞，當好景時，佢只是少少資金就可以賺好多錢，股價的上升可以好勁。

不過，當樓市逆轉，又或中央有時會出打擊樓市政策，加上佢本身負債極高，對佢有一定的影響。如果樓市有大少少的逆轉，可以對佢造成巨大影響，只是過往中國，多年來樓市整體向上，因此無事，但我地作為投資者，都不能無風險概念。

相反，一些低負債的內房，賺錢能力就會相對較低，不過在樓市逆轉時，佢地會較強。

所以，你要平衡風險與企業的賺錢能力。恆大不是不可投資，而是要明白風險，控制注碼。

至於吉利（0175），我相信長遠潛力度較長城（2333）好。吉利本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

------------------------------------------------

Q20135：

老師, 你好。以往年少無知，成日聽人講號碼就買，以至蟹貨好多年。

可以請老師就以下的股俾啲意見嗎？
繼續持有／止蝕？　謝謝

338　上海石油化工股份　$5 X 20000
939 建設銀行 $6.54 X 15000
945 宏利金融 $151.5 X 300
2628 中國人壽 $30 X 2000

484 雲遊$44.2 X 600
1359 中國信達 $4.08 X 7000
6 電能 $67 X 1000
1826 旭通控股 $2.2 Ｘ10000

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

上海石油化工（0338）、建行（0939）、中人壽（2628）、電能（0006）質素是有的，但增長力就唔算強，你要睇翻自己的投資目標，去決定這些股持有多少。

宏利金融（0945）有質素，可持有。

雲遊控股（0484）中國信達（1359）質素只是一般，增長力不強，宜減持。

旭通控股（1826）業務不太好，賣出較好。

------------------------------------------------

Q20136：

老師 想同你請教下
最近思考緊個問題

現時越來越多人知道價值投資 同時都越來越多人使用價值投資

咁嘅情況下 其實係唔係價值投資越來越難實現？

龔成老師：

如果愈來愈多人用價值投資法，的確我地賺錢會難左，因為好散再因為市場的無知而能夠買到平野。

不過，就算多人用，始終都是有限的，香港仍是短炒為主的市場，所以我地仍有一定的獲利機會。

睇翻巴菲特，同價值投資法70年，成為全球投資最賺錢人已經好多年，已經話比全世界聽，價值投資法最賺錢，不過，仍有好多人仍然是短炒，多年都是這樣，你打開電視就知，因此，只要仍有人短炒，我地憑價值投資法賺大錢的機會仍在。

------------------------------------------------

Q20137：

龔sir你覺得這樣的組合怎樣？

係潛力股中我想係組合樣樣有D，但銀碼唔會好大，這樣會不會散得滯，唔夠集中呢？

港鐵：$2000
領展：$2000
盈富：$2000（我見龔sir FB都經常比較建議月供呢隻）
安碩恒生科技：$1000
中生製藥：$1000
港交所：$1000
福壽園：$1000
月供總供1萬元

龔sir你覺得這樣的組合會唔會更好D嗎？感謝指點，非常感激，另外我已經報讀左基礎班， 期待期待

龔成老師：

你現時的股票，都是有質素的，投入金額及配置比例都適合，你可以進行。

由於ETF是一個組合，因此就算佔你股票組合比例較多，都無問題，例如盈富（2800）、恆生科技ETF（3067），當然，如果你有選股能力，就不用太多ETF。

現時你的組合無問題，配置正確，你保持進行就得，當然要同時留有一定的現金，等你在大跌市時可以把握到機會。

股票班見！

------------------------------------------------

Q20138：

Hello, 老師你好!本人43歳, 月入$33000, 單身, 與家人同住, 現持有以下股票:

0003 2000
0005 2000
823 500
1038 2500
2388 1000
2800 4000
1299 800
1177 10000
939 5000

現月供 0003 $1000, 1038 $1000, 2800 $2500, 2382 $2500

儲蓄互助社, 現月儲$7800

現持有30萬現金

1) 想問現在持有的股票和月供股票有需要調整嗎?有需要考慮其他類別的股票嗎

2)我本身沒有買保險及基金, 現考慮要不要參加自願性供款, 或自願醫保? 想問一問意見, 應該減少月供股票/月儲現金, 投放在自願性供款/醫保?

之前曾月供比亞迪, 在90元已經全部放了, 之後已經不能在低價買入, 很可惜!

感謝老師幫忙

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時較多在收息類股。

其實以你的年齡，並不是無增長力的，因此，你應該加強翻少少增長力（當然不是太進取）。

你可以考慮加入每月月供安碩恒生科技（3067），$1000-$1500。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）我地理財，最重要是攻守兼備，你保險，是理財其中一部分，因此，是需要的。

不過，「足夠」就得，唔需要過多。所以，當你分析想買那些保險時，最重要是自己的需要，那些風險你不想承受，想轉嫁比保險公司？這就是你的思考方向。一般來說，危疾、人壽保險是需要的，而儲蓄成份，就不一定要。

------------------------------------------------

Q20139：

老師，因為股市高己放左手頭上大部新科技股， 現想買地產16，1997，1972 同14 請問如何選擇其一？
謝謝你

龔成老師：

其實幾隻都可考慮，都是有質素的，不過中短期未必強，但長遠會慢慢好轉。

如果較平穩，就新地（0016），如果增長力高少少，可考慮，希慎（0014），因為佢銅鑼灣較受影響，疫情過後好轉情況會較大。

------------------------------------------------

Q20140：

你好！想請問1971買唔買得過，見佢發盈喜 全年純利同比增長唔少過6成，又冇跌穿招股價，行緊三底上升軌

睇見公司兩位大股東12月以平均價4.8增持四次，可以嗎？

龔成老師：

無跌穿招股價、行緊三底上升軌，都不是分析因素，唔好信這些分析。

兩位大股東增持，只能說是一些加分位。

我地最重要是分析「企業的業務本質，長期發展」。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19241-Q19260）

Q19241：

在平穩增值的觀點上來說，老師你會比較建議買入盈富，還是平穩增值的個股？例如港鐵。

龔成老師︰

若講增長潛力，個別股票會較好。

如果講平衡性，由於盈富（2800）係一籃子優質股票，所以會較高。其實我通常建議網友買盈富，目的是「平衡組合風險」，如果講增長，盈富當然不是最強。

若你資金不多，只可投資好少量股票，咁會較難做到分散風險，這時候投資盈富會係一個好選擇。

------------------------------------------------

Q19242：

老師你好，之前報讀了你股票班, 老師話小米會上到30蚊, 估不到咁快已到價, 請問長線小米會不會過百蚊？

小米暫時已賺了6位數字，從來未試過一隻股票可以賺咁多錢，感恩可以遇到老師，記得老師話賺到100萬之後，好快就有第二個100萬，另外想問進階班會唔會好難？搵倍升股會唔會容易啲？

希望可以搵多啲錢請工人照顧媽媽，媽媽年紀大，自己份人工又少，唔做去照顧媽媽又唔夠，請問老師現在有冇潛力股可以買入？

希望可以入多啲貨，祝老師身體健康，心想事成！

龔成老師：

小米（1810）有質素的，只要我地仔細分析企業，從長遠的角度分析就知這企業有質素，所以我自己都有貨，我都會長線持有的。

我相信佢現時的股價，已足份反映了佢這刻的企業價值，因此，要再大升不易。

反而應該耐心持有，等企業有更大的成長。

對，有左第一個$100萬後，第2個、第3個，會更快！

至於進階班，是基礎班再接上去的，如果你基礎班跟到大約7成，都可以跟到的。

現時不少潛力股都上左，你見《50優質潛力股》，10隻潛力股中，過半都倍升，所以現時要找已較難。

反而你可考慮安碩恒生科技（3067），這基金可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19243：

Hello 龔sir,
你說的恒生科技ETF是3088 還是3032？

龔成老師：

其實有4隻3032/3033/3067/3088

暫時睇，3067管理費較少。

4隻基金都是追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19244：

龔sir,可唔可以介紹一下除左上你既股票班可以學到比較全面既企業估值法，你撰寫嘅其中一本書有教到企業估值法？或者有冇介紹？感謝

龔成老師

企業估值，由於要考慮到最新的大環境去進行分析，如果以一本書去表述，會好快變得作用減左，因此，我在企業估值的教學，都集中在股票班。

你都可以睇《股票勝經》又或巴菲特相關的書。

------------------------------------------------

Q19245：

Hi Sir,3913 合景 [email protected] 是新股, 點知坐艇, 一直知阿Sir不贊成投資新股, 所以現停止新股; 想問 阿Sir會有咩策略? 照沽出還是長揸先?

增長力高少少, 睇中1177 自製供股, 已入 7.82@1000, 現價算不算便宜, 值得繼續入手嗎?

Thanks.

龔成老師：

合景悠活（3913）由合景泰富集團（1813）分拆上市，主要在中國從事為住宅物業及商業物業提供綜合物業管理服務，服務包括：

（１）預售管理服務：預售展銷單位和銷售辦事處的清潔、保安及維護等。

（２）物業管理服務：清潔、保安、園藝、維修及維護等。

（３）商業營運服務：服務包括前期規劃與諮詢服務、租戶招攬服務、租戶管理服務及營銷推廣服務等。

（４）增值服務：物業代理服務、家居服務（管家服務、裝潢、拎包入住服務、團購服務。

財務數據顯示這企業的生意增長理想，盈利都不差，不過，上市年期短，財務數據可信程度會減。

長遠發展正面的，不過估值方面就唔平，就價仍在合理區頂水平。如果你貨不多就守住先。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。你有貨可持有，如果加注，要慢慢加，唔好急。

------------------------------------------------

Q19246：

老師，我想問如果而家我儲1萬等跌市，另外用一萬月供，咁月供應該供幾多隻股票同埋比例應該點呢？

我見你d post 多數都係每隻月供約$2000

如果供2隻平平穩增長（盈富/領展/金沙/平安），一隻潛力股（阿里/騰訊）？

龔成老師：

你儲1萬等跌市，另外用一萬月供，方向正確。

至於月供那些股，第一，一定是優質股，第二，要睇你風險承受能力，盈富（2800）是最為平衡的，再加上領展（0823）可以。

至於加一隻潛力股，可以，你可選阿里（9988），如果想建立潛力股組合，考慮安碩恒生科技（3067）都得，月供。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19247：

我依家21歲 目標係5年可以有100萬

不過澳門既月供股票唔抵，手續費同倉費都高，我草錢等啱價位小注可以嗎？還是都係月供好啲

龔成老師：

澳門月供的確有點煩，如果真的月供，你應該集中一隻去做月供，只月供盈富（2800）。

又或者，以自己儲錢模式，久不久就以一手手模式買入，由於一手手模式，買入價風險比月供模式為高，因此，你唔好心急入。

你年輕，是財富增長黃金期，好好增加你的知識，同時不斷儲蓄、投資，我相信你一定可以完成目標的。

------------------------------------------------

Q19248：

龔sir 好多謝你甘用心回我的問題，我問其他投資專家一d問題佢地多數唔答或好hea甘答，你真係一位好老師！

講返先，既然投資股票係長線，睇公司既企業質素，唔受短期影響。那麼阿里巴巴9988呢？

佢企業質素唔差，業績有賺有增長，但只係受外圍因素影響，螞蟻，美國果邊打擊，佢既股價由300去到25x -26x，似乎唔知幾耐先上返280 290 300⋯這樣如果在高位持貨是否止蝕再換d近期炒起既股？

如果之前250以下入呢？是否長渣？因為外圍因素往往好影響股價多於企業發展對股價有利好，所以Lee d情況(其實都幾經常發生)影響如何決左持貨中既去留？

龔成老師：

阿里（9988）有質素，有增長力。

佢係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但在現價唔算平的情況下，投資值博率只屬中等。

當然，這股增長力強，只要業務與盈利大增，之後就算股價不變，都會慢慢調整到合理的估值區域，所以，這刻不是全無值博率，只是值博率不算好高。

佢最近面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

------------------------------------------------

Q19249：

龔成老師您好！小妺現時35歲！沒父母陰！沒學識！只靠自己！月入2萬！

沒有流動現金！有供樓（每月還款＄10000）！每月使費剛剛好⋯⋯最多只可以有一二千蚊剩下！

股票：
001:3000股（平均價$57）
005:800股（平均價＄58）
388:300股（平均價$250）
700:200股（平均價$280）
868:2000股（平均價$7）
883:10000股（平均價$8.6）
1800:2000股（平均價$16）
2318:1000股（平均價$55）
2338:1000股（平均價$11.5）
2388:2500股（平均價$34）
2858:3000股（平均價$6.5）

叧外有2隻合股到、跌到無眼睇：
340:3000股
1387:200股

因為沒有現金流！所以近來有心儀的都無錢買！我想問我應該怎樣整合部署？

另外！我有一份月供$1800的保險，但沒有儲蓄成份！
要改為有儲蓄成份的會比較好嗎？（我另外有買一份保險基金月供$1500）

懇請龔成老師比意見小妹！
感謝萬分！

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你年紀計，應著重增值方面。匯控（0005）只係收息股，唔適合，故不要再加注。

中國交通建設（1800）、中海油（0883）、易鑫集團（2858）和濰柴動力（2338）增長力唔強，又未能去到最高質類別，建議唔好持有太多。

潼關黃金（0340）和中國地利（1387）質素欠佳，應盡快沽出。

保險方面，買足夠保障就可以，唔需要儲蓄成份。

而基金方面，你都要了解翻佢質素和升值能力。你可以用盈富（2800）作比較，佢年平均增長約10%（連股息再投資），去決定維持這基金，還是轉投至其他優質股。

現時你儲蓄唔多，但可以先用佢來月供盈富（2800），令你財富可以維持升值能力。長線計，你要想辦法令自己可用資金增加（如做兼職、減開支等），去提升財富增值效果。

------------------------------------------------

Q19250：

老師，我覺得自己做錯決定

我新股抽左中通快遞@218 一手
但第二日見佢直插多10幾%
就已經放左，後來好後悔太衝動！點知可以保持心態！

阿里巴巴又係196 時買！210 又放左！宜家見佢就直上$300

成日覺得自己做錯決定⋯
謝謝老師

龔成老師：

其實，中通快遞（2057）都有質素。又唔需要太過擔心。

睇翻佢的資料，佢係中國較領先的快遞公司，於2002年成立，按總包裹量計是中國領先的快遞服務供應商，市佔率約2成，佢通過全國性網絡提供送件服務，以及其他增值物流服務。

佢的網絡基礎設施，由90個分揀中心與282條自動化分揀線，由約9,050輛自營幹線車輛服務超過3,400條幹線線路組成，網絡覆蓋全中國。

至於財務數據方面，生意與盈利都不差，不過，始終新上市數據未必好準，要慢慢先見真章。現價平就唔平貴，不過有發展的，如果小注無問題的，這股值得長線。

你有幾樣野要學習：

1）明白買股是企業，要經過仔細分析，試下每次買股票前，都逼自己寫下份簡單報告，寫低買入的理由，這公司的質素，投資策略等。

2）你要用長期的角度分析，我見你只集中在短期股價，你要改正翻。

3）唔好升少少就賣，這是散戶經常犯的錯，要長線投資。

------------------------------------------------

Q19251：

老師：你好！想請教你我月供2800、66打算加新經濟股9988和268好嗎？麻煩你

龔成老師︰

這個要視乎你年紀，如果你偏年青，加入一些潛力股係可以。但你若較中年，這些股票就不宜持有太多。

月供方面，阿里巴巴（9988）係可以。但金碟（0268）就太貴，暫時不宜做月供。另外，以下都係一些有質素的潛力股，給你參考。

安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q19252：

你好 老師，想請教應該幾時止賺/止蝕？ 現持有（1585）賺，（285）賺及（2013）蝕，我個人認為每隻都係長線，有發展，但如果一直keep著唔放，可能短期內突然急挫

咁就錯過當中既賺取，我應該先賺取一部份等下降少少先再入手還是一直持有？謝謝

一直持有是否係因為滾利息？

龔成老師︰

我地是否持有一隻股票，唔應該睇佢個股價，而係要用個企業質素去做決定。就算中短期下跌，只要質素無變，照持有都無問題。

至於你講出現下挫，會令自己失去賺錢機會，這個想法不正確。因為我地唔應該去"估走勢"，無人知你沽左貨之後，會唔會一如你預期咁再跌，佢可能會反而大升，到時你就會進退失據。

只要企業有質素，長線持有才會對你最有利。

一直持有和複利無關，複利息模式一定要有「再投資」的動作，即收到股息後，進行再投資，可以投資原有股票，又或其他優質股，從而得到再增值效果。

你3隻持股都有質素，但雅迪控股（1585）負債唔輕，而微盟集團（2013）盈利和股價上佢都幾波動。此2隻股可投資，但只宜小注。

------------------------------------------------

Q19253：

新手一問，請問7299係未好似港股咁玩？同埋係未要轉倉？

如果想玩金做中長線咁投資可以嗎？

龔成老師︰

ＦＬ二南方黃金（7299），當中有槓杆成份，要留意風險。升的時候你會賺多左，但跌時候你損失同樣會係雙倍。

另外，你要明白黃金是沒有現金流的，持有無法創造出經濟價值。我地買佢主要作用，是對沖黑天鵝事件。

所以，投資黃金係可以，但不用佔財富比例太多（<3%），而且持有的應該為實金。

你買賣如同買賣股票般進行就得。

------------------------------------------------

Q19254：

老師你好，我想問下呢～ 因為2013（12.8有貨），1313（12.12有貨），1478（8.9有貨）

呢啲全部都高位入左，其實而家佢哋跌到咁低，係咪可以溝貨會好啲？

另外想請問2800，合理價係幾錢？謝謝

龔成老師︰

首先，你現明白溝貨與分注是不同的。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

微盟集團（2013）雖然跌左唔少，但估值依然係貴，唔好加注住。

華潤水泥控股（1313）有質素的，不過業務就較有波動，佢過往的盈利數據上落都大，因此股價的變大亦會較大。

此股長遠是正面，但就要留意股價上落會較大。現價加注都可以，但要控制注碼，唔好佔組合太多。

丘鈦科技（1478）本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

整體來說，不過不失，波動是這股最大的風險。而價算係合理區，可分注，但只宜小注。

盈富（2800）己在合理區，可分注儲貨。

------------------------------------------------

Q19255：

1）恒地（0012）同長和（001）、長實（006）息率差不多，但見老師通常推介月供恒地

好似未見過提長和系，兩者業務發展有好大分別？

2）最近在天星銀行提左一筆20萬私人貸款，60日內還完全免息

請問有冇最低風險、最高回報方法運用呢20萬？例如做定期？

謝謝

龔成老師︰

1） 恆基（0012）是有質素的股票，佢是全港持有最多農地的發展商，長遠的價值一定會慢慢釋放。相比長和系2隻股票，佢潛力會較高。

而長建（1038）主要做基建，長和（0001）則是大型綜合企業，包括基建、碼頭、電訊等。2者同樣有質素，但潛力不及恆基。

2） 60日係一個極短時間，就算投資最保守的優質股，都會有出現波動機會。

因此，你只可以做最保守架事，就係做定期。

------------------------------------------------

Q19256：

老師你好，我報左你黎緊的堂
但係有D問題想係上堂之前問左你先

A. 我現時持有
1. 復星國際656 入市價$9 4000股
2. 中國鐵塔788 入市價$1.41 20000股
我應該繼續持有嗎？

B. 現時政府提供的百分百擔保特惠貸款
我大概可以借50萬
我應該借回來之後作一些低風險投資賺取差價嗎

因為看你的書說說不要借貸投資
但這個息口真的不高，所以想再聽聽你的意見

C. 有什麼財經節目可以介紹以增進投資知識？
我有多年看十點無綫財經

但看過你的書之後就覺得所謂的專家都是今天講升明天睇跌

所以想找更實際的方式增值自己

謝謝，股票班見！

龔成老師︰

A） 你要明白一個概念，我地持有一隻股票與否，關鍵位是企業質素、前景，不要被買入價影響。

復星國際（0656）不算差，質素都算有，但不算好強。但業務如醫藥、健康產品，會有較大的業務波動，同時在中國經濟轉弱下，中短期會有影響，因此業務因素令股價受壓。

此股都有質素係度，如果佢佔你組合唔算太多，可以守，但預佢中短期內都會較弱。

中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

股本回報率不高，是這股較弱的地方。行業上，佢係有壟斷優勢，而且中國5G和未來發展成數字大國架策略，都會對佢有利。此股係有發展潛力，你買入價合理，長線持有就可以。

B） "借貨"係投資中最後皇牌，去到係好明顯機會才會用。雖然透過借貸投資，從中賺取息差，是可以。

但現時大市只在合理區，未算好平，會有較大機會出現「賺息蝕價」的情況，令你計劃得不償失，你要明白有這個風險。

C）我地最重要是得到「資訊」，不是「意見」，財經新聞、每日新聞，你要睇，但你要懂得分析佢所講的野有無用。

我花最多時間，就是睇企業年報，一定有用過你不斷聽無聊意見。當然，基本的新聞與財經都要睇。

股票班見！

------------------------------------------------

Q19257：

老師你好，点睇1302.先健科技，522.AsM太平洋，两只的合理区与平价是多少，

現价觉得有点貴，特别是1302.現在看股票勝经。。如果有不明白再问你。

哪些网站选股比较好？
感激

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

要回到合理區，最少要回較多先算。而且此股盈利都好波動，只宜小注投資。

ASM PACIFIC（0522）有質素的。佢業務為設計、製造及銷售半導體工業所用之器材、工具及物料，以及表面貼裝技術配置機。於湯森路透的報告中，ASM被選為全球百大科技領導企業之一。

這企業有一定的實力，而且增長力不錯，財務數據正面，行業前景正面，因此有投資價值。

不過，從過往的數據可見，業務都有略為波動的情況，始終這類科技行業的變化較大，存有不確定性，你要留意這點。

估值方面，現價算是合理區頂部。由於這企業規模已經龐大，你預佢比較難有高速增長。而且業務都有波動，不宜大注。

如果你想睇基本股票資料，一般投資網站都好足夠。但如果係選股，我地係要從佢多方面去分析，好似企業質素、行業前景、財務狀況等。至於選股網站，我在課堂中會具體教。

------------------------------------------------

Q19258：

老師你好，以下股票我持有多年，因之前不懂得管理，已蝕接近5成

請問那些我應該繼續持有，那些需換馬？ 可以給我一些換馬的建議嗎？。

跟你的方向投資了半年，已有小成，十分感謝！

6820 友誼時光 4000股
1538 中奧到家 6000
656 復星國際 1000
1476 恒投証券 2000
2139 甘肅銀行 4000
2858 易鑫 500

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。我地先睇翻企業本身質素，如果係優質，咁這些中短期波動，我地係唔需要理會。

FRIENDTIMES（6820）係是中國的手機遊戲開發商、發行商及營運商，專注於女性玩家的手機遊戲。

除發行自主開發的遊戲外，佢亦通過第三方分銷平台發行及營運第三方開發的遊戲，以及授權第三方發行商於海外市場發行及營運集團的遊戲。

見佢增長快速，佢這類公司的風險高，加上上市不久，根本不知佢的真實情況。因此，這股業務有發展，但同樣有風險，只宜小注。

中奧到家（1538）都可以考慮的，這股的業務都穩定，只是規模較細，加上背景方面不算強，令增長力不及其他大型物管企業。

現價合理，不過要留意股價較波動，未必適合投資太大注。

復星國際（0656）不算差，質素都算有，但你預佢中短期會較弱。

恒投証券（1476）主要從事證券承銷及保薦、證券及金融產品、證券及期貨經紀代銷等業務。

睇佢過往盈利都好波動，而且賺錢能力唔算強，整體質素一般。佢唔係完全無質素，但長線計，你慢慢換碼至其他優質股會較理想。

甘肅銀行（2139）同樣係質素一般，近年賺錢能力有變壞情況。長線計，換碼至其他優質股較好。

易鑫集團（2858）企業基本上仍處於燒銀紙的狀態，這類股風險較高，不過，我唔敢話佢完全無潛力。

這類股估值難，不確定性較高，只可以話，如果佢佔你組合不多，持有係可以，但暫時我未能確定佢業務真的向好。

換碼方面，如果你係年青至中年，以下股票都可以。如果你唔係咁認識以下股票，你可以換至盈富（2800），佢係包括52間質素不錯上市公司股票的組合，值得你投資。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

------------------------------------------------

Q19259：

想問下中芯國際（981）依家適唔適合買
見到有師兄講摩根都有買入

同埋9988 255買入，應該繼續留嗎
感謝

龔成老師：

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算貴，加上之前熱炒過，股價大上大落，投資要注意風險。這股唔建議大注。

阿里（9988）面對內地監管可能收緊，因此風險度增加左，最大的影響在於螞蟻的貸款業務，這亦是中國叫停上市的其中一個原因。

因為這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

你有貨可守，但未必要太急加注。

------------------------------------------------

Q19260：

請問你認為1066 威高屬於優質股嗎？
現在合理區？

龔成老師：

威高股份（1066）都有質素的，不過業務有少少波動。

佢主要從事研發、生產及銷售醫療器械產品、骨科產品、介入產品、藥品包裝產品及血液管理產品，以及於中國經營融資租賃及保理業務。

長遠有一定的發展，不過毛利變化較大，盈利有不確定性。雖然有長線投資價值，但股價較波動，以及經常都貴。

你預現價合理區頂，小注好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。