死咗八個仔（上）
死亡，係每個人都會面臨嘅結局。
不過，有啲人比較不幸，人生啱啱開始，就已經行到結局。
身為一個初生嬰兒科嘅醫生，我救過好多BB，亦見過好多BB夭折。
但無論見過幾多生死，每次見到有BB停止呼吸，見到父母肝腸寸斷，我個心依然好難受。
所以，我努力進修，希望可以救到更多BB。
但就算係醫生，都冇辦法救到所有人。
今日，有個叫阿花嘅女嬰，直接由婦產科被送到初生嬰兒科。
阿花有一對好精靈嘅大眼睛，望住人嗰陣，真係令我心都軟埋。
可惜，佢一出世，身體就好虛弱，我哋用盡所有方法，但佢嘅生命依然只有九日。
九日後，阿花死於腦膜炎，一世都冇離開過醫院。
阿花嘅媽媽馬太趕過嚟，攬住阿花小小嘅屍體，嚎啕大哭。
在場嘅醫生、護士都紛紛安慰馬太。
我通知咗醫院嘅社工，希望佢哋好好關心馬家嘅情況。
喺馬太嘅資料度，我見到佢仲有四歲嘅囡同一歲嘅仔，希望兩個小朋友可以令佢盡快從悲傷中復原啦。
作為醫生，我實在有太多病人要關注，所以過幾日，我就放低咗呢件事。
直至兩個禮拜後，一歲嘅男仔阿揚急症入院，我都有參與佢嘅治療。
入院嗰陣，阿揚幾乎停止呼吸，喺大家極力搶救下，好彩醒得番。
住咗十日院，阿揚終於可以返屋企。
接阿揚返屋企嘅，係馬太。
由於我唔係阿揚嘅主診醫生，所以我冇太留意病人嘅家人資料。
當我喺病房外撞到馬太嗰陣，我都呆咗：「阿揚係你嘅……」
「係我個仔。」馬太淚眼滂沱咁答：「好彩你哋救得番阿揚，真係仁心仁術，再世華佗！」
馬太講到呢度，居然想跪低，我即刻阻止佢，安慰咗佢好耐。
唉，馬太真係好黑仔，細女啱啱死咗，個仔又入急症，好彩救得番。
唔夠半日，就證實馬太真係黑仔，一啲都唔好彩。
因為阿揚又被急症送番入嚟，而呢次，入院嘅時候已經腦死亡。
醫院認為，阿揚嘅死因係病毒感染同癲癇發作。
馬太喊到呼天搶地，但佢冇鬧過任何一個醫生，佢只係怨自己黑仔，覺得自己照顧得唔好。
唉，呢個城市醫療唔算好發達，嬰兒本來就有一定嘅夭折率。
見到馬太咁慘，大家都好同情佢。
醫院仲幫佢發起募捐，好多媒體、藝人去慰問佢。
不過馬太本身係一個助理護士，唔算好窮，其實捐錢都冇咩用，表達吓心意啫。
可惜，一個半月後，馬太四歲嘅女不斷抽搐，被送入醫院。
第二日，佢死咗。
呢個病人並唔係我負責，但馬太已經成為咗我哋醫院嘅名人，所以佢個女一入院，我就收到消息。
醫院將個女仔嘅死因，列為「捂熱綜合症」，指嬰兒因為過度保暖，或者冚被太焗而出現急症。
不過，呢個病一般都係一歲以下嘅嬰兒，先會發病。
馬太個女已經四歲，仲會咁樣病死，真係有啲罕見。
連續死咗三個小朋友，警察嚟咗醫院調查。
但唔知點解，結果都冇驗屍，可能係怕刺激到馬太掛。
下集：https://bit.ly/3zWCKsn
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #死咗八個仔
